Psalm 7
7
1Een Kloagleet von David, daut hee däm Harn sung wäajen de Wieed Kusch, däm Benjaminita.
2Har, mien Gott, opp die vetru ekj; rad mie von aul miene Vefolja un rad mie (moak mie frie)!
3Daut hee miene Seel nich veritt aus een Leiw, dee veriten, un kjeen Rada es doa.
4Har, mien Gott! Wan ekj soowaut jedonen ha, wan Orrajcht en miene Henj es, - 5wan ekj Beeset vejelt däm, dee met mie en Fräd wia, - ha ekj doch däm jerat, dee mie onen Uasoak bedrenjt, - 6soo vefolcht de Fient miene Seel un hoolt äa en, un klunjt mien Läwen enne Ieed (Grunt) un strakjt miene Iea (Seel) en däm Stoff. (Sela)
7Sto opp, Har, en dienem Oaja! Erhäw die jäajen de Wutt miene Bedrenja, un woak opp - no mie: Jerecht hast du befoolen.
8Un de Schoowa (Jemeent) de Velkja woat die omrinjen; un äat haulwen komm wada nohecht.
9 De Har woat de Velkja rechten. Recht mie, Har, no miene Jerajchtichkjeit un no miene Oschult (Frommheit), dee bie mie es.
10Lot doch een Enj nämen de Boosheit de Gottloose, un moak däm Jerajchten faust! Daut prooft de Hoaten un Nieren dee jerajchta Gott. 11Mien Schilt es bie Gott, dee, dee von Hoaten Opprechtje rad.
12Gott es een jerajchta Rechta, un een Gott, de jieda Dach oajalich (wuttent) es.
13Wan hee (de Gottloosa) nich omdreit, soo schoapt hee sien Schwieet; sienen Boagen haft hee jetrocken un am reed.
14Un Jereetschoft toom dootmoaken haft hee fa am reedjemoakt (opp am jerecht), siene Feilasch moakt hee brennent.
15Kjikjt, hee (de Gottloosa) es en Jeburtsweeen met Onheil; un schwanga met Mieej, un brinjt Faulschheit too Welt.
16Hee haft eene Kul jegroft un haft dee utjehollt, un hee es enne Kul jefollen, dee hee jemoakt haft.
17Sien Onjlekj (daut hee fa aundre reedmuak) woat trigjkomen opp sien Haupt, un opp sienen Schädel woat rauffaulen siene Jewault.
18Ekj well däm Harn danken no siene Jerajchtichkjeit, un besinjen däm Nomen Gottes, däm Hechsten.
Currently Selected:
Psalm 7: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
