4. Mose 34
34
Jrensen un Aufdeelinj vom Launt Kanaan
1Un de Har räd too Moses un säd: 2Befäl de Kjinja Israel un saj to an: Wan jie en daut Launt Kanaan komen, soo es dit daut Launt, daut junt aus Oawgoot toofaule saul: Daut Launt Kanaan no siene Jrensen.
3De siedlicha Raunt saul junt de Wieste Zin sennen, Edom delenjd, un de siedliche Jrens saul junt vom Enj aum Soltmäa jäajen Oosten sennen. 4Un de Jrens saul sikj siedlich von däm Aunboajch Akrabbim un no Zin han dreien, un äa Utgank es siedlich vom Kades-Barnea; un dee jeit no Hazar-Addar han, un jeit äwa no Azmon; 5un de Jrens dreit sikj von Azmon nom Ägipten Bach, un äa Utgank es nom Mäa han.
6Un de Wastjrens; see es uk daut groote Mäa un daut Aunjrensende; daut saul junt de Wastjrens sennen.
7Un dit saul junt de Nuadjrens sennen; vom groote Mäa ut sell jie junt däm Boajch Hor moakjen; 8vom Boajch Hor sell jie de Jrens bat no Hamat trakjen, un de Utgank vonne Jrens es bie Zedad; 9un de Jrens jeit bat no Sifron, un äa Utgank es bie Hazar-Enan. Daut saul junt de Nuadjrens sennen.
10Un dee Oostjrens sell jie junt moakjen von Hazar-Enan no Schefam. 11Un de Jrens jeit rauf von Schefam no Ribla, oostlich von Ajin; un de Jrens jeit rauf un jeit aune Sied vom Mäa Kinnereth [Genezareth] jäajen Oosten; 12un de Jrens jeit aum Jordan rauf, un äa Utgank es aum Soltmäa. Daut saul jun Launt no siene Jrensen runtom sennen.
13Un Moses befool de Kjinja Israel un säd: Daut es daut Launt, daut jie derch een Loss aus Oawgoot kjrieen sellen, daut de Har de 9 Stam un däm haulwen Staum to jäwen befoolen haft. 14Dan de Staum de Kjinja Ruben no äare Vodahiesa, un de Staum de Kjinja Gad no äare Vodahiesa, un de Halft vom Staum Manasse, dee ha äa Oawgoot jekjräajen. 15De 2 Stam un daut haulwe Staum ha äa Oawgoot jekjräajen aun dise sied vom Jordan, Jericho jäajenäwa, jäajen Oosten, jäajen Sonnenoppgank.
16Un de Har räd too Moses un säd: 17Dit sent de Nomes de Mana, dee junt daut Launt aus Oawgoot utdeelen sellen: Eleasar, de Priesta, un Josua, de Sän Nuns. 18Un emma een Ferscht vom Staum sell jie nämen, om daut Launt aus Oawgoot uttodeelen. 19Un dit sent de Nomes de Mana: Fa däm Staum Juda: Kaleb, de Sän von Jefunnes; 20un fa däm Staum de Kjinja Simeon: Samuel, de Sän von Ammihud; 21fa däm Staum Benjamin: Elidad, de Sän von Kislon; 22un fa däm Staum de Kjinja Dan een Ferscht: Bukki, de Sän von Jogli; 23fa Josef siene Säns: Fa däm Staum de Kjinja Manasse een Ferscht: Hanniel, de Sän von Efod, 24un fa däm Staum de Kjinja Efraim een Ferscht: Kemuel, de Sän von Schiftan; 25un fa däm Staum de Kjinja Sebulon een Ferscht: Elizafan, de Sän von Parnak; 26un fa däm Staum de Kjinja Isachar een Ferscht: Paltiel, de Sän von Assan; 27un fa däm Staum de Kjinja Aser een Ferscht: Achihud, de Sän von Schelomit; 28un fa däm Staum de Kjinja Naftali een Ferscht: Pedahel, de Sän von Ammihud. 29Dit sent dee, dee de Har befool, de Kjinja Israel äa Oawgoot em Launt Kanaan uttodeelen.
Currently Selected:
4. Mose 34: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
