4. Mose 30
30
Veordnungen äwa Vespräakjen un Eitschwieren
1Un Moses räd to de Kjinja Israel no aulem, waut de Har Moses befoolen haud.
2Un Moses räd to de Stamheipta de Kjinja Israel un säd: Dit es daut, waut de Har befoolen haft. 3Wan een Maun däm Harn een Vespräakjen deit, ooda een Eit schwieet, eene Veflichtunk opp siene Seel too nämen, soo saul hee sien Wuat nich bräakjen; no aulem, waut ut sienem Mul väajegonen es, saul hee doonen.
4Un wan eene Fru däm Harn een Vespräakjen deit un sikj veflicht, soolang see noch eene Junkfru en äarem Vodahus es, 5un äa Voda hieet äa Vespräakjen ooda äare Veflichtunk, daut see opp äare Seel jenomen haft, un äa Voda es doatoo stell; soo saul aul äa Vespräakjen bestonen, un jiedre Veflichtunk, dee see opp äare Seel jenomen haft, saul bestonen. 6Oba wan äa Voda aun däm Dach, doa hee daut hieed, ar wäad, soo saul aul äa Vespräakjen un aul äare Veflichtunk, dee see opp äare Seel jenomen haft, nich bestonen; un de Har woat ar vezeien, wiels äa Voda ar daut veboden haft. 7Un wan see eenem Maun siene woat, un äa Vespräakjen es opp ar, ooda een onbedochta utspruch äare Leppen, too waut see äare Seel vebungen haft, 8un äa Maun hieet daut un es stell ar jäajenäwa aun däm Dach, doa hee daut hieed; soo saul äa Vespräakjen bestonen, un äare Veflichtunk, dee see opp äare Seel jenomen haft, sellen bestonen. 9Oba wan äa Maun aun däm Dach, doa hee daut hieet, ar wäat, soo häft hee daut Vespräakjen opp, daut opp ar es, un däm onbedochten utspruch von äare Leppen, met waut see äare Seel vebungen haft; un de Har woat ar vezeien. 10Oba daut Vespräakjen von eene Wätfru un eene Vestade; aules met waut see äare Seel vebungen haft, saul fa ar bestonen.
11Un wan eene Fru en äarem Maun sienem Hus een Vespräakjen ooda een Eit eene Veflichtunk opp äare Seel jenomen haft, 12un äa Maun haft daut jehieet un wia stell, hee haft ar nich jewäat; soo sellen aul äare Vespräakjen bestonen, un jiedre Veflichtunk, dee see opp äare Seel jenomen haft, saul bestonen. 13Oba wan äa Maun aun däm Dach waut oppjehowen haft, aus hee daut hieed, soo saul aules, waut äwa äare Leppen jegonen es aun Vespräakjen un aun Veflichtunk äare Seel, nich bestonen; äa Maun haft daut oppjehowen, un de Har woat ar vezeien. 14Jiedret Vespräakjen un jiedra Eit, om de Seel to deemootjen - äa Maun kaun daut bestädjen, un äa Maun kaun daut opphäwen. 15Un wan äa Maun von Dach too Dach to ar stell es, soo bestädicht hee aul äa Vespräakjen un de Veflichtungen, dee opp ar sent; hee haft dee bestädicht, dan hee wia ar jäajenäwa aun däm Dach stell, doa hee daut hieed. 16Oba wan hee dee opphäft, nodäm hee daut jehieet haft, soo woat hee äare Ojjerajchtichkjeit droagen.
17Daut sent de Sazungen, dee de Har däm Moses befoolen haft, tweschen eenem Maun un siene Fru, tweschen eenem Voda un siene Dochta en äare Jugent, en äarem Vodahus.
Currently Selected:
4. Mose 30: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
