Psalm 89
89
1Een Maskil. Von Etan, däm Esrachita.
2De Jnod Gottes, well ekj en Eewichkjeit besinjen, von Jeschlajcht too Jeschlajcht met mienem Mul diene Tru toweeten loten.
3Dan ekj säd: Opp eewich woat de Jnod jebut woaren; enne Himmel woascht du fauststalen diene Tru.
4Een Bunt ha ekj met mienem Uterwälten jeschloten, - ha David, mienem Kjnajcht, jeschwuaren:
5«Bott en Eewichkjeit well ekj dienen Somen fauststalen, un opp aule Jeschlajchta han dienen Troon buen». (Sela)
6Un de Himmel woaren diene Wunda veharlichen, Har, un diene Tru enne Vesaumlunk de Heilje.
7Dan wäa es met däm Harn enne Wolkjen to vejlikjen? Wäa es aus de Har unja de Jetta Säns?
8Hee es een Gott (El), schrakjlich enne Vesaumlunk de Heilje, un furchtboa äwa aule, dee om am häa sent.
9Har, Gott de Häaschoa, wäa es majchtich aus du, oo Jah? Un diene Tru es runtom die häa.
10Du beharschst daut toobende Mäa; siene Walle erhäwen sikj, du moakst an stell.
11Du hast Rahab veklunjt aus eenen Erschloagnen; met dienem stoakjen Oarm hast du diene Fiend vestreit.
12Dien es de Himmel un dien es de Ieed; de Ieedkjreis un waut äa felt, du hast dee jejrind.
13Nuaden un Sieden, du hast dee erschaufen; Tabor un Hermon jublen en dienen Nomen.
14Du hast eenen jewaultjen Oarm, stoakj es diene Haunt, huach diene Rajchte.
15Jerajchtichkjeit un Rajcht sent de fausta Grunt von dienem Troon; Jnod un Woarheit gonen ver dienem Aunjesecht häa.
16Jlekjseelich daut Volkj, daut däm Jubelschaul kjant! Har, em Licht von dienem Aunjesecht waundlen see.
17En dienem Nomen freien see sikj däm gaunzen Dach, un derch diene Jerajchtichkjeit woaren see erhowen.
18Dan de Riem von äare Krauft best du; un derch diene Huld (Jnod) woat erhowen woaren ons Huarn.
19Dan de Har es ons Schild, un de Heilja Israels ons Kjennich.
20Eenst rädsd du, em Jesecht, von dienem Frommen un sädst: Ekj ha de Help opp eenem Held jelajcht, ekj ha eenen Uterwälten erhowen ut däm Volkj.
21Ekj ha David jefungen, mienem Kjnajcht - met mienem heiljem Eelj ha ekj am jesaulft -, 22met däm miene Haunt faust bliewen saul, un mien Oarm saul am stoakje.
23De Fient saul am nich äwafaule, un de Sän de Ojjerajchtichkjeit saul am nich bedrenjen (unjadrekjen); 24un ekj well siene Jäajna ver am veschmatre, un siene Haussa well ekj schlonen.
25Un miene Tru un miene Jnod woaren met am sennen, un derch mienem Nomen woat sien Huarn erhowen woaren.
26Un ekj well siene Haunt aun daut Mäa lajen, un siene Rajchte aun de Streem.
27Hee woat mie tooroopen: Mien Voda best du, mien Gott (El), un de Fels miene Radinj!
28Soo well uk ekj am toom Ieeschtjebuarnen moaken, toom Hechsten de Kjennichs de Ieed.
29Eewich well ekj am miene Jnod bewoaren, un mien Bunt saul am faust bliewen.
30Un ekj well sienem Somen ensaten fa emma, un sienen Troon aus de Doag de Himmel.
31Wan siene Säns mien Jesaz veloten un nich en miene Rajchte waundlen, 32wan see miene Sazungen entheiljen un miene Jebooten nich hoolen, 33soo woa ekj äare Äwaträdunk met de Wieed strofen un met Schläaj äare Ojjerajchtichkjeit.
34Oba miene Jnod woa ekj nich von am aufdreien un miene Tru nich bräakjen (aufdreien).
35Ekj woa mienen Bunt nich entheiljen un nich endren, waut väajegonen es ut miene Leppen.
36Eenmol ha ekj bie miene Heilichkjeit jeschwuaren: Woo sull ekj David beläaje!
37Sien Somen woat eewich sennen, un sien Troon aus de Sonn ver mie; 38eewich woat hee fauststonen aus de Mon; un dee Zeij enne Wolkjen es tru. (Sela)
39Oba du hast veschmäten un vestat, best sea oajalich jewast jäajen dienen Jesaulwden; 40du hast veschmäten dän Bunt von dienem Kjnajcht, hast siene Kroon oppe Ieed jeschmäten (jeklunjt); 41du hast aule siene Mia doljeräten, hast siene vesechade Städen en Trimma jelajcht.
42Aula, dee opp disem Wajch vebiegonen, ha am berooft; hee es siene Nobasch toom Spott jeworden.
43Du hast de Rajchte de Bedrenja erhowen, hast aule siene Fiend froo jemoakt; 44du hast trigjjehoolen sien schoapet Schwieet un hast am nich bestonen loten em Kaumf; 45du hast opphieren loten sienen Glauns un to Ieed jeschmäten sienen Troon; 46du hast siene Jugentdoag vekjartat, met Schaund hast du am bedakjt. (Sela)
47Woo lang, Har, west du die emma wada vestäakjen, saul aus Fia dien Oaja brenne?
48Jedenkj, waut miene Läwenstiet es, too waut fa eenen Zwakj hast du aule Menschen erschaufen!
49Woon Maun läft un woat däm Doot nich seenen, woat siene Seel erleest von de Jewault em Scheol? (Sela)
50Woa sent, oo Har, diene fäaje Jnodengowen, dee du David, en diene Tru, too jeschwuaren hast?
51Jedenkj, Har, de Schmach diene Kjnajchts, daut ekj [Spott] en mienem Bossem droag von aul de väle Velkja, 52met waut diene Fiend jespott ha, Har, met waut see jespott ha de Footstaupen von dienem Jesaulwden!
53Jepriesen (veharlicht) es de Har eewichlich! Amen, jo, Amen!
Currently Selected:
Psalm 89: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
