Leet de Leeda 7

1Drei om, drei om, Sulamit; drei om, drei om, daut wie die aunkjikjen! - Waut mucht jie aun de Sulamit seenen? Aus de Reijen von Machanaim.

2Woo scheen sent diene Schräd en diene Schoo, Dochta de Ferschten! De Tjnäp - diene Hoften sent aus eene Haulskjäd, een Woakj von Kjenstlahaunt. 3Dien Nowel es eene runde Schiew, en dee de Mischwien nich mangelt; dien Lief een Weithupe, ommtient met Lelje. 4Diene beid Brosten sent aus een Poakje junge Kose. 5Dien Hauls es aus een Torm von Aulfenbeen; diene Uagen aus daut Wota von Hesbon aum Dooa de volkjsrikje Staut; diene Näs aus de Libanon Torm, dee no Damaskus hankjikjt. 6Dien Haupt opp die es aus de Karmel, un daut raufhenjende Hoa von dienem Haupt aus Purpur: Een Kjennich es jefasselt derch diene Locke!

7Woo scheen best du, un woo leeftolich best du, oo Leew, unja däm Jenuss! 8Dise diene Hecht es (du best jewossen) aus de Palme, un diene Brosten aus Druwen. 9Ekj säd: Ekj well opp de Palme noppstieen; well äare Asta omfoten; un diene Brosten sellen mie aus Druwen vom Wienstock sennen, un de Duft ut diene Näs aus Appel, 10un dien Bähn aus de basta Wien, - dee mienem Jeleewden saunft raufrant, dee äwa de Leppen de Schlopende rant.

11Ekj sie mienem Jeleewden siene un no mie es sien Velangen. 12Komm mien Jeleewda, lot ons oppem Flekj rutgonen, enne Darpa äwanachten. 13Wie wellen ons tiedich oppmoaken no de Wienboaj, wellen seenen, auf de Wienstock utjeschloagen haft, daut Wienbläjsel sikj opjemoakt haft, auf de Grenaute blieejen; doa well ekj die miene Leew jäwen. 14De Dudaim {1Mo.30,14}; (Leewaupel, Alraune) rikjen, un äwa onse Däaren sent aulahaunt adelje Fruchte, niee un oole, dee ekj, mien Jeleewda, die oppbewoat ha.

Currently Selected:

Leet de Leeda 7: PBJHF

Highlight

Copy

Compare