Psalm 40
40
1Däm Väasenja. Von David, een Psalm.
2Hopninjsvoll ha ekj oppem Harn vetrut, un hee haft sikj to mie jeneicht un mien Schrieen jehieet.
3Hee haft mie nohecht jetrocken ut de Vedoawniskul, utem Moarast; un hee haft miene Feet opp eenem Steen jestalt, miene Schräd befaustijt.
4Un en mienem Mul haft hee een nieet Leet jelajcht, een Loffjesank onsem Gott. Väle woaren daut seenen un sikj ferchten un oppem Harn vetruen.
5Jlekjseelich de Maun, dee däm Harn too sienem Vetruen moakt un sikj nich dreit no de Stolte un no dän, dee too Läajes neije!
6Väl hast du diene Wundawoakjen un diene Jedanken jäajen ons erwäsen, Har, mien Gott; maun kaun dee nich de Rieej no väaschtale. Ekj wull doavon berechten un räden, daut sent too väl, om dee too talen.
7Aun Schlacht- un Speisopfa haudst du kjeene Lost; Uaren hast du mie reedjemoakt: Braunt- un Sindopfa hast du nich jefoddat.
8Doa säd ekj: Kjikj, ekj kom; enne Buakroll steit von mie jeschräwen.
9Dien Wooljefaulen to doonen, mien Gott, es miene Lost; un dien Jesaz es em Ennalichen en mienem Hoaten.
10Ekj ha daut Heil (de frooe Bootschoft) vekjindicht enne groote Vesaumlunk; kjikj, miene Leppen veschloot ekj nich - Har, du weetst daut!
11Diene Jerajchtichkjeit ha ekj nich veborjen em Ennalichen von mienem Hoaten; diene True un diene Help ha ekj utjesproake, diene Leew un diene Woarheit nich trigjjehoolen ver de groote Vesaumlunk.
12Du, Har, hool diene Erboarmungen nich von mie trigj; diene Jnod un diene Woarheit lot mie emma bewoaren!
13Dan Iebel onen Zol ha mie omjäwen, miene Onjerajchtichkjeiten ha mie enjeholt, daut ekj nich seenen kaun; dee sent väl mea aun Zol aus de Hoa opp mienem Haupt, un mien Hoat haft mie veloten.
14Lot die jefaulen, Har, mie to raden! Har, spood die mie too Halpen!
15Lot an aula toop beschämt un met Schaund bedakjt woaren, dee no mienem Läwen trachten, daut to venichten; lot an trigj gonen un to Schaund woaren, dee jefaulen ha aun mienem Onjlekj!
16Lot sikj schämen äwa äare Schaund, dee von mie sajen: Haha! Haha!
17Lot Froo sennen un sikj freien, en die aule, dee die sieekjen; dee diene Radunk leewen, lot emma sajen: Groot es de Har!
18Oba ekj sie älent un oam; de Har denkjt aun mie. Miene Help un mien Rada best du; mien Gott, siem nich!
Currently Selected:
Psalm 40: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
