Leet de Leeda 5

1Ekj sie en mienen Goaden jekomen, miene Sesta, miene Brut, ha miene Mirren jeplocken met mienem Balsam, ha mien Bieewauss jejäten met mienem Honnich, mien Wien jedrunken met miene Malkj. Ät, Frint; drinkjt un bedrinkjt junt, Jeleewde!

2Ekj schleep, oba mien Hoat woakt. Horch! Mien Jeleewda! Hee kloppt aun: Moak mie op, miene Sesta, miene Frindin, miene Duw, miene Vollkomne! Dan mien Haupt es voll Deiw, miene Locke voll Nachtdreppe.

3Ekj ha mien Kjleet utjetrocken, woo saul ekj daut wada auntrakjen? Ekj ha miene Feet jewoschen, woo saul ekj de wada schwiensch moaken?

4Mien Jeleewda strakjt siene Haunt derch daut Loch, un mien Ennalichet wort sienthaulwen erräacht. 5Ekj stunt opp, om mienem Jeleewden optoomoaken, un von miene Henj lakjt Mirren un von miene Finjasch lakjt Mirren - aun de Jräp vom Rijel. 6Ekj muak mienem Jeleewden op; oba mien Jeleewda haud sikj omjedreit, wia wiedajegonen. Ekj wia uta mie, aus ekj räd. Ekj socht am un funk am nich; ekj roobt am un hee auntwuad mie nich. 7Daut fungen mie de Wajchtasch, dee enne Staut omhäa jinjen: See schluagen mie, vewunden mie; de Wajchtasch vonne Mia neemen mie mienen Schleia wajch. 8Ekj beschwia junt, Dajchta Jerusalem, wan jie mienen Jeleewden finjen, waut sell jie am berechten? Daut ekj krank sie fa Leew.

9Waut es dien Jeleewda ver eenem aundren Jeleewden, du Baste unja de Frues? Waut es dien Jeleewda ver eenem aundren Jeleewden, daut du ons aulsoo beschwiest?

10Mien Jeleewda es witt un root, utjetieekjent ver 10 000-de. 11Sien Haupt es reinet, fienet Golt, siene Locke sent krus, schwoat aus ne Krauj; 12siene Uagen aus Duwen aun Wotastreem, boden en Malkj, aus kostboare Steena enjesat en eenem Räme; 13siene Baken aus een Goaden met Balsam, Aunboaj von scheen rikjende Plaunten, siene Leppen Lelje, lakje von ranende Mirren; 14siene Henj goldne Rolle, met Topas besat; sien Lief een Konstwoakj von Aulfenbeen, bedakjt met Sapir; 15siene Schinkjes von wittem Marmel, jesat opp eenem Unjajestall von reinem Golt; siene Jestault aus de Libanon, aus utjeläsne Zeeda; 16sien Mul (Mulbähn) es aus Seetichkjeite, un aules aun am es leeftolich. Daut es mien Jeleewda, un daut mien Frint, jie Dajchta Jerusalem!

Currently Selected:

Leet de Leeda 5: PBJHF

Highlight

Copy

Compare