4. Mose 36
36
Daut Jesaz äwa de Dajchta äa Oawdeel
1Un daut kaumen Heipta von de Jeschlajchtvodasch de Säns Gilead, vom Sän Makir, däm Sän Manasse, von Josef siene Säns äare Jeschlajchta; un see räden ver Moses un ver de Ferschten, de Bowaschte de Vodasch de Kjinja Israel, 2un säden: De Har haft mienem Harn befoolen, de Kjinja Israel daut Launt derch een Loss aus Oawgoot to jäwen; un mienem Harn es von däm Harn befoolen worden, daut Oawdeel Zelofchad, von onsem Brooda, siene Dajchta to jäwen. 3Oba woaren see eenem aundren Sän siene Fru, ut eenem aundren Staum de Kjinja Israel, soo woat äa Oawdeel däm Oawdeel onse Vodasch aufjetrocken, un toom Staumesoawdeel doatoo jedonen woaren, däm see aunjehieren woaren; un däm Loss von onsem Oawdeel woat daut enthoolen woaren. 4Un uk wan daut Jubeljoa de Kjinja Israel kjemt, woat äa Oawdeel vom Staum doatoo jeräakjent woaren, däm see aunjehieren woaren; un äa Oawdeel woat däm Oawdeel däm Staum onse Vodasch aufjetrocken woaren.
5Doa befool Moses de Kjinja Israel, nom Befäl Gottes, un säd: De Staum de Kjinja Josef räden rajcht. 6Dit es daut Wuat, daut de Har betrafs de Dajchta Zelofchad befoolen haud, endäm hee säd: See muchten däm, dee en äare Uagen goot es, too Frues woaren; blooss sellen see eenem ut däm Jeschlajcht vom Staum de Vodasch too Frues woaren, 7doamet nich een Oawdeel vom Staum nom Staum äwajeit; dan de Kjinja Israel sellen een jiedra dän Oawdeel vom Staum siene Vodasch aunhenjen. 8Un jiedre Dochta, dee een Oawdeel ut däm Staum de Kjinja Israel haft, saul eenem ut däm Jeschlajcht von äarem Vodastaum to Fru woaren, doamet de Kjinja Israel een jiedra daut Oawdeel siene Vodasch helt, 9un nich een Oawdeel von eenem Staum opp eenem aundren Staum äwajeit. Dan de Stam de Kjinja Israel sellen een jiedra sienem Oawdeel aunhenjen.
10Soo aus de Har däm Moses befoolen haud, aulsoo deeden de Dajchta Zelofchad. 11Un Machla, Tirza un Chogla un Milka un Noa, de Dajchta Zelofchad, worden de Säns äare Vadasch too Frues. 12Mana ut de Jeschlajchta de Kjinja Manasse, von Josef siene Säns, worden see too Frues. Un soo bleef äa Oawdeel bie äarem Staum däm Jeschlajcht äare Vodasch. 13Daut sent de Jebooten un de Rajchte, dee de Har enne Läacht Moab, aum Jordan, Jericho jäajenäwa, de Kjinja Israel derch Moses befoolen haud.
Currently Selected:
4. Mose 36: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
