Psalm 80
80
1Däm Väasenja. No Leljen däm Zeichnis. Von Asaf. Een Psalm.
2Hoad Israels, nemm too Uaren, dee du Josef leidsd aus eene Häad, dee du troonst äwa de {1Chr.28,18; Hes.10,1} Cherubim, lot dienen Schien seenen!
3Ver Efraim un Benjamin un Manasse erwakj diene Krauft, un komm too onse Help.
4Oo Gott! Leid ons trigj, un lot dien Aunjesecht schienen, soo woa wie jerat woaren.
5Har, Gott de Häaschoa, woo lang rieekjat dien Oaja jäajen daut Jebäd von dienem Volkj?
6Du hast an met Broot von Tronen jespeist, un an motwies met Tronen jedrenkjt.
7Du hast ons toom Zank fa onse Nobasch jesat, un onse Fiend spotten unjarenaunda.
8Oo Gott de Häaschoa, leid ons trigj un lot dien Aunjesecht schienen, soo woa wie jerat woaren!
9Eenen Wienstock brochst du ut Ägipten, vedreefst Velkja un plauntst am.
10Du muakst Rum ver am, un hee schluach Wartlen un feld daut Launt; 11de Boaj worden bedakjt von sienem Schauten, un siene Asta wieren aus Zeeda Gottes.
12Hee strakjt siene Asta ut bat aum Mäa, un bat aum Stroom han siene Auflaja.
13Wuarom hast du siene Mia doljeräten, soo daut se am aula beplekje, dee opp däm Wajch vebie gonen?
14Daut Wiltschwien utem Woolt veweeld am, un daut Wilt vom Flekj weid am auf.
15Gott de Häaschoa, komm doch wada! Kjikj vom Himmel un see, un nemm die disen Wienstock aun, 16un daut Jeplaunte, däm diene Rajchte jeplaunt haft, un däm Sän, däm du die jestoakjt hast!
17Hee es met Fia vebrent, hee es aufjeschnäden; von däm Schellen fa dienem Aunjesecht komen see om.
18Diene Haunt es opp däm Maun diene Rajchte, opp däm Menschensän, dän du die jestoakjt hast!
19Soo woa wie nich von die aufgonen; beläw ons, un wie woaren dienen Nomen aunroopen.
20Har, Gott de Häaschoa, fia ons trigj! Lot dien Aunjesecht schienen, soo woa wie jerat woaren.
Currently Selected:
Psalm 80: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
