1 PETER 1
1
Hopina
1Jesu Khris’ sawltahpi keima Peter in,
Pontius gam, Galatia gam, Cappadocia gam, Asia gam, le Bithynia gamte-ah galtai-a a Kithethang Mite kungah lai kang hlah hi.
2Pa Pasien in a sekholsa le a teelsa mite, Jesu Khris’ thu a mang ding le a sisan tawh a kithe dinga Hlagau Siengtho in a siensuosa mite tungah:
Hepina le kilemna a kicingin hing om taheh.
Ahing Lametna
3I Topa Jesu Khris’ Pa le Pasien in thupha nga taheh! Ama’ ei khuotuona lienpi ziehin sina panin Jesu Khris’ thawkiana tungtawnin ahing lametna a nei dingin eite a tha-in ei suohsah zo a, 4note adingin vantungah a kisie thei lo, a buabang lo, le a vul thei lo na gouluo ding uh ang kikoipieh zo hi. 5Note pen upna tungtawnin hun nukhia ciengin a kilang dinga a baisa-a a om hutdamna a nga dingin Pasien’ vanglietna tawh ang kikemcingte na hi uhi. 6Tu-in note in bakhat sung hahsatna tuomtuomte na thuoh pah zongun, tami thu-ah lungdam un, 7tua in mei tawh a kisittel zaw cienga a kisie thei kham sanga a manphazaw na upna tahtah uh hing kilangsahin, Jesu Khris ang kilaa ciengin phatna, minthanna le patawina na nga thei nading uh ahi hi. 8Ama mu ngai lo napi na it uhi; tu-in ama mu sih nan locin na um vua gen zawh lo za dongin kipahin nahpi tahin na lungdam uhi, 9azieh pen na upna uh’ tupna bulpi ahi na hlagau uh’ kihutdamna a nga na hi uhi.
10Tami hutdamna tawh kisai-in note nga ding hepina thu a genkhol kamsangte in limtahin sui-in a kantel vua, 11amate sunga om Khris’ Hlagau in Khris’ thuoh dinga a kisesa teng le tua zaw cienga a nga ding minthanna thu teci a pankhol lai-in, koi a cina ahi a, bang hun ding ahei ci-in a kan hi. 12Vantung pana ang kisawl Hlagau Siengtho tawh note tunga lungdamna thu ang hil mite in na kung vuah tu-a ang kigensa thute ang hil lai-un, amau’ na sem hi loin note’ na sem ahi lam amate tungah a kilah zo hi, tam thute pen vantung mite nangawn in a mu nop uh thu ahi hi!
Hindan Siengtho dinga Hlatna
13Tua ahi ziehin nasem dingin na lungsim uh a kigingsa-in om un; no le no pilvang unlen, Jesu Khris ang kilah hun cienga ang kipie ding hepina tungah na lametna uh nga un. 14Thumang tate ma bangin bangma na thei lo uh hun lai-a na lunggulnate vuah buol nawn sih un. 15Note ang hlan pa a siengtho ahi ma bangin no zong na gamtatna zosie vuah na siengtho un. 16Azieh pen, “Kei a siengtho ka hi ziehin note zong na siengtho ding uhi,” ci-in kigiel hi.
17A gamtatnate utawh kizui-in mi zosie tungah deidat nei lo-a thu a khen pa tungah Pa bangin thu na nget uleh, na galtai uh hun sungin ama giingin gamta un. 18Na pu na pate uh tung pana na luosuh uh a ginalo gamtatna panin a kisie thei nate ahi ngun le khamte tawh ang kitan ahi sih a, 19mapawn nei lo le nuolbang lo tuuno tawh a kibang a manpha Khris’ sisan tawh ang kitan ahi lam na thei uhi. 20Ama pen leitung pien masangin a kisekholsa hi a, ahi vangin note adingin hun nukhia cienga ang kilahsah pan ahi hi. 21Pasien tungah na upna ule na lametna uh a kingah thei nadingin, ama tungtawnin sina panin ama a thosah le minthanna a pie pa Pasien sungah muonna a nei na hi uhi.
22Tu-in note itna tahtah tawh khatlekhat na ki-it thei nading ule na lungtang tawng panun khatlekhat na ki-it thei nadingun thuman thutah zuina tawh na hlagau uh na siensuo zo uhi. 23A kisie thei khaici tawh hi loin, a kisie thei lo khaici ahi, a hing le a kip a kho Pasien’ thu tawh a tha-a a suohkia na hi ta uhi. 24Azieh pen,
“Mihing zosie lopa tawh kibang a,
ama’ minthanna zosie zong lopa paa tawh kibang hi.
Lopate vulin paate pul a,
25ahi vangin Topa’ thu ahile
a tawntungin kip hi,” a ci hi.
Tami thu in na kung vua ang kigensa lungdamna thu ahi hi.
Currently Selected:
1 PETER 1: ZBOTF01
Highlight
Copy
Compare
Share
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
