4. Mose 6
6
Daut Jesaz äwa Aufjesondade (Jeweida, Nazara)
1Un de Har räd too Moses un säd: 2Räd to de Kjinja Israel un saj to an: Wan een Maun ooda eene Fru een besondret Vespräakjen aus Aufjesondada (Jeweida, Nazara) deit, om sikj fa däm Harn too weien (heilje), 3soo saul hee sikj vom Wien un stoakjet Jedrenkj enthoolen; Ädikj von Wien un Ädikj von stoakjet Jedrenkj saul hee nich drinkjen; un kjeen Druwesauft, fresche ooda jedräjde, saul hee nich äten. 4Aule Doag siene Aufsonderung saul hee von aulem, waut de Wienstock brinjt, vonne Kjeena bat de Schal, nich äten. 5Aule Doag von däm Vespräakjen, siene Aufsonderung, saul kjeen Schäamassa äwa sien Haupt gonen; bat de Doag erfelt sent, dee hee sikj fa däm Harn aufsondat, saul hee heilich sennen; hee saul daut Hoa opp sienem Haupt frie waussen loten. 6Aul de Doag, dee hee sikj fa däm Harn aufsondat, saul hee no kjeenem Doodjen komen. 7Wäajen sienem Voda un siene Mutta, wäajen sienem Brooda un siene Sesta, äatshaulwen saul hee sikj nich veonreinjen, wan see stoawen; dan de Aufsonderung fa sienem Gott es opp sienem Haupt. 8Aul de Doag siene Aufsonderung es hee däm Harn heilich. 9Un wan wäa onverhoffs, plazlich, bie am stoaft, un hee daut Haupt siene Aufsonderung veonreinicht, soo saul hee sien Haupt aum Dach siene Reinjunk schäaren; aum säwenden Dach saul hee daut schäaren. 10Un aum achten Dach saul hee twee Turtelduwen ooda twee junge Duwen nom Priesta brinjen nom Engank vom Zelt de Bejäajnunk. 11Un de Priesta saul eene toom Sindopfa un eene toom Brauntopfa opfren, un Veseenunk fa am doawäajen doonen, daut hee sikj aun däm Doodjen vesindicht haft; un hee saul sien Haupt aun däm seljen Dach heilje. 12Un hee saul de Doag siene Aufsonderung nochmol fa däm Harn aufsondren un een eenjoaschet Laum toom Schultopfa brinjen; oba de Doag, verhäa, sent vefolle, dan siene Weie es veonreinicht worden.
13Un dit es daut Nazara Jesaz: Aun däm Dach, aun däm de Doag siene Aufsonderung erfelt sent, saul maun am aum Engank vom Zelt de Bejäajnunk brinjen. 14Un hee saul däm Harn siene Opfagow brinjen; een eenjoaschet Laum onen Fäla toom Brauntopfa, un een eenjoaschet Muttalaum onen Fäla toom Sindopfa; un eenen Bock onen Fäla toom Dankopfa, 15un eenen Korf met Onjesuadem; eene Kuak von fienem Mäl, jemischt met Eelj, un onjesuade Flade, jesaulft met Eelj; met äarem Speisopfa un äarem Drinkjopfa. 16Un de Priesta saul dee ver däm Harn brinjen un sien Sindopfa un sien Brauntopfa opfren. 17Un een Bock saul hee aus Dankopfa däm Harn opfren met däm Korf, däm Onjesuaden; un de Priesta saul sien Speisopfa un sien Drinkjopfa opfren. 18Un de Nazara saul aum Engank vom Zelt de Bejäajnunk daut jeweide Haupt schäaren un daut Hoa von sienem jeweidem Haupt nämen un daut oppem Fia lajen, daut unjrem Dankopfa es. 19Un de Priesta saul de jekoakte Schulla vom Bock un eene onjesuade Kuak un eene onjesuade Flade ut däm Korf nämen un lajcht daut oppem Nazara siene Haunt, nodäm hee sien jeweidet Haupt jeschoaren haft. 20Un de Priesta häw daut aus Häwopfa ver däm Harn; daut es däm Priesta heilich met de Brost vom Wäwopfa un met däm Schinkje vom Häwopfa. Un doano kaun de Nazara Wien drinkjen.
21Daut es daut Jesaz de Nazara, dee een Vespräakjen deit, un daut siene Opfagow däm Harn fa sien Vespräakjen, buta däm, waut siene Haunt brinjen kaun. No sienem Vespräakjen, daut hee jedonen haft, aulsoo saul hee doonen nom Jesaz, sienem Vespräakjen.
De Säajen vom Priesta
22Un de Har räd too Moses un säd: 23Räd too Aaron un to siene Säns un saj: Soo sell jie de Kjinja Israel säajnen; sajcht to an:
24De Har säajent junt un bewoat die! 25De Har lat sien Aunjesecht äwa die schienen un es die jnädich! 26De Har häft sien Aunjesecht äwa die un jeft die Fräd!
27Un soo sellen see mienen Nomen opp de Kjinja Israel lajen, un ekj woa an säajnen.
Currently Selected:
4. Mose 6: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
