Psalm 71
71
1No die, Har, näm ekj Tooflucht: Lot mie niemols beschämt woaren!
2En diene Jerajchtichkjeit moak mie frie un rad mie! Neij dien Ua no mie un halp mie!
3Sie mie een Fels too Wonunk, nodäm ekj emma gonen kaun! Du hast toojesajcht, mie to raden, dan du best mien Fels un miene Burjch.
4Mien Gott, rad mie ut de Haunt de Gottloose, ut de Fust de Ojjerajchte un de Jewaultje!
5Dan du best miene Hopninj, Har, Gott; mien Toovetruen von miene Jugent aun.
6Opp die ha ekj mie jestett vom Muttaschoot aun, ut miene Mutta äa Lief hast du mie jetrocken; von die es mien Loffjesank.
7Fa väle sie ekj aus een Wunda; oba du best miene stoakje Tooflucht.
8Mien Mul es voll von dienem Riem, von diene Pracht däm gaunzen Dach.
9Vesteet mie nich en mienem Ella, biem veschwinjen miene Krauft velot mie nich.
10Dan miene Fiend ha von mie jerät, un dee opp miene Seel luaren, beroden metenaunda; 11un see sajen: Gott haft am veloten; vefolcht un jriept am, dan kjeen Rada es doa!
12Gott, sie nich wiet von mie; mien Gott, spood die mie too halpen!
13Lot beschämt woaren, lot vegonen, dee jäajen miene Seel sent! Lot met Spott un Schaund bedakjt woaren, dee mien Onjlekj sieekjen!
14Oba ekj well emma hopen un aul dien Riem vemieren.
15Mien Mul saul diene Jerajchtichkjeit vekjindjen, däm gaunzen Dach diene Help; dan ekj weet nich äare Zol.
16Ekj woa met de Macht det Harn, Gottes, komen, woa jedenkjen aun diene Jerajchtichkjeit, aun die auleen.
17Gott, du hast mie jelieet von miene Jugent aun, un bat hiahäa ha ekj diene Wundawoakjen vekjindicht.
18Un bat em Ella un bat toom Jreisenella velot mie nich, oo Gott, bat ekj dienen Oarm däm komenden Jeschlajcht vekjindjen, aulen, dee komen woaren, diene Macht!
19Un diene Jerajchtichkjeit, oo Gott, rieekjt bat enne Hecht; du, dee du groote Dinj jedonen hast, oo Gott, wäa es aus du?
20Du, dee du ons (mie) väl Bedrenkjnisen un Beeset hast seenen loten, du woascht ons wada beläwen un wada vom Ieedboddem enopp fieren.
21Du woascht mie Jrata moaken, un du woascht die dreien un mie treesten.
22Uk ekj well die danken met de Hoap, jo, diene Woarheit, mien Gott! Ekj well die Psalmen sinjen met de Zitta, du Heilja Israels.
23Jublen woaren miene Leppen, wan ekj die Psalmen sinj, un miene Seel, dee du erleest hast; 24uk miene Tung woat von diene Jerajchtichkjeit räden däm gaunzen Dach; dan beschämt, dan met Schaund sent bedakjt worden, dee mien Onjlekj sieekjen.
Currently Selected:
Psalm 71: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
