Leet de Leeda 4
4
1Kjikj, du best scheen, miene Frindin, kjikj, du best scheen: Diene Uagen sent Duwen unja eenem Schleia. Dien Hoa es aus eene Häad Kose, dee aun däm Aunboaj de Jebirje Gilead loagren. 2Diene Tänen sent aus eene Häad jeschoane Schop, dee vom schwamen nohecht komen, dee aultomol Poakjes jebäaren, un kjeent unja an es onfruchtboa. 3Diene Leppen sent aus eene Schnua von Karmesin, un dien Mul es leeftolich. Aus eene Schnäd von eenen Granataupel es dien Schlop unja dienem Schleia. 4Dien Hauls es aus David sien Torm, dee rund jebut es: 1000 Schilda henjen doaraun, aule Schilda de Helden.
5Diene beid Brosten sent aus een Poakje junge Kose, dee unjre Lelje weiden. 6Bat de Dach aufkjeelt un de Schautes veschwinjen, well ekj nom Mirenboajch hangonen un nom Aunboaj met Weiruak.
7Gaunz scheen best du, miene Frindin, un kjeen Fäla es aun die. 8Met mie vom Libanon rauf, miene Brut, met mie vom Libanon saust du komen; vonne Spetz det Amana rauf saust du kjikjen, vonne Spetz de Senir un Hermon, von de Loagastäd de Leiws, von de Boaj de Leoparde. 9Du hast mie daut Hoat jestolen, miene Sesta, miene Brut; du hast mie daut Hoat jestolen met dienem eenem Blekj, met eene Kjäd von dienem Haulsschmuck. 10Woo scheen es diene Leew, miene Sesta, miene Brut; wooväl bäta es diene Leew aus Wien, un de Duft von diene Saulw aus aule Jewerzen! 11Honnich rant von diene Leppen, miene Brut; Honnich un Malkj es unja diene Tung, un de Duft von diene Kjleeda aus de Duft vom Libanon. 12Een veschlotna Goaden es miene Sesta, miene Brut, een veschlotna Borm, eene vesäajelde Kjwal. 13Waut ut die waust, es een Lostgoaden von Granatbeem met adelje Frucht, Hannabloomen (Granautappelboom) met Narde; 14Narde un Safran, Jewerzholt un Zimt, met aulahaunt Weiruakholt, Mirren un Aloe met vetrafliche Jewerzen; 15eene Goadenkjwal, een Borm met läwendjem Wota, un Streem, dee vom Libanon ranen.
16Woak opp, Nuadwint, un komm, Siedwint: Pust derch mienem Goaden, lot sien scheenet Jeroch ranen! Mien Jeleewda komm en sien Goaden un at dee am kjestliche Frucht.
Currently Selected:
Leet de Leeda 4: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
