4. Mose 35
35
Städa fa de Leviten un de Toofluchtsstäda (Friestäda)
1Un de Har räd too Moses enne Läacht Moab, aum Jordan, Jericho jäajenäwa, un säd: 2Befäl de Kjinja Israel, daut see von äarem Oawgoot de Leviten Städa toom Wonen jäwen; un to de Städa sell jie Weidlaunt om de Städa de Leviten jäwen. 3Un de Städa sellen an toom Wonen, un daut Weidlaunt fa äa Vee un fa äa Hab un Goot un fa aul äare Tieren sennen. 4Un daut Weidlaunt de Städa, dee jie de Leviten jäwen sellen, sellen vonne Stautmia no buten han 1 000 Ellen wiet runtom sennen. 5Un jie sellen butre Staut aune Oostsied 2000 Ellen aufmäten, un aune siedliche Sied 2 000 Ellen, un aun de Wastsied 2 000 Ellen un aune Nuadsied 2000 Ellen, daut de Staut enne Medd es; daut sellen äare Städa sennen. 6Un de Städa, dee jie de Leviten jäwen sellen; 6 Toofluchtsstäda sent daut, dee jie an jäwen sellen, doamet doahan rant, wäa eenen Doot veuasoakt haft; un to dise - doatoo sell jie 42 Städa jäwen. 7Aul de Städa, dee jie de Leviten jäwen sellen, aula toop, sellen daut 48 Städa sennen. 8Un waut de Städa betraft, dee jie von däm Ieejentum de Kjinja Israel jäwen sellen - von däm Staum, dee väl haft, sell jie väl nämen, un von däm, dee weinich haft, sell jie weinich nämen; jiedra Staum saul nom Verhältnis von sienem Oawgoot, daut hee oawen woat, von siene Städa de Leviten jäwen.
9Un de Har räd too Moses un säd: 10Räd to de Kjinja Israel un saj to an: Wan jie äwa däm Jordan en daut Launt Kanaan komen, 11soo sell jie junt Städa utsäkjen: Toofluchtsstäda sellen see fa junt sennen, daut een Dootschlona doahan ranen kaun, dee eenen Mensch ut Veseenen omjebrocht haft. 12Un de Städa sellen junt aus Tooflucht ver de Rechta sennen, daut de Dootschlona nich stoaft, bat hee ver de Jemeent toom Jerecht jestonen haft. 13Un de Städa, dee jie jäwen sellen, sellen 6 Toofluchtsstäda fa junt sennen. 143 Städa sell jie an aun dise Sied vom Jordan jäwen, un 3 Städa sell jie em Launt Kanaan jäwen; Toofluchtsstäda sellen see sennen. 15De Kjinja Israel un däm Framden un däm dee bie junt wont, en äare Medd sellen dise 6 Toofluchtsstäda sennen, daut een jiedra doahan rant, dee eenen Mensch ut Veseenen omjebrocht haft. 16Oba wan hee am met eenem iesanem Jereetschoft jeschloagen haft, daut hee jestorwen es, soo es hee een Merda; de Merda saul jewess omjebrocht woaren. 17Un wan hee am met eenem Steen, däm hee enne Haunt haud, wuaderch maun stoawen kaun, jeschloagen haft, daut hee jestorwen es, soo es hee een Merda; de Merda saul jewess omjebrocht woaren. 18Ooda wan hee am met eenem heltanem Jereetschoft, daut hee enne Haunt haud, wuaderch maun stoawen kaun, jeschloagen haft, daut hee jestorwen es, soo es hee een Merda; de Merda saul jewess omjebrocht woaren. 19De Blootrache eewenda, dee saul däm Merda ombrinjen; wan hee am auntraft, saul hee am ombrinjen. 20Un wan hee am ut Hauss jeschupst ooda met wellens no am jeschmäten haft, daut hee jestorwen es, 21ooda schleit am ut Fientschoft met siene Haunt, daut hee jestorwen es, soo saul dee am jeschloagen haft omjebrocht woaren; hee es een Merda; de Blootrache eewenda saul däm Merda ombrinjen, wan hee am auntraft.
22Oba wan hee tofalich, nich ut Fientschoft, am stat, ooda tofalich irjent een Jereetschoft no am jeschmäten haft, 23ooda, wan hee irjent eenen Steen, doavon maun stoawen kaun, opp am schmitt, soo daut hee stoaft, un haft daut nich jeseenen un hee wia nich sien Fiend, un wull am uk nich Iebel doonen; 24soo saul de Jemeent tweschen am un däm Schläajna un de Blootracha no dise Rajchte rechten; 25un de Jemeent saul däm Dootschlona ute Haunt vom Blootracha raden, un de Jemeent saul am en siene Toofluchtsstaut trigjbrinjen, wuahan hee jerant es; un hee saul doa bliewen bat däm Huagapriesta sienem Doot, däm maun met däm heiljen Eelj jesaulft haud. 26Oba wan de Dootschlona äwa de Jrens von siene Toofluchtsstaut, wuahan hee jerant es, rutjeit, 27un de Blootracha finjt am butre Jrensen von siene Toofluchtsstaut, un de Blootracha brinjt däm Dootschlona om, soo haft hee kjeene Blootschult. 28Dan hee saul en siene Toofluchtsstaut bliewen bat däm Huagapriesta sienem Doot; un nodäm Doot vom Huagapriesta doaf de Dootschlona en sien Ieejendoomslaunt trigjkomen.
29Un dit saul junt eene Rajchtsazunk sennen bie june Jeschlajchta en aul june Wonstäden.
30Jiedra, dee eenen Mensch ombrinjt; opp de utsaje von Zeijen saul maun däm Merda ombrinjen; oba een eensja Zeij kaun nich jäajen eenen Mensch utsaje, daut hee stoaft. 31Un jie sellen kjeen Leesjelt aunnämen fa eenem Merda siene Seel, dee schuldich es too stoawen, sonda hee saul jewess stoawen. 32Jie sellen uk kjeen Leesjelt aunnämen fa däm, dee en siene Toofluchtsstaut jerant es, daut hee ver däm Priesta sienem Doot trigjjeit, om em Launt too wonen. 33Un jie sellen daut Launt nich entheiljen, en däm jie sent; dan daut Bloot, daut entheilicht daut Launt; un fa daut Launt kaun kjeene Veseenunk, wäajen daut Bloot, jedonen woaren, daut doa vegoten wort, buta däm Bloot, dee daut vegoten haft. 34Un du saust nich daut Launt veonreinjen, en däm jie wonen, en dee äare Medd ekj won; dan ekj, de Har, won enne Medd de Kjinja Israel.
Currently Selected:
4. Mose 35: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
