Psalm 107
107
1Dankt dän Harn, dan hee es goot, dan siene Jnod blift eewich!
2 Soo sellen de Erleeste vom Harn sajen, dee hee ut de Haunt de Bedrenja erleest haft, 3un dee hee jesaumelt haft ut de Lenda, vom Oosten un vom Wasten, vom Nuaden un vom Mäa.
4See errde omhäa enne Wieste, opp onbekaundem Wajch, see fungen kjeenen Wonuat.
5See wieren hungrich un darschtich, daut veschmacht en an äare Seel.
6Doa schrieejen see toom Harn en äare Bedrenkjnis, un ut äare Noot rad hee an.
7Un hee leid an opp eenem rajchten Wajch, daut see no eenen Wonuat kjeemen.
8See sellen däm Harn danken wäajen siene Jnod un wäajen siene Wundawoakjen aun de Menschenkjinja!
9Dan hee haft de darschtje Seelen saut jemoakt un de hungaje Seel met Goodem erfelt.
10De Bewona de Diestanis un vom Schauten de Doodes, jefasselt en Älent un Iesa:
11Wiels see wadaspanstich jewast wieren jäajen de Wieed Gottes (El) un veacht hauden däm Rot vom Hechsten, 12soo buag hee äa Hoat derch Onheil; see worden schwak, un kjeen Helpa wia doa.
13Donn schrieejen see toom Harn en äare Noot, un ut äare Bedrenkjnis rad hee an.
14Hee fieed an rut ut de Diestanis un däm Schauten de Doodes, un vereet äare Faslen.
15See sellen däm Harn danken wäajen siene Jnod un wäajen siene Wundawoakjen aun de Menschenkjinja!
16Dan hee haft de koppane Däaren vebroaken un de iesane Rijel veschloagen.
17De Noaren lieden wäajen äare Äwaträdunk un wäajen äare Ojjerajchtichkjeit oppem Wajch.
18Äare Seel äakjelt sikj fa jiedre Speise (Äten), un see komen bat aun de Doodespuat.
19Donn schrieejen see toom Harn en äare Noot, un ut äare Bedrenkjnisen rad hee an.
20Hee schekjt sien Wuat un heelt an, un hee rad an ut äare Jräwa.
21See sellen däm Harn danken wäajen siene Jnod un wäajen siene Wundawoakjen aune Menschenkjinja; 22un Dankopfa opfren un met Jubel vetalen siene Doten!
23Dee sikj opp Schäp oppem Mäa bejäwen, opp groote Wota Haundel driewen, 24dise sagen de Woakjen Gottes un siene Wundawoakjen em deepen Mäa:
25Hee sajcht un bestalt eenen Stormwint, dee siene Walle huach drift.
26See foaren enopp nom Himmel, sinkjen deep rauf; daut schmelt enne Noot äare Seel.
27See tomlen un schwanken aus een Bedrunkna, un aul äare Weisheit woat tonuscht.
28Dan schrieen see toom Harn en äare Bedrenkjnis, un hee fieet an rut ut äare Noot (Bedrenkjnis).
29Hee vewaundelt däm Storm un daut woat stell, un daut lajen sikj de Walle.
30Un see freien sikj, daut see sikj berujen, un hee fieet an en däm jewenschtem Howen.
31See sellen däm Harn danken wäajen siene Jnod, un wäajen siene Wundawoakjen aun de Menschenkjinja, 32un am erhäwen enne Vesaumlunk vom Volkj, un en dee Jemeenschoft de Eltestasch am lowen!
33Hee moakt Streem too Wieste un Wotakjwalen too drieejem Launt, 34fruchtboaret Launt too Soltstape wäajen de Boosheit dee doa Wonende.
35Hee moakt too Wotastreem de Wieste un drieejet Launt too Wotakjwalen; 36un hee lat Hungaje doa selfst wonen, un an eene bewonde Staut jrinden.
37Un see beseien Felda un plaunten Wiengoades, dee Frucht brinjen - aus Arnt; 38un hee säajend an, un see vemieeden sikj sea, un äa Vee lat hee nich weinich sennen.
39Un see worden weinja un woaren jeboagen derch Bedrekjung, Onjlekj un Jauma.
40Hee schedd Veachtunk opp Ferschten, un lat an omhäa erren enne Wieste - onen Wajch; 41un hee häft däm Oamen nohecht ut däm Älent, un moaken aus Häaden siene Jeschlajchta.
42De Opprechtje woaren daut seenen un sikj freien, un aule Ojjerajchtichkjeit woat äa Mul veschluten.
43Wäa weis es, dee woat dit beachten, un see woaren de Jnod Gottes vestonen.
Currently Selected:
Psalm 107: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
