Spricha 18
18
1Wäa sikj aufsondat, tracht no siene Lost; jäajen aule Ensecht jeit hee haftich aun.
2De Noa haft kjeene Lost aun Vestentnis, sonda blooss doaraun, daut sien Hoat sikj openboat.
3Wan een Gottloosa kjemt, soo kjemt uk Veachtunk; un met de Schaund kjemt Schmach.
4De Wieed ut däm Mul von eenem Maun sent deepe Wota, een sprudelnda Bach, eene Kjwal de Weisheit.
5Daut es nich goot, de Persoon de Gottloose auntokjikjen, om däm Jerajchten em Jerecht too bieejen.
6De Leppen de Noaren jelunge em Striet, un sien Mul roopt no Schläaj.
7Daut Mul de Noaren woat am toom Unjagank, un siene Leppen sent de Faulstrank siena Seel.
8De Wieed de Beleidja sent aus scheenet Schmakjsel, un see drinjen nenn en daut Ennaliche vom Lief.
9Uk wäa sikj schloff erwiest en siene Oabeit, es een Brooda vom Vedoawa.
10De Nomen Gottes es een stoakja Torm; de Jerajchta rant doahan un es en Sechaheit.
11Daut Vemäajen de Rikje es siene fauste Staut, un en siene Ennbillniss aus eene huage Mia.
12Ver däm Toopbräakjen woat däm Maun sien Hoat stolt, un de Iea jeit Deemoot verut.
13Wäa Auntwuat jeft, ea hee aunhieet, däm es et Noaheit un Schaund.
14De Jeist von eenem Maun erdrajcht siene Krankheit; oba een veschloagna Jeist, wäa recht am opp?
15Daut Hoat de Vestendje jewent Erkjantnis, un daut Ua de Weise sieekjt no Erkjantnis.
16Daut Jeschenkj de Menschen moakt am Rum un veschauft am Toogank to de Groote.
17De ieeschta en siene Striedsach haft rajcht; doch sien Näajsta kjemt un forscht am ut.
18Daut Loss schlicht Striedarie un brinjt Majchtje uteenaunda.
19Een Brooda, aun däm maun ontru jehaundelt haft, wadasteit mea aus eene fauste Staut; un Striedarie sent aus de Rijel aun eene Burjch.
20Von de Frucht ut sienem Mul woat daut Ennaliche von eenem Maun saut, vom Jewenst siene Leppen woat hee saut.
21Doot un Läwen sent enne Jewault de Tung, un wäa dee leeft, woat äare Frucht äten.
22Wäa eene Fru jefungen, haft goodet jefungen un haft Wooljefaulen erlangt ver däm Harn.
23De Oama rät beddent, oba de Rikja auntwuat Hoadet.
24Een Maun von väl Frind woat too Grunt gonen; doch daut jeft eenen, dee leeft un aunhenjlich es aus een Brooda.
Currently Selected:
Spricha 18: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
