4. Mose 23
23
Bieleam sien Säajen: De ieeschta un de tweeda Spruch
1Un Bieleam säd to Balak: Bu mie hia 7 Aultoaren, un stal mie hia 7 junge Bolles un säwen Bakj reed. 2Un Balak deed, soo aus Bieleam jesajcht haud; un Balak un Bieleam opfaden eenen jungen Boll un eenen Bock opp jiedrem Aultoa. 3Un Bieleam säd to Balak: Stal die bie dienem Brauntopfa, un ekj well gonen; veleicht woat de Har mie entjäajen komen, un waut hee mie woat seenen loten, daut woa ekj die toweeten loten. Un hee jinkj opp eenen Aunboajch. 4Un Gott kaum Bieleam entjäajen; un disa räd to am: De 7 Aultoaren ha ekj jemoakt un opp jiedrem Aultoa eenen jungen Boll un eenen Bock jeopfat. 5Un de Har läd een Wuat en Bieleam sien Mul un säd: Go no Balak trigj, un soo saust du räden. 6Un hee jinkj no am trigj; un kjikj, hee stunt bie sienem Brauntopfa, hee un aule Ferschten von Moab. 7Doa hoof hee sienen Spruch aun un säd: Ut Aram haft Balak mie hiahäa jefieet, de Kjennich von Moab vonne Boaj vom Oosten: Komm, vefluch mie Jakob; jo, komm, vewensch Israel!
8Woo saul ekj vefluchen, däm Gott nich veflucht, un woo vewensche, däm de Har nich vewenscht haft?
9Dan vonne Boajchspetzen see ekj daut, un vonne Hechten rauf kjikj ekj doanopp; kjikj, een Volkj, daut aufjesondat wont un unja de Nazionen nich jeräakjent woat.
10Wäa kaun däm Stoff von Jakob talen un de Zol no, däm 4 Deel Israels? Miene Seel stoaw däm rajchtschaufnen Doot, un mien Enj es aus äa Enj!
11Doa säd Balak too Bieleam: Waut hast du mie jedonen! Miene Fiend too vewensche ha ekj die holen loten, un kjikj, du hast an soogoa jesäajent! 12Un hee auntwuad un säd: Mott ekj nich doaropp achten, daut to räden, waut de Har en mienem Mul lajcht? 13Un Balak säd to am: Komm doch met mie aun eenem aundren Uat, von wua ut du daut seenen woascht; blooss sien Butaschtet woascht du seenen, un gaunz woascht du daut nich seenen; un vewensch daut mie von doa ut. 14Un hee naum am met nom Flekj de Wajchta, opp de Spetz von Pisga; un hee bud 7 Aultoaren un opfad eenen jungen Boll un eenen Bock opp janem Aultoa. 15Un hee säd to Balak: Stal die hia bie dienem Brauntopfa, un ekj, ekj well doa eene Bejäajnunk sieekjen.
16Un de Har kaum däm Bieleam entjäajen un läd een Wuat en sienem Mul un säd: Go no Balak trigj, un soo saust du räden. 17Un hee kaum no am, un kjikj, hee stunt bie sienem Brauntopfa, un de Ferschten von Moab met am. Un Balak säd to am: Waut haft de Har jerät? 18Doa hoof hee sien Spruch aun un säd:
Sto opp, Balak, un hia! Hea opp mie, Zippor sien Sän!
19Gott es nich een Mensch, daut hee lieejen kaun, noch een Menschensän, daut et am leet deit. Sull hee jerät ha un daut nich doonen, un jerät ha un daut nich hoolen?
20Kjikj, too säajnen ha ekj (däm Oppdrach) jekjräajen; un hee haft jesäajent, un ekj kaun daut nich trigjjenjich moaken.
21Hee sitt kjeene Ojjerajchtichkjeit en Jakob un sitt kjeen Orrajcht en Israel; de Har, sien Gott, es met am, un Jubeljeschrecht aus om eenen Kjennich es unja an.
22Gott haft an ut Ägipten rutjefieet; siene Krauft es aus eenem Biffel siene.
23Dan doa es kjeene Zaubarie jäajen Jakob, un kjeene Woasajerie jäajen Israel. Om dise Tiet woat von Jakob un von Israel jesajcht woaren, waut Gott bewirkjt haft.
24Kjikj, een Volkj: Aus eene Muttaleiw steit daut opp, un aus een Leiw häft sikj daut opp! Daut lajcht sikj nich dol, bat hee däm Raup jefräten un daut Bloot de Jeschloagne jedrunken haft.
25Doa säd Balak too Bieleam: Du saust daut goanich vewensche, un du saust daut nich säajnen. 26Un Bieleam auntwuad un säd to Balak: Ha ekj nich to die jerät un jesajcht: Aules, waut de Har räden woat, daut woa ekj doonen? 27Un Balak räd too Bieleam: Komm doch, ekj well die aun eenem aundren Uat metnämen; veleicht woat daut enne Uagen Gottes rajcht sennen, daut du daut mie von doa ut vewenschst. 28Un Balak naum däm Bieleam met oppe Spetz vom Peor, dee äwa de Wiltnis es. 29Un Bieleam säd to Balak: Bu mie hia 7 Aultoaren, un stal mie hia 7 junge Bolles un säwen Bakj reed. 30Un Balak deed, soo aus Bieleam jesajcht haud; un hee opfad eenen jungen Boll un eenen Bock opp jiedren Aultoa.
Currently Selected:
4. Mose 23: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
