4. Mose 32
32
Oostjordan-Launt woat vedeelt aun Ruben, Gad un däm haulwen Staum Manasse
1Un de Kjinja Ruben un de Kjinja Gad hauden väl Vee, eene groote Menj; un see sagen daut Launt Jaser un daut Launt Gilead, un kjikj, daut wia een Launt fa äa Vee. 2Un de Kjinja Gad un de Kjinja Ruben kaumen un räden too Moses un to Eleasar, däm Priesta, un to de Ferschten de Jemeent un säden: 3Atarot un Dibon un Jaser un Nimra un Hesbon un Elale un Sebam un Nebo un Beon, 4daut Launt, daut de Har ver de Jemeent Israels jeschloagen haft, es een Launt fa Vee, un diene Kjnajchts ha Vee. 5Un see säden: Wan wie Jnod en diene Uagen jefungen ha, soo mucht dit Launt diene Kjnajchts toom Ieejentum jejäft woaren; lot ons nich äwa däm Jordan gonen!
6Un Moses säd to de Kjinja Gad un to de Kjinja Ruben: Sellen june Breeda em Kaumf gonen, un jie wellen hia bliewen? 7Un wuarom well jie daut Hoat de Kjinja Israel doavon aufhoolen, en daut Launt doaräwa too gonen, daut de Har an jejäft haft? 8Soo ha june Vodasch jedonen, aus ekj an von Kades-Barnea ut schekjt, daut Launt too bekjikjen: 9See jinjen nopp bat de Läacht Eskol un kjikjten sikj daut Launt aun; un see dreiden daut Hoat de Kjinja Israel auf, daut see nich en daut Launt jinjen, daut de Har an jejäft haud. 10Un de Oaja Gottes flaumd aun janem Dach opp, un hee schwua un säd: 11Wan de Mana, dee ut Ägipten noppjegonen sent, von 20 Joa un doaräwa, daut Launt seenen woaren, daut ekj Abraham un Isaak un Jakob jeschwuaren ha! Dan dee sent mie nich tru nojefolcht; 12butrem Kaleb, Jefunnes sienem Sän, de Kenisita, un Josua, Nuns sien Sän; dan dee sent däm Harn tru nojefolcht. 13Un de Oaja Gottes flaumd jäajen Israel opp, un hee leet an 40 Joa lank enne Wieste omhäa biestre, bat daut gaunze Jeschlajcht oppjeräwen wia, daut enne Uagen Gottes beeset jedonen haud. 14Un kjikj, jie sent oppjestonen aune Städ june Vodasch, een sindjet Mana broodsel, om de Zorngloot Gottes jäajen Israel noch jrata too moaken. 15Wan jie junt von am aufdreien, soo woat hee junt noch lenja enne Wieste loten, un jie woaren dit gaunze Volkj vedoawen.
16Un see kaumen no am un säden: Kjlienvee Hocks [Stalinj] well wie hia fa onse Häaden buen, un Städa fa onse Kjinja; 17oba wie selfst wellen ons schwind reedmoaken ver de Kjinja Israel häa, bat wie an aun äarem Uat jebrocht ha; un onse Kjinja sellen en fauste Städa bliewen ver däm Aunjesecht de Laundesbewona. 18Wie wellen nich no onse Hiesa trigjkomen, bat de Kjinja Israel een jiedra sien Oawgoot jekjräajen haft. 19Dan wie wellen nich met an oawen jansied vom Jordan un wiedahan, dan ons Oawgoot es ons opp dise Sied vom Jordan jäajen Sonnenoppgank tojefollen.
20Doa säd Moses to an: Wan jie dit doonen, wan jie junt ver däm Harn toom Kaumf reedmoakt, 21un aula unja junt, dee reed sent, ver däm Harn äwa däm Jordan too gonen, bat hee siene Fiend ver sikj rut jejoach haft, 22un daut Launt ver däm Harn unjadon es, un jie doano trigjgonen, soo sell jie schultloos jäajen däm Harn sennen un jäajen Israel; un dit Launt saul junt toom Ieejentum ver däm Harn sennen. 23Oba wan jie nich soo doonen woaren, soo ha jie jäajen däm Harn jesindicht; un weet, daut june Sind junt finjen woat. 24But junt Städa fa june Kjinja un Stalinj fa jun Kjlienvee, un doot, waut ut junem Mul jekomen es.
25Un de Kjinja Gad un de Kjinja Ruben räden too Moses un säden: Diene Kjnajchts woaren doonen, soo aus mien Har befält. 26Onse Kjinja, onse Frues, onse Häaden un aul ons Vee sellen doa enne Städa Gilead sennen; 27oba diene Kjnajchts, aule dee reed sent toom Kjrich, woaren ver däm Harn em Kaumf äwagonen, soo aus mien Har räd.
28Un Moses befool äatshaulwen Eleasar, däm Priesta, un Josua, Nuns sienem Sän, un de Heipta vonne Staumvodasch de Kjinja Israel; 29un Moses räd to an: Wan de Kjinja Gad un de Kjinja Ruben, aul dee toom Kaumf reed sent, met junt ver däm Harn äwa däm Jordan gonen, un daut Launt fa junt enjenomen sennen woat, soo sell jie an daut Launt Gilead toom Oawgoot jäwen; 30oba wan see nich reed sent met junt äwatogonen, soo sellen see sikj unja junt em Launt Kanaan aunsiedle. 31Un de Kjinja Gad un de Kjinja Ruben auntwuaden un säden: Aus de Har too diene Kjnajchts jerät haft, soo well wie doonen. 32Wie wellen reed ver däm Harn un daut Launt Kanaan äwagonen, un ons Oawgoot blift ons aun dise Sied vom Jordan.
33Un Moses jeef an, de Kjinja Gad un de Kjinja Ruben un de Halft vom Staum Manasse, Josef sienem Sän, daut Kjennichrikj Sihon, vom Kjennich äwa de Amorita, un daut Kjennichrikj Og, vom Kjennich von Baschan, daut Launt no äare Städa un äare Jrensen, de Städa runtom em Launt. 34Un de Kjinja Gad buden Dibon un Atarot un Aroer, 35un Atarot-Schofan un Jaser un Jogbeha, 36un Bat-Nimra un Bat-Haran, fauste Städa un Kjlienvee Stalinj. 37Un de Kjinja Ruben buden Hesbon un Elale un Kirjatajim, 38un Nebo un Baal-Meon, de Nomen wort jeendat, un Sibma; un see nanden de Städa, dee see buden, met aundre Nomes.
39Un de Säns Makir, vom Sän Manasse, jinjen no Gilead un neemen daut en; un see juagen de Amorita, dee doa wonden, rut. 40Un Moses jeef Gilead däm Makir, däm Sän Manasse; un hee wond doa. 41Un Jair, de Sän Manasse, jinkj han un neem de Darpa en un nand de Darpa Jair. 42Un Nobach jinkj han un neem Kenat un siene Nobastäda en un nand an Nobach no sienem Nomen.
Currently Selected:
4. Mose 32: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
