4. Mose 5
5
Räajlen bie Orreinheit, Ontru sennen un Vedocht opp Ehebruch
1Un de Har räd too Moses un säd: 2Befäl de Kjinja Israel, daut see aule Utsauzje un aule Utflussje un aule dee wäajen eenen Doodjen Veonreinichten ut däm Loaga rutdoonen; 3soo aus Maun aus uk Fru sell jie rutdoonen, ver däm Loaga sell jie dee rutdoonen, doamet see nich äa Loaga veonreinjen, en dee äare Medd ekj won. 4Un de Kjinja Israel deeden soo un deeden an ver däm Loaga rut; soo aus de Har too Moses jesajcht haud, aulsoo deeden de Kjinja Israel.
5Un de Har räd too Moses un säd: 6Räd to de Kjinja Israel: Wan een Maun ooda eene Fru irjent eene menschliche Sind deit, un sikj doamet jäajen Gott vejeit, soo haft dee Seel eene Schult opp sikj jeloden, 7soo saul see äare Sind bekjanen, dee see jedonen haft; un see saul äare volle Schult betolen un saul 1/5-tet Deel doavon doatodoonen un daut däm jäwen, aun däm hee sikj veschuldicht haft. 8Un wan de Maun kjeen Blootfrindschauft haft, om disem de Schult too betolen, soo saul de Schult, dee däm Harn betolt woat, däm Priesta jehieren buta däm Bock de Veseenunk, met waut maun Veseenunk fa am deit.
9Un jiedret Häwopfa von aule heilje Dinj de Kjinja Israel, dee see däm Priesta brinjen, saul am jehieren. 10Jo, am sellen von eenem jiedren heilje Dinj jehieren; wäa däm Priesta waut jeft, saul am jehieren.
11Un de Har räd too Moses un säd: 12Räd to de Kjinja Israel un saj to an: Wan irjent eenem siene Fru sikj vejeit un Ontru jäajen am woat, 13un een Maun licht bie ar, om ar Schwanga too moaken, un daut es ver äarem Maun siene Uagen veheimlicht, un see haft sikj em jeheimen veonreinicht, un daut es kjeen Zeij jäajen ar, un see es nich doabie jejräpen worden; 14un de Jeist de Aufgonst kjemt äwa am, un hee woat iewasichtich opp siene Fru, un see haft sikj veonreinicht; ooda de Jeist de Aufgonst kjemt äwa am, un hee woat iewasichtich opp siene Fru, un see haft sikj nich veonreinicht: 15Soo saul de Maun siene Fru nom Priesta brinjen un äare Opfagow äat haulwen brinjen, 1/10-det Deel Efa Joaschtmäl; hee saul kjeen Eelj doanopp jeeten un kjeen Weiruak doanopp lajen; dan daut es een Iewaopfa un een Jedenkjopfa, daut Ojjerajchtichkjeit em Jedajchnis brinjt. 16Un de Priesta saul ar noda komen loten un ar ver Gott stalen. 17Un de Priesta saul heiljet Wota en eenem ieednem Jefäss nämen; un de Priesta nemt von däm Stoff, dee oppe Flua de Wonunk es, un doo daut em Wota. 18Un de Priesta stal de Fru ver Gott un dakjt däm Kopp vonne Fru op, un lajt opp äare Henj daut Jedenkjopfa; daut es een Speisopfa de Aufgonst; un daut fluchbrinjende Wota de Bettanis saul enne Haunt vom Priesta sennen. 19Un de Priesta saul de Fru beschwieren un to de Fru sajen: Wan kjeen Maun bie die jeläajen haft, un wan du, unja dienem Maun best, un nich en Orreinheit ontru jewast best, soo bliew onen Schoden von disem fluchbrinjendem Wota de Bettanis; 20oba wan du, dienem Maun ontru jewast best un die veonreinicht hast, un een Maun bie die jeschlopen haft buta dienem Maun, - 21soo saul de Priesta de Fru beschwieren met däm Fluchschwua, un de Priesta saul to de Fru sajen: Soo moakt de Har die toom Fluch un toom Schwua en dienem Volkj siene Medd, endäm de Har diene Hoften ennfaule un dien Buck jeschwolle moakt, 22un dit fluchbrinjende Wota kjemt en dienem Ennalichen, om daut de Buck aunschwallt un de Hoften ennjefollen moakt! Un de Fru saul sajen: Amen, Amen! 23Un de Priesta saul disem Fluch en een Buak schriewen un dee en daut Wota de Bettanis utlaschen; 24un hee saul de Fru daut fluchbrinjende Wota de Bettanis drinkjen loten, doamet daut fluchbrinjende Wota en ar too Bettanis kjemt. 25Un de Priesta saul ut de Haunt vonne Fru daut Iewaopfa nämen un daut Speisopfa ver däm Harn häwen un daut nom Aultoa brinjen; 26un de Priesta saul eene Hauntvoll von däm Speisopfa nämen, toom Jedajchnis, un rieekja daut opp däm Aultoa; un nodäm saul hee de Fru vom Wota drinkjen loten. 27Un haft hee ar daut Wota drinkjen loten, soo woat daut passieren, wan see onrein jeworden es un jäajen äarem Maun Ontru jewast, daut et fluchbrinjende Wota en ar enndrinjt un betta woat, un äa Buck woat aunschwalle un äare Hoften toopfaule; un de Fru woat toom Fluch enne Medd von äarem Volkj woaren. 28Oba wan de Fru sikj nich veonreinicht haft un rein es, soo woat see kjeen Schoden doavon droagen un Somen emfangen.
29Daut es daut Jesaz de Aufgonst: Wan eene Fru, äarem Maun ontru es un sikj veonreinicht, 30ooda wan äwa eenem Maun de Jeist de Aufgonst kjemt, un hee woat iewasichtich opp siene Fru, soo saul hee de Fru ver däm Harn stalen, un de Priesta saul ar no disem gaunzen Jesaz doonen. 31Un de Maun woat frie von Schult sennen; oba de Fru saul äare Misdot droagen.
Currently Selected:
4. Mose 5: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
