Psalm 88
88
1Een Psalmleet. Von de Säns Korah. Däm Väasenja, no Machalat Leanot. Een Maskil. Von Heman, däm Esrachita.
2Har, Gott von mienem Heil, ekj schrieech Dach un Nacht ver die.
3Mucht mien Jebäd ver die komen! Neij dien Ua no mienem Schrieen!
4Dan miene Seel es saut vom Lieden, un mien Läwen es dicht aum Scheol.
5Ekj sie to dän jeacht dee enne Kul vesinkjen; ekj sie aus een Maun, dee kjeene Krauft haft;
6unja de Doodes hanjestrakjt, aus dootjeschloagne, dee em Grauf ligjen, aun dee du nich mea denkjst; dan see sent von diene Haunt aufjeschnäden.
7Du hast mie enne deepste Kul jelajcht, en Diestanis, em Deepen.
8Dien Oaja licht schwoa opp mie, un met aule diene Walle hast du mie doljedrekjt. (Sela)
9Miene Bekaunde hast du von mie wajchjenomen, hast mie ver an toom Aufschu jemoakt; ekj sie enjeschloten un kaun nich rutkomen.
10Mien Uag es veschmacht fa Älent; no die, Har, ha ekj jieda Dach jeroopen, no die ha ekj miene Henj utjestrakjt.
11Woascht du aun de Doodje Wunda doonen? Ooda woaren de Schautes (Jestorwnen) oppstonen, die too lowenn? (Sela)
12Woat diene Jnod em Grauf vetalt woaren, em Aufgrunt diene True? {Hi.26,6; 28,22; Opb.9,11}
13Woaren enne Diestanis diene Wunda bekaunt woaren, un diene Jerajchtichkjeit en däm Launt de Vejätenheit?
14Oba ekj, Har, schrie no die, un Zemorjes kjemt mien Jebäd ver die.
15Wuarom, Har, vestatst du miene Seel, vestakjst dien Aunjesecht fa mie?
16Ekj sie älent un vejenkjlich von miene Jugent aun; ekj droag dien Schrakj, un sie rotloos.
17Diene Zorngloot es äwa mie jegonen, dien Schrakj haft mie venicht.
18See ha mie omrinjt aus Wota däm gaunzen Dach, see ha mie aula toop omjäwen.
19Frind un Jenosse hast du von mie jenomen; miene Bekaunde sent Diestanis.
Currently Selected:
Psalm 88: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
