1 THESSALONICA 4

Pasien a Lungkimsah Hinkhuo

1A nukhia penin sanggamte aw, Pasien lungkim nadingin bangci nuntah lei kilawm ding ahei, ci thute ko tung pana na sinsa uh ahi ma bangin (a gamta tahtah na hi ma bangun) na sep semsem nadingun i Topa Jesu minin thumin kang hanthawn uhi. 2Bangzieh ahei cile note in Topa Jesu tungtawna kang pieh uh thuhilnate na thei uhi. 3Na siengtho nading uh Pasien’ deina ahi ziehin numei-pasal pahtatna na pel un: 4Note khat ciet in siengthona le zatahna tawh noma’ pumpi#4:4 Ahi sihle “ama ading zi bangci lah ding” ciet bangci uh ding ci thei unlen, 5Pasien a thei lo Gentile-te bangin cilesa lunggulnate-ah na uong seng sih un. 6Tam thute-ah koima a sanggamte tungah khiel sih hinlen a met zong sui sih heh, azieh pen kang magensa ule khau taha kang hilsa uh ma bangin tam thute zosie tungah a thuhkia pa pen Topa ahi hi. 7Bangzieh ahei cile Pasien in a thangtat dinga ei hlat ahi sih a, a siengtho dinga ei hlat ahi zaw hi. 8Tua ahi ziehin tam thu a niel mi poma pen mihing thuneina a niel hi loin, note tungah ama’ Hlagau Siengtho ang pie pa Pasien a niel ahi zaw hi.

9Ahi vangin sanggam ki-itna tawh kisai-in mi khatpo in note tungah lai tawh ang giel ding na kisam nawn sih uhi, azieh pen khatlekhat na ki-it nadingun Pasien in note mama ang hil zo ta hi; 10tuaci’n note in Macedonia gam kuoma om sanggamte zosie zong na it tahpi uhi. Ahi vangin ka itte#4:10 Gk “sanggamte” aw, tua banga na it semsem ding uh kang hanthawn uhi. 11Kang hilsa ma bangun daitaha hinkhuo na man thei nadingun noma vai behah buoi unlen, na khut utawh hanciemin na sem un, 12tua hile a pulam mite mai-ah kilawmtahin na gamta thei ding vua, koima tungah na kingam ta sih ding uhi.

Topa Ang Pei Nading

13Hizongle sanggamte aw, lametna a nei lo midangte banga na da luot lo nadingun a sisa mite#4:13 Gk “a kimu mite” thu thei lo-a na op ding uh ka dei sih uhi. 14Bangzieh ahei cile eite in Jesu si-in thokia zo hi, ci-in i up ma bangin, Jesu tungtawnin Pasien in a sisa mite#4:14 Gk “a kimu mite” nangawn zong Jesu tawh ang zawpi ding hi, ci-in i um uhi. 15Azieh pen kote in na kung vuah Topa’ kammal kang tangko uh thu in, Topa ang pei cieng dong a nungta a omlai eite in a sisa mite#4:15 Gk “a kimu mite” i makhel vawt sih ding uhi. 16Bang ding ahei cile tua Topa mama, thupiehna awging tawh, vantungmi mangpa kikona le Pasien’ pengkul aw tawh ang kum suh ding a, Khris sungah a sisa mite ang tho masa ding uhi. 17Tua zaw ciengin a nungta a omlai eite i hi ule Topa tawh hui lahah a kimu dingin amate tawh meii tungah ei kilato ding a, tuaci’n Topa tawh i omton den ta ding uhi.#1Cor 15:51-52 18Tua ahi ziehin note khatlekhat tami thute tawh na kihenem un.

Currently Selected:

1 THESSALONICA 4: ZBOTF01

Highlight

Copy

Compare