Psalm 33
33
1Jubelt, jie Jerajchte, en däm Harn! dän Rädlichen jeziemt Loffjesank.
2Dankt däm Harn met de Zitta, sinjt am Psalmen met de tienseidje Hoap.
3Sinjt am een nieet Leet; spält goot met Jubelschaul!
4Dan jlikj es daut Wuat vom Harn, un aul sien Woakj en Woarheit.
5Hee leeft Jerajchtichkjeit un Rajcht; de Ieed es voll Jnod vom Harn.
6Derch daut Wuat Gottes sent de Himmel jemoakt, un aul äa Häa derch däm Frodem ut sienem Mul.
7Hee saumelt dee Wota em Mäa aus een Hupe (eene Mia), lajcht en äare Jrensen de Streem (de deepe Wotasch).
8Daut fercht sikj fa däm Harn de gaunze Ieed; fa am sellen sikj enjsten aule Bewona vom Ieedkjreis!
9Dan hee säd, un daut wia; hee jeboot, un daut stunt doa.
10De Har vebrakjt däm Rotschluss de Heiden, hee vehindat däm Plon de Velkja.
11De Rotschluss vom Harn besteit eewich, de Jedanken en sienem Hoaten von Jeschlajcht too Jeschlajcht.
12Jlekjseelich de Nazion, dän äa Gott de Har es, daut Volkj, daut hee sikj too sienem Oawgoot erwält haft!
13De Har kjikjt von dee Himmel erauf, hee sitt aule Menschenkjinja.
14Von de Städ ut siene Wonunk kjikjt hee opp aule Bewona de Ieed; 15hee, dee äare aule Hoaten jemoakt haft, dee opp aule äare Woakjen acht haft.
16Een Kjennich woat nich jerat derch sien grootet Häa; een Held woat nich frie (jerat) derch siene groote Krauft.
17Een Bedrach es daut Pieed too Radunk, un derch de Menj vom sienem Häa (groote Krauft) woat hee nich jerat.
18Kjikj, daut Uag vom Harn es opp dee jerecht, soo am ferchten, opp dee, dee opp siene Jnod hopen, 19om äare Seel vom Doot to raden un dee aum Läwen too erhoolen enne Hungaschnoot.
20Onse Seel luat oppem Harn; onse Help un ons Schilt es hee.
21Dan en am woat ons Hoat sikj freien, wiels wie sienem heiljen Nomen vetrut ha.
22Diene Jnod, Har, es äwa ons, soo aus wie opp die jehopt ha.
Currently Selected:
Psalm 33: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
