Psalm 90
90
1Een Jebäd von Moses, däm Maun Gottes.
Har, du best onse Wonunk jewast von Jeschlajcht too Jeschlajcht.
2Iea de Boaj jebuaren worden, un du de Ieed un dän Ieedkjreis erschaufen (jebuaren) hautst - jo, von Eewichkjeit too Eewichkjeit best du Gott.
3Du latst däm Mensch toom Stoff trigjgonen, un sajchst: Komt trigj, jie Menschenkjinja!
4Dan 1000 Joa sent en diene Uagen aus de jistasche Dach, wan hee vegonen es, un aus eene Nachtwoak.
5Du schwamst an wajch, see sent aus een Schlop, Zemorjes aus Grauss, daut utlat; 6Zemorjes bläjt daut un waust; oppenowent woat daut walkj un vedrieecht.
7Dan wie vegonen derch dienen Oaja, un derch dienen Jrim woa wie beenjst.
8Du hast onse Onjerajchtichkjeiten ver die jestalt, ons jeheemet Doonen ver daut Licht von dienem Aunjesecht.
9Dan aule onse Doag veschwinjen derch dienen Oaja, wie brinjen onse Joaren too aus een Vesefze (Jedanken).
10De Doag - onse Joaren, - daut sent 70 Joa, un wan en Krauft (huach) 80 Joa, un äa Stolt es Mieej un nuschtich, dan schwind ielt daut vebie, un wie flieejen doahan.
11Wäa erkjant de Krauft von dienem Oaja, un, diene Forcht jemäss, dienem Jrim?
12Soo lia ons dan onse Doag too talen, om daut wie een weiset Hoat erlangen!
13Komm wada, Har! - Woo lang? - Un erboarm die äwa diene Kjnajchts!
14Moak ons Zemorjes saut met diene Jnod, soo woa wie jublen un ons freien en aule onse Doag.
15Moak ons no dee Doag froo, doa du ons jeboagen hast, no dee Joaren, doa wie Iebel jeseenen ha.
16Lot diene Kjnajchts seenen dien Doonen, un diene Majestät äare Säns!
17Un de Huld vom Harn, onsem Gott, es äwa ons! Un moak faust äwa ons daut Woakj von onse Henj; jo, daut Woakj von onse Henj, moak daut faust!
Currently Selected:
Psalm 90: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
