Psalm 9
9
1Däm Väasenja, no (opp) Muth Labben. Een Psalm von David.
2Ekj well Gott danken met mienem gaunzen Hoaten, well vetalen aule diene Wundawoakjen.
3En die well ekj mie freien un froo sennen, well dienen Nomen besinjen, du Hechsta.
4Aus miene Fiend sikj trigjtrocken (trigjdreide), follen see un kaumen om ver dienem Aunjesecht.
5Dan du hast mien Rajcht un miene Sach jefieet; du hast die opp däm Troon jesat, een jerajchta Rechta.
6Du hast de Nazionen jeschulle, de Gottloose vetilcht; äaren Nomen hast du fa emma un eewich utjelascht.
7Oo Fiend! Too Enj sent de Trimma (Vebräakjen) fa emma; - uk de Städa, hast du too Grunt jebrocht; äa, jo, äa Jedajchnis es veschwungen.
8Oba Gott blift (troont) eewichlich; hee haft sienen Troon oppjestalt toom Jerecht.
9Un hee, hee woat däm Ieedkjreis rechten en Jerajchtichkjeit, woat äwa de Velkja een rajchtet Jerecht hoolen.
10Un de Har woat eene huage Fastinj sennen däm Unjadrekjten, eene huage Fastinj en Tieden de Noot.
11Un opp die woaren vetruen, dee dienen Nomen kjanen; dan du hast nich veloten, dee die sieekjen, Gott.
12Sinjt Psalmen däm Har, dee Zion bewont, vekjindicht unja de Velkja siene Doten.
13Dan dee däm vegotnem Bloot noforscht, haft aun an jedocht, hee haft daut Schrieen de Älendje nich vejäten.
14Sie mie jnädich, Har! See opp mien Älent von miene Haussa (Fiend), endäm du mie opphäwst ut de Doodespuate;
15om daut ekj aul dien Loff vetal enne Puaten de Dajchta Zion, sie froo äwa diene Radinj.
16Vesunken sent de Nazionen enne Kul, dee see jemoakt; äa Foot woat jefangen en däm Nat, daut see heimlich jelajcht ha.
17De Har es bekaunt jeworden; hee haft Jerecht utjeewt, endäm hee däm Gottloosen jefangen haft en däm Woakj siene Henj. (Higgajon, Seidenspell, Sela).
18Daut woaren em Scheol (Doodenrikj (griechisch: Hades)) trigjgonen de Gottloose, aule Nazionen, dee Gott vejäten.
19Dan nich fa emma woat de Oama vejäten sennen, noch fa eewich veloaren de Hopninj de Älentje (Saunftmootje).
20Sto opp, Har! De Mensch haft nich de Äwahaunt; ver dienem Aunjesecht woaren de Nazionen jerecht.
21Laj Angst opp an, Har; daut de Nazionen weeten, daut see Menschen sent! (Sela)
Currently Selected:
Psalm 9: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
