4. Mose 31
31
Bestrofunk de Midianita
1Un de Har räd too Moses un säd: 2Eew Rach fa de Kjinja Israel aun de Midianita; doano saust du no dienem Volkj vesaumelt woaren. 3Un Moses räd toom Volkj un säd: Moakt von junt Mana reed toom Kjrich, daut see jäajen de Midianita utgonen, om de Rach Gottes aun Midian uttofieren. 4Ut aule Stam Israels 1000, sell jie nom Häa schekjen. 5Un daut worden 1000-de Israels 1000 von jiedrem Staum utjewält; 12 000 dee reed wieren toom Häa. 6Un Moses schekjt an, 1000 von jiedrem Staum, toom Kaumf, an un Pinehas, däm Sän von Eleasar, däm Priesta, nom Häa; un daut heilje Jereetschoft, un de Trompeeten toom Loarm blosen, wieren un siene Haunt. 7Un see streeden jäajen Midian, soo aus de Har däm Moses befoolen haud, un brochten aulet Menliche om. 8Un see brochten de Kjennichs om, met äare dootjeschloagne; Ewi un Rekem un Zur un Hur un Reba, 5 Kjennichs von Midian; un uk Bieleam, Beor sienem Sän, muaken see met daut Schwieet doot. 9Un de Kjinja Israel fieeden de Frues de Midianita un äare Kjinja jefangen wajch, un neemen aul äa Vee un aule Häaden un aul äa Hab un Goot; 10un aul äare Städa, äare Woninj un aul äare Zeltloaga vebrenden see met Fia. 11Un see neemen aulen Raup aun Menschen un aun Vee, 12un brochten de Jefangne un däm Raup no Moses un no Eleasar, däm Priesta, un no de Jemeent de Kjinja Israel em Loaga, enne Läacht Moab, dee aum Jordan Jericho jäajenäwa licht.
13Un Moses un Eleasar, de Priesta, un aule Ferschten de Jemeent jinjen an butrem Loaga entjäajen. 14Un Moses wia oajalich äwa de Hauptmanna vom Häa, de Bowaschte äwa 1000 un de Bowaschte äwa 100, dee vom Kjrich kaumen; 15un Moses säd to an: Ha jie aule Frues aum Läwen jeloten? 16Kjikj, jo, see sent oppem Rot von Bieleam de Kjinja Israel toom Uasoak jeworden en de Sach von Peor, see ha eene Ontru jäajen däm Harn begonen, soo daut de Ploag äwa de Jemeent Gottes kaum. 17Soo brinjt aulet Menliche unja de Kjinja om, un aule Frues, dee met eenem Maun jeschlopen ha; 18oba aule Kjinja, aule Mejales, dee met kjeenem Maun jeschlopen ha, lot fa junt aum läwen. 19Oba jie loagat junt butrem Loaga säwen Doag; een jiedra, dee eenen Mensch omjebrocht haft, un een jiedra, dee eenen Erschloagnen aunjereat haft, jie sellen junt aum dredden Dach entsindje un aum säwenden Dach, jie un june Jefangne. 20Un aule Kjleeda un aulet Jereetschoft von Fal un aules von Kosenhoa un aulet Jereetschoft von Holt sell jie entsindjen.
21Un Eleasar, de Priesta, räd toom Kjrichsvolkj, dee em Kaumf jegonen wieren: Dit es de Sazunk vom Jesaz, daut de Har befoolen haft: 22Blooss daut Golt un daut Selwa, daut Koppa, daut Iesa, daut Zintj un daut Blie, 23aules, waut Fia vedrajcht, sell jie derch daut Fia gonen loten, un daut woat rein sennen; blooss met däm Reinjungswota saul daut entsindicht woaren; un aules, waut daut Fia nich vedrajcht, sell jie derch daut Wota gonen loten. 24Un aum säwenden Dach sell jie june Kjleeda wauschen, un jie woaren rein sennen, un nodäm kje jie em Loaga komen.
25Un de Har räd too Moses un säd: 26Nemm oppe Somm vom wajchjefieeden Raup, aun Menschen un aun Vee, du un Eleasar, de Priesta, un de Heipta de Vodasch de Jemeent; 27un deel däm Raup oppe Halft tweschen dän, dee däm Kjrich jefieet ha, dee em Kjrich jegonen sent, un de gaunze Jemeent. 28Un neem von de Kjrichsmana, dee em Kjrich jegonen sent, een Deel fa däm Harn; eene Seel von 500, von de Menschen un vonne Rinda un vonne Äsel un vom Kjlienvee; 29von äare Halft saust du an nämen, un du saust dee Eleasar, däm Priesta, jäwen aus een Häwopfa fa däm Harn. 30Un von de Halft de Kjinja Israel saust du eent nämen, von 50 een Stekj nämen, von de Menschen, vonne Rinda, vonne Äsel un vom Kjlienvee, von aulem Vee; un du saust daut de Leviten jäwen, dee däm Deenst aune Wonunk Gottes doonen. 31Un Moses un Eleasar, de Priesta, deeden, soo aus de Har Moses befoolen haud. 32Un daut Jeraupte, waut vom Raup äwableef, daut et Kjrichsvolkj jemoakt haud, wia; 675 000 Stekj Kjlienvee, 33un 72 000 Rinda, 34un 61 000 Äsel; 35un waut de Menschenseelen betraft, soo wieren dee Mejales, dee met kjeenem Maun jeschlopen hauden, aula toop 32 000 Seelen. 36Un de Halft, dee äa Aundeel, dee toom Kjrich utjegonen wieren, de Zol vom Kjlienvee wia, 337 500 Stekj; 37un daut Deel vom Kjlienvee fa däm Harn wia 675 Stekj; 38un de Zol de Rinda 36 000, un daut Deel doavon fa däm Harn wia 72; 39un de Äsel 30 500, un daut Deel doavon fa däm Harn wia 61; 40un Menschenseelen 16 000, un daut Deel doavon fa däm Harn 32 Seelen. 41Un Moses jeef daut Deel vom Häwopfa Gottes Eleasar, däm Priesta, soo aus de Har Moses befoolen haud. 42Un von de Halft de Kjinja Israel, dee Moses von dän toom Kjrich utjegonen Mana aufjedeelt haud, 43(de Halft de Jemeent wia; 337 500 Stekj Kjlienvee, 44un Rinda 36 000, 45un Äsel 30 500, 46un Menschenseelen 16 000). 47un vonne Halft de Kjinja Israel neem Moses, eent von 50, von de Menschen un von däm Vee, un jeef daut de Leviten, dee däm Deenst aune Wonunk Gottes deeden; soo aus de Har Moses befoolen haud.
48Un daut kaumen no Moses de Hauptmanna äwa 1 000 vom Häa, de Bowaschte äwa 1 000 un äwa 100, 49un säden to Moses: Diene Kjnajchts ha de Somm de Kjrichsmana oppjenomen, dee unja onse Haunt wieren, un daut fält von ons nich een Maun. 50Un soo brinj wie eene Opfagow fa däm Harn, een jiedra, waut hee aun goldnem Jereetschoft jefungen haft: Oarmrinj un Hauntrinj, Finjarinj, Uarinj un Klaumasch, om fa onse Seelen Veseenunk ver däm Harn to doonen. 51Un Moses un Eleasar, de Priesta, naumen daut Golt von an, aulahaunt goldne Hauntoabeit. 52Un aulet Häwopfa Golt, daut see fa däm Harn hoowen, wia 16 750 Schekel, von de Bowaschte äwa 1 000 un von de Bowaschte äwa 100. 53(Oba de Kjrichslied hauden een jiedra fa sikj jeraupt). 54Un Moses un Eleasar, de Priesta, neemen daut Golt von de Bowaschte äwa 1 000 un äwa 100 un brochten daut em Zelt de Bejäajnunk, aus een Jedajchnis fa de Kjinja Israel ver däm Harn.
Currently Selected:
4. Mose 31: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
