4. Mose 22
22
Balak sien Oppdrach aun Bieleam
1Un de Kjinja Israel jinjen wieda un loagaden sikj enne Läacht Moab, jantsied vom Jordan, Jericho jäajenäwa. 2Un Balak, Zippor sien Sän, sach aules, waut Israel de Amorita jedonen haud. 3Un Moab enjst sikj sea ver däm Volkj, wiels daut groot wia, un daut gruld Moab ver de Kjinja Israel. 4Un Moab säd to de Eltestasch von Midian: Nu woat dis Hupe aules om ons häa oppfräten, aus daut Rind daut Jreene oppe Stap auffrat. Un Balak, Zippor sien Sän, wia too jane Tiet Kjennich von Moab. 5Un hee schekjt Bootschofta no Bieleam, Beor sienem Sän, no Pathor, daut aum Stroom [Efrat] es, en daut Launt siene Volkjskjinja, om am to roopen, un hee leet am sajen: Kjikj, een Volkj es ut Ägipten jekomen; kjikj, daut bedakjt daut gaunze Launt, un daut licht mie jäajenäwa. 6Un nu, komm doch, vefluch mie dit Volkj, dan daut es stoakja aus ekj. Veleicht jelinjt mie daut, daut wie daut schlonen un ekj daut utem Launt vejoag; dan ekj weet, wäm du säajenst, dee es jesäajent, un wäm du vefluchst, dee es veflucht. 7Un de Eltestasch von Moab un de Eltestasch von Midian jinjen met däm Woasaja Loon enne Haunt han. Un see kaumen no Bieleam un räden met am de Wieed von Balak. 8Un hee säd to an: Äwanacht dise Nacht hia, un ekj woa junt Auntwuat brinjen, soo aus de Har to mie räden woat. Un de Ferschten von Moab bleewen bie Bieleam.
9Un Gott kaum no Bieleam un säd: Wäa sent dise Mana? 10Un Bieleam räd too Gott: Balak, Zippor sien Sän, de Kjennich von Moab, haft no mie jeschekjt: 11Kjikj, daut Volkj, daut ut Ägipten jegonen es, daut bedakjt daut gaunze Launt; komm nu, vewensch mie daut, veleicht kaun ekj jäajen an strieden un daut vejoagen. 12Un Gott säd to Bieleam: Du saust nich met an gonen; du saust daut Volkj nich vefluchen, dan daut es jesäajent. 13Un Bieleam stunt Zemorjes opp un säd to Balak siene Ferschten: Got en jun Launt; dan de Har haft sikj jewäat, mie too erlauben, met junt too gonen. 14Un de Ferschten von Moab muaken sikj opp un kaumen no Balak un säden: Bieleam haft sikj jewäat, met ons too gonen.
15Doa schekjt Balak noch eenmol Ferschten, mea un jratre aus jane. 16Un see kaumen no Bieleam un säden to am: Soo sajcht Balak, Zippor sien Sän: Lot die doch nich aufhoolen, no mie too komen; 17dan sea huach well ekj die ieren, un aules, waut du mie sajen woascht, well ekj doonen; soo komm doch, un vewensch mie dit Volkj! 18Un Bieleam auntwuad un säd to de Kjnajchts von Balak: Wan Balak mie sien Hus voll Selwa un Golt jeef, soo kunn ekj nich däm Befäl Gottes, mienem Gott, äwaträden, om Kjlienet ooda Grootet to doonen. 19Un nu blift doch hia, uk jie, dise Nacht, un ekj woa erfoaren, waut de Har wiedahan met mie räden woat. 20Doa kaum Gott de Nacht no Bieleam un säd to am: Wan de Mana jekomen sent, om die to roopen, soo moak die opp, go met an; oba blooss daut, waut ekj die sajen woa, saust du doonen.
Bieleam sien Wajch no Balak
21Un Bieleam muak sikj Zemorjes opp un sodeld siene Äselin un jinkj met de Ferschten von Moab.
22Doa flaumd de Oaja Gottes opp, daut hee hanjinkj; un de Enjel Gottes stald sikj em Wajch, am to wadastonen. Oba hee reet opp siene Äselin, un siene beid Jinjlinje wieren met am. 23Un de Äselin sach däm Enjel Gottes oppem Wajch met sienem jetrocknem Schwieet enne Haunt stonen, un de Äselin buag von Wajch auf un jinkj oppem Flekj; un Bieleam schluach de Äselin, om ar wada oppem Wajch too lenkjen. 24Doa kaum de Enjel Gottes en eene enje Städ tweschen de Wienboaj: Eene Mia wia opp dise, un eene Mia aun jane Sied. 25Un de Äselin sach däm Enjel Gottes un drenjd sikj aune Waunt un drekjt Bieleam sienen Foot aune Waunt; un hee schluach ar noch eenmol. 26Doa jinkj de Enjel Gottes nochmol wieda un jinkj aun eenem enjen Uat, woa kjeen Wajch wia om auftobäaje, noch no rajchtsch noch linkjsch. 27Un aus de Äselin däm Enjel Gottes sach, läd see sikj unja Bieleam han; un daut flaumd de Oaja en Bieleam opp, un hee schluach de Äselin met däm Stock. 28Doa deed de Har daut Mul de Äselin op, un see säd to Bieleam: Waut ha ekj die jedonen, daut du mie dree Mol jeschloagen hast? 29Un Bieleam säd to de Äselin: Wiels du met mie Spott jedräwen hast; wan ekj een Schwieet en miene Haunt haud, soo haud ekj die nu omjebrocht. 30Un de Äselin räd too Bieleam: Sie ekj nich diene Äselin, opp de du aul emma bat opp disem Dach jeräde hast? Wia ekj von jeehäa jewant, die aulsoo to doonen? Un hee säd: Ne.
31Doa muak de Har Bieleam siene Uagen op, un hee sach däm Enjel Gottes oppem Wajch stonen, met sienem jetrocknem Schwieet enne Haunt; un hee bekjt sikj un schmeet sikj opp sien Aunjesecht han. 32Un de Enjel Gottes säd to am: Wuarom hast du diene Äselin dree Mol jeschloagen? Kjikj, ekj sie utjegonen, die too wadastonen, dan de Wajch däm du ver mie jeist fieet die em Vedoawen. 33Un de Äselin sach mie un buag ver mie dree Mol auf; wan see nich ver mie aufjeboagen wia, soo haud ekj die nu omjebrocht, oba ar aum Läwen jeloten. 34Un Bieleam säd toom Enjel Gottes: Ekj ha jesindicht, dan ekj wist nich, daut du mie oppem Wajch entjäajen stundst; un nu, wan daut en diene Uagen Iebel es, soo well ekj trigjdreien. 35Un de Enjel Gottes säd to Bieleam: Go met de Mana; oba blooss daut, waut ekj die sajen woa, saust du räden. Un Bieleam jinkj met Balak siene Ferschten.
36Un aus Balak hieed, daut Bieleam kjemt, doa jinkj hee ut, am entjäajen, no de Staut Ir-Moab, aun de Jrens von Arnon, dee aun de butaschte Jrens licht. 37Un Balak säd to Bieleam: Ha ekj nich no die jeschekjt, om die to roopen? Wuarom best du nich no mie jekomen? Kaun ekj die nich ieren? 38Un Bieleam säd to Balak: Kjikj, ekj sie no die jekomen; kaun ekj nu waut räden? Daut Wuat, daut Gott mie em Mul lajcht, daut woa ekj räden. 39Un Bieleam jinkj met Balak; un see kaumen no Kirjat-Chuzoth. 40Un Balak opfad Rinda un Kjlienvee un schekjt doavon däm Bieleam un de Ferschten, dee bie am wieren.
41Un Zemorjes passieed daut, doa naum Balak däm Bieleam un fieed am nopp no de Hechten von Baal, un hee sach von doa daut butaschte Deel vom Volkj.
Currently Selected:
4. Mose 22: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
