4. Mose 4
4
Dän Leviten Deenst biem Loaga reedmoaken
1Un de Har räd too Moses un to Aaron un säd: 2Nämt de Zol de Säns Kehat ut de Medd de Säns Levi opp, no äare Famieljes, no äare Vodahiesa, 3von 30 Joa un doaräwa bat 50 Joa, aula, dee toom Kjrichsdeenst gonen, om daut Woakj aum Zelt de Bejäajnunk too verechten.
4Dit es de Deenst de Säns Kehat aum Zelt de Bejäajnunk; aum Aulaheilichsten. 5Un Aaron un siene Säns sellen biem Loaga reedmoaken toom wiedagonen nengonen un däm Väahank raufnämen un de Zeijnislod doamet bedakjen; 6un see sellen eene Dakj von Dacksfal doaräwa spreeden un een Duak, gaunz von blauen Purpur, bowen äwa spreeden un äare Stangen nenn stäakjen. 7Un äwa däm Desch de Aunsechtsbrood sellen see een Duak von blauen Purpur spreeden un doanopp de Kommen un de Wauschkommen un de Krucken un de Kaunen toom Drinkjopfa stalen; un daut bestendje Broot saul doabowen sennen; 8un doaräwa sellen see een Duak von Karmesin spreeden un daut met eene Dakj von Dacksfal bedakjen; un see sellen siene Stangen doanenn doonen. 9Un see sellen een Duak von blauen Purpur nämen un daut Laumpenhoola vom Licht bedakjen un siene Laumpen un siene Dachtschäare un siene Laschknoppes un aul siene Eeljjefässa, met waut maun däm Deenst aun am deit; 10un see sellen am un aul sien Jereetschoft en eene Dakj von Dacksfal doonen un opp däm Droagjestall lajen. 11Un äwa däm goldnen Aultoa sellen see een Duak von blauen Purpur spreeden un am met eene Dakj von Dacksfal bedakjen un siene Stangen doanenn doonen. 12Un see sellen aulet Jereetschoft toom Deenst nämen, met waut maun däm Deenst em Heilichtum deit, un dee en een Duak von blauen Purpur lajen un dee met eene Dakj von Dacksfal bedakjen un opp däm Jestal lajen. 13Un see sellen däm Aultoa von de Fatausch reinjen un een Duak von roodem Purpur äwa am spreeden, 14un doanopp aulet Jereetschoft lajen, met waut maun däm Deenst opp am deit; de Kolepaun un de Gauflen un de Schefflen un de Spretzkommen, aulet Jereetschoft vom Aultoa; un see sellen eene Dakj von Dacksfal doaräwa spreeden un siene Stangen doanenn doonen. 15Un wan Aaron un siene Säns daut Loaga reedjemoakt ha toom wiedagonen, daut Heilichtum bedakjt ha un aulet Jereetschoft vom Heilichtum bedakjt ha, soo sellen de Säns Kehat komen, om daut to droagen, doamet see daut Heilichtum nich aunrieren un stoawen. Daut es et, waut de Säns Kehat vom Zelt de Bejäajnunk too droagen ha.
16Un Eleasar, Aaron sien Sän, de Priesta, haft de Oppsecht äwa daut Eelj toom Licht un daut scheenrikjende Rieekjastoff (Weiruak, seeta Ruak) un daut bestendje Speisopfa un daut Saulweelj, de Oppsecht äwa de gaunze Wonunk un aules, waut doabennen es, äwa daut Heilichtum aus äwa sien Jereetschoft.
17Un de Har räd too Moses un to Aaron un säd: 18Jie sellen däm Staum de Famielje de Kehatita nich utroden loten utte Medd de Leviten; 19sonda dit sell jie an doonen, doamet see läwen un nich stoawen, wan see däm Aulaheilichsten noda komen: Aaron un siene Säns sellen nengonen un an eenen jiedrem siene Oabeit un sienem Deenst un aun siene Droaglaust stalen; 20oba see sellen nich nengonen, daut see uk blooss eenen Uagenblekj daut Heilichtum seenen un stoawen.
21Un de Har räd too Moses un säd: 22Nemm uk de Somm de Säns Gerson opp, no äare Vodahiesa, no äare Famieljes; 23von 30 Joa un doaräwa bat 50 Joa saust du an mostren, aula, dee aune Oabeit gonen, om däm Deenst aum Zelt de Bejäajnunk too verechten. 24Dit es de Deenst de Famielje de Gersonita em Deenst un em Droagen: 25See sellen de Teppiche vonne Wonunk droagen un daut Zelt de Bejäajnunk, siene Dakjen un de Dakjen von Dacksfal, dee bowen äwa sent, un däm Väahank vom Engank vom Zelt de Bejäajnunk, 26un de Väahenjen vom Väahoff un de Väahenj vom Engank aum Doa vom Väahoff, dee runtom de Wonunk un om däm Aultoa es, un äare Strenj, un aulet Jereetschoft toom Deenst; un aules, waut aun an to doonen es, sellen see doonen. 27Nom Befäl von Aaron un siene Säns saul aul äa Deenst, de Säns Gersonita sennen, betrafs aul äare Droaglaust un aul äarem Deenst; un jie sellen an aul dit befälen, waut see too droagen ha. 28Daut es de Deenst de Famielje de Säns de Gersonita aum Zelt de Bejäajnunk; un äa Deenst es unja de Haunt [Oppsecht] Ithamar, Aaron sienem Sän, däm Priesta.
29De Säns Merari no äare Famieljes, no äare Vodahiesa saust du an mostren; 30von 30 Joa un doaräwa bat 50 Joa saust du an mostren, aula, dee aune Oabeit gonen, om däm Deenst aum Zelt de Bejäajnunk to doonen. 31Un dit es et, waut an too droagen oppjelajcht woat, no äarem gaunzen Deenst aum Zelt de Bejäajnunk: De Bräda de Wonunk un äare Rijel un äare Stendasch un äare Feet, 32un de Stendasch vom Väahoff runtom un äare Feet un äare Näajel un äare Strenj, no aul äa Jereetschoft un no aul äarem Deenst; un met Nomen sell jie an daut Jereetschoft enndeelen, daut see too droagen ha. 33Daut es de Deenst de Famielje de Säns Merari, no aul äarem Deenst aum Zelt de Bejäajnunk, unja de Haunt Ithamar, Aaron sienem Sän, däm Priesta.
34Un Moses un Aaron un de Ferschten de Jemeent mostade de Säns de Kehatita no äare Famieljes un no äare Vodahiesa, 35von 30 Joa un doaräwa bat 50 Joa, aula, dee enne Oabeit jinjen toom Deenst aum Zelt de Bejäajnunk. 36Un daut wieren äare Jemostade, no äare Famieljes, 2 750. 37Daut sent de Jemostade de Famieljes de Kehatita, aula, dee aum Zelt de Bejäajnunk deenden, dee Moses un Aaron mostade nom Befäl Gottes derch Moses.
38Un de Jemostade de Säns Gerson, no äare Famieljes un no äare Vodahiesa, 39von 30 Joa un doaräwa bat 50 Joa, aula, dee aune Oabeit jinjen toom Deenst aum Zelt de Bejäajnunk: 40Daut wieren äare Jemostade, no äare Famieljes, no äare Vodahiesa, 2 630. 41Daut sent de Jemostade de Famieljes de Säns Gerson, aula, dee aum Zelt de Bejäajnunk deenden, dee Moses un Aaron mostade nom Befäl Gottes.
42Un de Jemostade de Famieljes de Säns Merari, no äare Famieljes, no äare Vodahiesa, 43von 30 Joa un doaräwa bat 50 Joa, aula, dee aune Oabeit jinjen nom Deenst aum Zelt de Bejäajnunk: 44Daut wieren äare Jemostade, no äare Famieljes, 3 200. 45Daut sent de Jemostade de Famieljes de Säns Merari, dee Moses un Aaron mostade nom Befäl Gottes derch Moses.
46Aule Jemostade, dee Moses un Aaron un de Ferschten Israels mostade, de Leviten no äare Famieljes un no äare Vodahiesa, 47von 30 Joa un doaräwa bat 50 Joa, aula, dee doatoo kjeemen, om däm Deenst de Bedeeninj un de Droaglaust aum Zelt de Bejäajnunk to doonen: 48Äare Jemostade wieren 8 580. 49Nom Befäl Gottes mostad maun an derch Moses, jiedren eensjen too sienem Deenst un no siene Droaglaust; un see worden von am jemostat, aus de Har Moses befoolen haud.
Currently Selected:
4. Mose 4: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
