Psalm 72
72
1Fa Salomo.
Oo Gott, jeff däm Kjennich diene Jerechten, un diene Jerajchtichkjeit däm Kjennichssän.
2Hee woat dien Volkj en Jerajchtichkjeit rechten, un diene Älendje nom Rajcht.
3De Boaj un de Aunboajch woaren däm Volkj derch Jerajchtichkjeit Fräd brinjen.
4Hee woat däm Älenden em Volkj Rajcht schaufen, hee woat de Kjinja de Oame raden, un däm Bedrekja woat hee veklunjen.
5See woaren die ferchten von Jeschlajcht too Jeschlajcht, soo lang de Sonn un Mon bestonen.
6Hee woat rauf komen aus Räajen oppe Wäs, aus een Näwelräajen, Gusräajen oppem Launt.
7En siene Doag woat de Jerajchta blieejen, un väl Freid woat sennen, bat de Mon nich mea es.
8Un hee woat harschen vom Mäa too Mäa, un vom Stroom bat aun de Enj de Ieed.
9Fa am woaren sikj bieejen de Bewona de Wieste, un siene Fiend woaren däm Stoff lekjen,
10de Kjennichs von Tarsus un vonne Inslen woaren Jeschenkja reed moaken, de Kjennichs von Schäba un Seba woaren Gowen doahan brinjen.
11Un aule Kjennichs woaren ver am dolfaulen, aule Velkja am deenen.
12Dan hee woat däm Oamen raden, dee om Help roopt, un däm Älenden, dee kjeenen Helpa haft; 13hee woat sikj äwa däm Jerinjen un däm Oamen erboarmen, un de Seelen de Oame woat hee raden.
14Von Bedrekjung un Jewault woat hee äare Seelen erleesen, un äa Bloot woat dia en siene Uagen sennen.
15Un hee woat läwen, un vom Golt Schäba woat hee am jäwen; un hee woat emma fa am bäden, däm gaunzen Dach am säajnen.
16Daut woat Äwafluss aun Jeträajd em Launt sennen, oppe Boajchspetzen; aus oppem Libanon woat siene Frucht ruzhen; un see (de Menschen) woaren ut de Städa aus daut Krut ute Ieed väablieejen.
17Sien Nomen woat eewich sennen; soo lang de Sonn besteit, woat sien Nomen bestonen; un en am woat maun sikj säajnen; aule Velkja woaren am jlekjlich veharlichen.
18Jesäajent es de Har, Gott, de Gott Israels, dee Wunda deit, hee auleen!
19Un jepriesen (jeloft) es sien harlicha Nomen en Eewichkjeit! Un de gaunze Ieed woat erfelt met siene Harlichkjeit! Amen, jo, Amen.
20De Jebäda von David, däm Sän Isai, sent too Enj.
Currently Selected:
Psalm 72: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
