Psalm 50
50
1Een Psalm; von Asaf.
Dee Majchtja (El), Gott, de Har, haft jerät un roopt de Ieed vom Oppgank de Sonn bat no äarem Unjagank.
2Ut Zion, de Scheenheit Vollendunk, schient Gott väa.
3Ons Gott kjemt, un hee woat nich stell sennen; Fia frat ver am häa, un om am rom stormt daut jewaultich.
4Hee roopt däm Himmel bowen un de Ieed, om sien Volkj too rechten:
5«Vesaumelt mie miene Fromme, dee mienen Bunt jeschloten ha biem Opfa!»
6Un de Himmel vekjindjen siene Jerajchtichkjeit, dan Gott es daut, dee rechten deit. (Sela)
7«Horch, mien Volkj, un ekj well räden, Israel, un ekj well jäajen die zeijen! Ekj sie Gott, dien Gott.
8Nich wäajen diene Schlachtopfa schell ekj die, un diene Brauntopfa sent bestendich ver mie.
9Ekj neem kjeenem jungen Boll ut dienem Hus, noch Bakj ut diene Häaden.
10Dan aule Tieren em Woolt sent miene, daut Vee opp 1000 Boaj.
11Ekj kjan aule Väajel oppe Boaj, un Tieren opp däm Flekj {Ps.80,14} (aules waut sikj bewäacht) sent (es) mie bekaunt.
12Wan mie hungad, ekj wudd daut die nich sajen; dan miena es de Ieedkjreis un waut äa felt.
13Saul ekj daut Fleesch von Ossen äten un daut Bloot von Bakj drinkjen?
14Opfa Gott Dank, un betol däm Hechsten dien Vespräakjen; 15un roop mie aun aum Dach de Bedrenkjnis: Ekj well die raden, un du woascht mie ieren!»
16Oba toom Gottloosen sajcht Gott: «Waut hast du von miene Sazungen to räden un mien Bunt en dien Mul too nämen?
17Du hast de Zucht jehaust un miene Wieed hinja die jeschmäten.
18Wan du eenen Deef sachst, soo jinjst du jieren met am om, un dien Deel wia met Ehebräakja.
19Dien Mul leetst du loos toom Beesen, un diene Tung flajcht Läajes.
20Du sautst doa, rädst jäajen dienen Brooda, jäajen däm Sän diene Mutta deist du schellen.
21Daut hast du jedonen, un ekj wia stell; du dochst, ekj sie gaunz aus du. Ekj woa die strofen un die daut vere Uagen stalen».
22Dit moakjt doch, dee jie Gott vejäten, doamet ekj nich veriet, un kjeen Rada es doa!
23Wäa Dank opfat, veharlicht mie, un wäa sienen Wajch ennrecht, am woa ekj daut Heil Gottes seenen loten.
Currently Selected:
Psalm 50: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
