4. Mose 25
25
Jetzendeenst un Bestrofunk vom Volkj – Pinehas sien enstonen fa Gott
1Un Israel bleef en Sittim. Un daut Volkj funk aun too huaren met de Dajchta Moab; 2un dise loden daut Volkj to de Opfa äare Jetta en, un daut Volkj aut un bekjten sikj ver äare Jetta. 3Un Israel henjd sikj aun de Baal-Peor; un de Oaja Gottes flaumd jäajen Israel opp. 4Doa räd de Har too Moses: Nemm aule Heipta vom Volkj un henj an ver Gott (Jahwe) opp enne Sonn, doamet de Zorngloot Gottes sikj von Israel aufdreit. 5Un Moses räd to de Rechta Israels: Brinjt een jiedra siene Lied om, dee sikj aun däm Baal-Peor jehongen ha!
6Un kjikj, een Maun vonne Kjinja Israel kaum un brocht eene Midianitin no sienem Brooda, ver de Uagen Moses un ver de Uagen de gaunze Jemeent de Kjinja Israel, aus dise aun däm Engank vom Zelt de Bejäajnunk hielden. 7Un aus Pinehas, Eleasar sien Sän, von Aaron sienen Sän, däm Priesta, daut sach, doa stunt hee opp ut de Medd de Jemeent un neem een Spies en siene Haunt; 8un hee jinkj däm Israelischen Maun no em Ennalichen vom Zelt un derchstuak an beid, dän Israelischen Maun un de Fru, derch däm Buck. Doa hieed de Ploag von de Kjinja Israel opp. 9Un daut wieren dee aun de Ploag storwen, 24 000.
10Un de Har räd too Moses un säd: 11Pinehas, Eleasar sien Sän, von Aaron sienen Sän, däm Priesta, haft mien Jrim von de Kjinja Israel aufjedreit, endäm hee en mienem Iewa en äare Medd jeiewat haft, soo daut ekj de Kjinja Israel nich en mienem Iewa vetilcht ha. 12Doarom saj: Kjikj, ekj jäw am mienen Frädensbunt; 13un hee woat am un sienem Somen no am een Bunt von eewjen Priestatum sennen, doarom daut hee fa sienen Gott jeiewat un fa de Kjinja Israel Veseenunk jedonen haft.
14Un de Nomen vom erschloagnen Israelischen Maun, dee met de Midianitin dootjeschloagen wort, wia Simri, Salus sien Sän, de Ferscht von eenem Vodahus de Simeonita; 15un de Nomen von de erschloagne midianitische Fru wia Kosbi, Zur siene Dochta; hee wia Staumeshaupt von eenem Vodahus unja de Midianita.
16Un de Har räd too Moses un säd: 17Bedrenjt de Midianita un schlot an; 18dan see ha junt bedrenjt derch äare Lest, met waut see junt äwalest ha en Peor siene Sach un de Sach de Kosbi, de Dochta von eenem Ferscht von Midian, äare Sesta, dee aum Dach de Ploag wäajen Peor dootjeschloagen wort.
19Un daut passieed no de Ploag,
Currently Selected:
4. Mose 25: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
