Psalm 35
35
1Von David.
Striet, Har, met dän, dee jäajen mie strieden, kjamf met dän, dee mie bekjamfen!
2Jriep Jewäa un Schilt un sto opp om mie too halpen!
3Un trakj dän Spies un veschlut däm Wajch jäajen miene Vefolja; räd to miene Seel: “Ekj sie diene Radinj!”
4Lot beschämt un to Schaund woaren, dee no mienem Läwen trachten; lot trigjgonen un met Schaund bedakjt woaren, dee Onheil jäajen mie ersennen (plonen).
5Lot an aus Sprie ver däm Wint sennen, un de Enjel vom Harn jajcht an wajch.
6Äa Wajch es diesta un jlepsich, un de Enjel vom Harn vefolcht an!
7Dan onen Uasoak ha see mie äa Nat heimlich jelajcht, onen Uasoak miene Seel eene Kul jegroft.
8Äwa an kjemt Vedoawen, onen daut hee et weet, un sien Nat, daut hee heimlich jelajcht haft, jript am; toom Vedoawen fält hee nenn!
9Un miene Seel woat froo sennen en däm Harn, sikj freien en siene Radinj.
10Aule miene Jläda woaren sajen: Har wäa es aus du! Dee du dän Älenden radst von däm, dee stoakja es aus hee, un dän Älenden un Oamen von däm, dee am berooft.
11Doa stonen onjerajchte Zeijen opp; waut ekj nich weet, froagen see mie.
12See vejelten mie Beeset fa Goodet; veweist es miene Seel.
13Oba ekj, aus see krank wieren, kjleed ekj mie en Sakduak; ekj deemootijd miene Seel met Fausten, un mien Jebäd kjeem en mienem Bossem trigj; 14aus wia daut mie een Frint, een Brooda jewast, soo sie ekj omhäa jegonen; aus leetdroagend om de Mutta ha ekj mie truarich doljebekjt.
15Oba see ha sikj äwa mien Faul jefreit un sikj vesaumelt; Lestamula ha sikj jäajen mie vesaumelt, un ekj kjand an nich; see ha jelestat un nich oppjehieet.
16Aus ruchloose Schmarotza kjnirschten (gnorschten) see met äare Tänen.
17Har, woo lang west du toseenen? Brinj miene Seel trigj ut äare Vewustunk, von däm jungen Leiw miene eensome.
18Ekj woa die enne groote Vesaumlunk danken, unja välem Volkj die lowen.
19Lot sikj nich äwa mie freien, dee onen Uasoak mie Fiend sent, un plinkjre nich met de Uagen, dee onen Uasoak mie haussen!
20Dan see räden nich von Fräd; un jäajen de Stelle em Launt ersennen see Läajes.
21Un see ha äa Mul jäajen mie opjemoakt; see ha jesajcht: Haha! Haha! Ons Uag haft daut jeseenen!
22Du hast daut jeseenen, Har; sie nich stell! Har, sie nich wietauf von mie!
23Woak opp un woak to mienem Rajcht, mien Gott un Har, to miene Rajchtsache!
24Schauf mie Rajcht no diene Jerajchtichkjeit, Har, mien Gott! Un lot an sikj nich äwa mie freien!
25Lot an nich en äarem Hoaten sajen: Haha, soo wull wie daut! Lot an nich sajen: Wie ha am veschlungen!
26Lot an sikj schämen un aula toop met Schaund bedakjt woaren, dee sikj äwa mien Onjlekj freien! Lot met Schomp un Schaund bekjleet woaren, dee jäajen mie groot doonen!
27Lot jublen un sikj freien, dee Jefaulen (Lost) ha aun miene Jerajchtichkjeit, un lot an emma sajen: Groot es de Har, dee Lost haft aun sienem Kjnajcht sien Wool (goot gone)!
28Un miene Tung woat räden von diene Jerajchtichkjeit, von dienem Loff dän gaunzen Dach.
Currently Selected:
Psalm 35: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
