4. Mose 24
24
Bieleam sien Spruch: De dredda un de vieeda Spruch
1Un aus Bieleam sach, daut et goot wia en de Uagen Gottes, Israel too säajnen, soo jinkj hee nich, aus de aundre Mol, ut opp Woasajen, sonda recht sien Aunjesecht no de Wieste han. 2Un Bieleam hoof sien Aunjesecht un sach Israel, jeloagat no siene Stam; un de Jeist Gottes kaum äwa am. 3Un hee hoof sien Spruch aun un säd: Daut räd Bieleam, Beor sien Sän, un daut räd de Maun, däm de Uagen opjemoakt wieren.
4Doa räd, dee doa hieet de Wieed Gottes, dee daut Jesecht vom Aulmajchtjen sitt, däm de Uagen opjemoakt woaren:
5Woo scheen sent diene Zelten, Jakob, diene Woninj, Israel!
6Aus de Läachten breeden see sikj ut, aus Goades aum Stroom, aus Zippelfieabeem, dee de Har jeplaunt haft, aus Zeeda aum Wota!
7Ut siene Amasch woat Wota ranen, un em groote Wota woat sien Somen sennen; un sien Kjennich woat hecha sennen aus Agag, un sien Kjennichrikj woat erhowen sennen.
8Gott haft am ut Ägipten rutjefieet; siene Krauft es aus een Biffel. Hee woat de Nazionen, siene Fiend, fräten un siene Knoakes vemolen un met siene Feilasch an dolstrakjen.
9Hee bekjt sikj, hee lajcht sikj dol aus een Leiw un aus eene Muttaleiw; wäa well am oppwakjen? Dee die säajnen, sent jesäajent, un dee die vefluchen, sent veflucht!
10Doa flaumd Balak sien Oaja jäajen Bieleam opp, un hee schluach siene Henj toop; un Balak säd to Bieleam: Miene Fiend too vewensche ha ekj die jeroopt, un kjikj, du hast an soogoa jesäajent, nu aul dree Mol ! 11Un nu go aun dienem Uat. Ekj haud jesajcht, ekj well junt die huach ieren; un kjikj, de Har haft die de Iea vewäat. 12Un Bieleam säd to Balak: Ha ekj nich uk too diene Bootschofta, dee du no mie jeschekjt hast, jerät un jesajcht: 13Wan Balak mie sien Hus voll Selwa un Golt jeft, soo kaun ekj nich däm Befäl Gottes äwaträden, om ut mienem ieejnen Hoaten Goodet ooda Beeset to doonen; waut de Har räden woat, daut woa ekj räden? 14Un nu kjikj, ekj go no mienem Volkj. Komm, ekj well die sajen, waut dit Volkj dienem Volkj doonen woat aum Enj de Doag. 15Un hee hoof sien Spruch aun un säd: Daut räd Bieleam, Beor sien Sän, un daut räd de Maun däm de Uagen opjemoakt sent.
16Daut räd, dee doa de Wieed Gottes hieet, un dee de Erkjantnis vom Hechsten haft, dee een Jesecht vom Aulmajchtjen sitt, un däm de Uagen opjemoakt sent:
17Un kaun am seenen, oba nich nu, ekj kjikj opp am, oba nich von dichtbie; daut kjemt een Stiern ut Jakob, un een Zepta erhäft sikj ut Israel un veschleit de Heipta von Moab un veschmatat aule Säns vom Jetimmel.
18Un Edom woat een Ieejentum sennen un Seir een Ieejentum, siene Fiend; un Israel woat Majchtjet doonen.
19Un eena ut Jakob woat harschen, un hee woat ut de Staut de Äwajebläwne vetiljen.
20Un hee sach Amalek un hoof sien Spruch aun un säd:
De Ieeschta de Nazionen wia Amalek, oba sien Latstet woat däm Unjagank vefaule.
21Un hee sach de Kenita un hoof sien Spruch aun un räd:
Faust es diene Wonstäd, un oppem Steen jesat dien Nast; 22doch de Kenita saul vetilcht woaren, bat Assur die jefangen wajchfieet.
23Un hee hoof sien Spruch aun un räd:
Wee! Wäa woat aum Läwen bliewen, sooboolt Gott dit erfelt? 24Un Schäp woaren von Kittim [Zupern] komen un woaren Assur deemutje, un Heber deemutje, un uk hee woat däm Unjagank vefaule.
25Un Bieleam muak sikj opp un jinkj, un kaum aun sienem Uat trigj; un uk Balak jinkj sienen Wajch.
Currently Selected:
4. Mose 24: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
