Psalm 106
106
1Loft däm Harn!
Dankt däm Harn! Dan hee es goot, dan siene Jnod es eewich.
2Wäa woat utspräakjen de Machtdoten Gottes, hieren loten aul sien Riem?
3Jlekjseelich dee daut Rajcht bewoaren, dee Jerajchtichkjeit eeft too aule Tiet!
4Jedenkj aun mie, Har, met de Gonst jäajen dien Volkj; sieekj mie met dienem Heil, 5daut ekj daut Jlekj diene Uterwälde see, mie frei aun dee Freid met dienem Volkj, mie riem met dienem Oawdeel.
6Wie ha jesindicht met onse Vodasch, ha Orrajcht jedonen, ha jesazloos jehaundelt.
7Onse Vodasch en Ägipten beachten nich diene Wundadoten, dochten nich de Menj diene Jnod un wieren wadaspanstich aum Mäa, biem Schelpmäa.
8Oba hee rad an om sienem Nomen haulwen, om siene Macht weeten to loten.
9Un hee bedreiwd daut Schelpmäa, un daut wort drieech; un hee leet an derch de Deepe {Ps.33,7} gonen aus derch eene Wieste.
10Un hee rad an ut de Haunt de Haussa, un erleesd an ut de Haunt de Fiend.
11Un de Wota bedakjten äare Bedrenja, nich eena von an bleef äwa.
12Doa jleewden see aun siene Wieed, see sungen sien Loff.
13Schwind vegauten see siene Doten, luaden nich opp sienen Rot; 14un see worden lastalich enne Wieste un vesochten Gott (El) enne Wiltnis.
15Doa jeef hee an äa Bejia, oba hee schekjt Schwakheit en äare Seel.
16Un see worden aufjenstich opp Moses em Loaga, opp Aaron, däm heiljen Gottes.
17De Ieed deed sikj op, un veschlukt Datan un bedakjt de Rotte Abiram; 18un een Fia brend unja äare Rotte, eene Flaum vebrend de Gottloose.
19See muaken een Kaulf aum Horeb un bekjten sikj ver eenem jegotnen Bilt; 20un see vetuschte äare Harlichkjeit jäajen daut Bilt von eenem Boll, dee Grauss frat.
21See vegauten Gott, äarem Rada, dee Grootet jedonen haud en Ägipten, 22wundaboare Dinj em Launt Ham, Furchtboaret aum Schelpmäa.
23Doa säd hee, daut hee an vetiljen wull, wan nich Moses, sien Uterwälta, ver am en däm Rät jestonen haud, om sien Oaja vom Vedoawen auftodreien.
24Un see veachten daut kostboare Launt, jleewden sienem Wuat nich; 25un see grunsten en äare Zelten, hieeden nich opp de Stemm Gottes.
26Doa schwua hee an, an doltoschlonen enne Wieste, 27un äaren Somen doltoschlonen unja de Nazionen un an too vestreien enne Lenda.
28Un see hongen sikj aun Baal-Peor un auten Schlachtopfa de Doodes (de doodje Jetta); 29un see veoajade am derch äare Haundlungen, un eene Ploag bruak unja an ut.
30Doa stunt Pinehas opp un eewd Jerecht, un de Ploag hieed opp.
31Un daut wort am to Jerajchtichkjeit jeräakjent von Jeschlajcht too Jeschlajcht bat enne Eewichkjeit.
32Un see veoajade am aun däm Wota von Meriba, un daut jinkj Moses iebel äathaulwen; 33dan see betriebte sienen Jeist, soo daut hee onbedocht räd met siene Leppen.
34See vetiljde de Velkja nich, von dän de Har an jesajcht haud; 35un see vemischte sikj met de Velkja un lieeden äare Woakjen; 36un see deenden äare Jetzen, un see worden an too eene Schlenj.
37Un see opfade äare Säns un äare Dajchta de Demonen, 38un see vegoten onschuldjet Bloot, daut Bloot von äare Säns un äare Dajchta, dee see däm Jetze Kanaan opfaden; un daut Launt wort derch Bloot entheilicht.
39See veonreinijde sikj derch äare Woakjen un huaden derch äare Haundlungen.
40Doa brend de Oaja Gottes jäajen sien Volkj, un hee veaufschud sien Oawgoot; 41un hee jeef an enne Haunt de Nazionen, un äare Haussa harschte äwa an; 42un äare Fiend bedrenjden an, un see worden unja äare Haunt jeboagen.
43Foaken rad hee an; oba see wieren wadaspanstich en äarem Rot, un see sunke han derch äare Ojjerajchtichkjeit.
44Un hee sach äare Bedrenkjnisen aun, wan hee an Schrieen hieed; 45un hee docht aun an en sienem Bunt, un daut deed am leet no de väle Jnod.
46Un hee leet an Erboarmen finjen ver aule, dee an jefangen wajchjefieet hauden.
47Rad ons, Har, ons Gott, un saumel ons ut de Velkja, daut wie dienen heiljen Nomen veharlichen, daut wie ons riemen en dienem Loff!
48Jepriesen (veharlicht) es de Har, de Gott Israels, von Eewichkjeit too Eewichkjeit! Un aulet Volkj saj: Amen! Loft däm Harn!
Currently Selected:
Psalm 106: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
