4. Mose 20
20
Mirjam stoaft – Wota ut däm Steen [Fels] – Moses un Aaron twiewlen
1Un de Kjinja Israel, de gaunze Jemeent, kaum enne Wieste Zin, aum ieeschten Moonat; un daut Volkj bleef en Kades; un Mirjam storf doa un wort doa begroft. 2Un daut wia doa kjeen Wota fa de Jemeent, un see vesaumelden sikj jäajen Moses un jäajen Aaron. 3Un daut Volkj zankt met Moses, un see säden: Wia wie doch omjekomen, aus onse Breeda ver däm Harn omkaume! 4Un wuarom ha jie de Vesaumlunk Gottes en dise Wieste jebrocht, daut wie doa stoawen, wie un ons Vee? 5Un wuarom ha jie ons ut Ägipten noppjefieet, om ons aun disem beesen Uat to brinjen? Daut es kjeen Uat doa maun seien kaun, un doa noch Fiejebeem un de Wienstakj un de Grenautapel sent, un kjeen Wota toom drinkjen.
6Un Moses un Aaron jinjen von de Vesaumlunk wajch nom Engank vom Zelt de Bejäajnunk un follen opp äa Aunjesecht; un de Harlichkjeit Gottes erschien an. 7Un de Har räd too Moses un säd: 8Nemm däm Stock un vesaumel de Jemeent, du un dien Brooda Aaron, un räd ver äare Uagen toom Steen [Fels], soo woat hee sien Wota jäwen; un du woascht an Wota ut däm Steen väabrinjen un de Jemeent un daut Vee drenkjen. 9Un Moses neem dän Stock ver däm Harn, soo aus hee am befoolen haud. 10Un Moses un Aaron vesaumelden de Vesaumlunk ver däm Steen; un hee säd to an: Hieet doch, jie Wadaspanstje! Ut disem Steen sell wie junt Wota väabrinjen? 11Un Moses hoof siene Haunt un schluach däm Steen met sienem Stock 2 Mol; doa kaum väl Wota rut, un de Jemeent drunk un äa Vee.
12Doa säd de Har too Moses un to Aaron: Wiels jie mie nich jejleeft ha, mie ver de Uagen de Kjinja Israel too heilje, doawäajen sell jie dise Vesaumlunk nich en daut Launt brinjen, daut ekj an jejäft ha. 13Daut es daut Wota von Meriba, woa de Kjinja Israel met däm Harn zankten, un hee sikj aun an heilijd.
De Edomita loten Israel nich derch äa Laund gonen
14Un Moses schekjt Bootschofta ut Kades aun däm Kjennich von Edom: Soo sajcht dien Brooda Israel: Du weetst aule Mieej, dee ons jetroffen ha; 15onse Vodasch jinjen rauf no Ägipten, un wie ha eene lange Tiet en Ägipten jewont; un de Ägipta behaundelden ons un onse Vodasch iebel. 16Doa schrieech wie to däm Harn, un hee haft onse Stemm jehieet un eenen Enjel jeschekjt un ons ut Ägipten rutjefieet; un kjikj, wie sent en Kades, eene Staut aum butaschten aun diene Jrens. 17Lot ons doch derch dien Launt gonen! Wie wellen nich derch de Felda un derch de Wienboaj gonen un wellen kjeen Wota ut diene Borms drinkjen; opp däm Kjennichswajch well wie gonen un nich Rajchsch noch Linkjsch aufdreie, bat wie derch diene Jrensen sent. 18Oba Edom säd to am: Du saust nich bie mie derchgonen, daut ekj die nich met daut Schwieet entjäajen kom. 19Un de Kjinja Israel säden to am: Opp däm Laundeswajch well wie noppgonen; un wan wie von dienem Wota drinkjen, ekj un mien Vee, soo well ekj däm Pries doaväa betolen; met miene Feet well ekj derchgonen, wieda nuscht. 20Un hee säd: Du saust nich hia derchgonen! Un Edom jinkj ut, am entjäajen, met eenem majchtjem Volkj un met ne stoakje Haunt. 21Un soo wäad sikj Edom, Israel to loten, derch sien Launt too gonen; un Israel buag von am auf.
Aaron stoaft
22Un see jinjen von Kades wajch; un de Kjinja Israel, de gaunze Jemeent, kaum aun däm Boajch Hor. 23Un de Har räd too Moses un Aaron aum Boajch Hor, aune Jrens vom Launt Edom, un säd: 24Aaron saul no sienem Volkj vesaumelt woaren; dan hee saul nich en daut Launt komen, daut ekj de Kjinja Israel jejäft ha, wiels jie jäajen miene Befälen wadaspanstich jewast sent bie däm Wota von Meriba. 25Nemm Aaron un Eleasar, sienem Sän, un lot an noppgonen opp däm Boajch Hor; 26un trakj Aaron siene Kjleeda ut un trakj dee sienem Sän Eleasar aun; un Aaron saul vesaumelt woaren un doa selfst stoawen. 27Un Moses deed, soo aus de Har befoolen haud, un see jinjen oppem Boajch Hor, ver de Uagen de gaunze Jemeent. 28Un Moses trock Aaron de Kjleeda ut un trock dee sienem Sän Eleasar aun; un Aaron storf doa selfst oppe Spetz vom Boajch; un Moses un Eleasar jinjen vom Boajch rauf. 29Un aus de gaunze Jemeent sach, daut Aaron jestorwen wia, doa hield daut gaunze Hus Israel äwa Aaron 30 Doag lank.
Currently Selected:
4. Mose 20: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
