4. Mose 18
18
Deenst un Unjahault de Priesta un Leviten
1Un Gott (Jahwe) räd too Aaron: Du un diene Säns un dien Vodahus met die, jie sellen de Strof (Ojjerajchtichkjeit) vom Heilichtum droagen; jie sellen de Sind von junem Priestatum droagen. 2Un uk diene Breeda, däm Staum Levi, däm Staum von dienem Voda, lot met die nodakomen, daut see sikj die aunschluten un die deenen; oba du un diene Säns met die, jie sellen ver däm Zelt de Bejäajnunk deenen. 3Un see sellen dienen Deenst doonen un däm Deenst aum gaunzen Zelt; blooss daut Jereetschoft vom Heilichtum un däm Aultoa sellen see nich nodakomen, daut see nich stoawen, soo aus see aus uk jie. 4Un see sellen sikj die aunschluten un däm Deenst aum Zelt de Bejäajnunk doonen no aulem Deenst vom Zelt; oba kjeen Framda saul junt nodakomen. 5Un jie sellen däm Deenst von Heilichtum un däm Deenst aum Aultoa doonen, daut kjeen Oaja mea äwa de Kjinja Israel kjemt. 6Un ekj, kjikj, ekj ha june Breeda, de Leviten, ut de Medd de Kjinja Israel jenomen; junt aus Jeschenkj - sent see däm Harn jejäft, om däm Deenst vom Zelt de Bejäajnunk too verechten. 7Oba du un diene Säns met die, jie sellen jun Priestatum doonen, en aulem, waut däm Aultoa betraft un hinjrem Väahank, un soo däm Deenst doonen; aus eenen jeschonknen Deenst jäw ekj junt - daut Priestatum. Oba de Framda, dee doatoo kjemt, saul stoawen.
8Un de Har räd too Aaron: Un ekj, kjikj, ekj ha die däm Deenst, miene Häwopfa jejäft; von aule heilje Dinj de Kjinja Israel ha ekj dee die un diene Säns jejäft, aus Saulwungsdeel, aus een eewjet Rajcht. 9Dit saul die jehieren von däm Huachheiljen, daut nich vebrent woat; aul äare Opfagowen no aul äare Speisopfa un no aul äare Sindopfa un no aul äare Schultopfa, dee see mie brinjen, aus een Huachheiljet saul daut die un diene Säns jehieren. 10Aun eenem huachheiljen Uat saust du daut äten, aulet Menliche saul daut äten; daut saul die heilich sennen. 11Un dit saul die jehieren; de Häwopfa äare Gow, no aule Wäwopfa de Kjinja Israel; die un diene Säns un diene Dajchta met die toom eewjen Rajcht jejäft; jiedra Reina en dienem Hus saul daut äten. 12Aulet Baste vom Eelj un aulet Baste vom jungen Wien un Jeträajd, äa Ieeschtet, daut see däm Harn jäwen. 13De ieeschte Frucht von aulem, waut en äarem Launt waust, dee see däm Harn brinjen, saul die jehieren; jiedra Reina un dienem Hus saul doavon äten. 14Aules Jeweide en Israel saul die jehieren. 15Aules, waut de Muttaschoot derchbrakjt, von aulem Fleesch, daut see däm Harn brinjen, aun Mensch un Vee, saul die jehieren; blooss däm Ieeschtjebuarnen vom Mensch saust du leesen, un daut Ieeschtjebuarne vom orreinen Vee saust du leesen. 16Un dee too Leesende unja an saust du von eenem Moonat aun leesen, no dienem schaze, om 5 Schekel Selwa, nom Schekel vom Heilichtum, dee 20 Gera es. 17Oba de Ieeschtjebuarne vom Rind ooda daut Ieeschtjebuarne vonne Schop ooda daut Ieeschtjebuarne vonne Kose saust du nich leesen; see sent heilich. Äa Bloot saust du aun däm Aultoa spretzen, un äa Fat saust du aus Fiaopfa rieekjren toom leeftoljen Jeroch däm Harn. 18Un äa Fleesch saul die jehieren; aus de Brost vom Wäwopfa un aus de rajchta Schinkje saul daut die jehieren. 19Aule Häwopfa vonne heilje Gow, dee de Kjinja Israel däm Harn opphäwen, ha ekj die jejäft, un diene Säns un diene Dajchta met die, aus een eewjet Rajcht; daut es een eewjet Soltbunt ver däm Harn fa die un fa dienen Somen met die.
20Un de Har räd too Aaron: En äarem Launt saust du nuscht oawen un saust kjeen Deel en äare Medd ha; ekj sie dien Deel un dien Oawgoot enne Medd de Kjinja Israel. 21Un kjikj, de Kjinja Levi ha ekj aulet 10-de en Israel toom Oawgoot fa äarem Deenst jejäft, däm see doonen, däm Deenst aun däm Zelt de Bejäajnunk. 22Un de Kjinja Israel sellen nich mea nom Zelt de Bejäajnunk nodakomen, om Sinden opp sikj too loden, daut see stoawen; 23välmea de Leviten sellen däm Deenst aum Zelt de Bejäajnunk verechten, un see sellen äare Misdot droagen; een eewjet Rajcht bie june Jeschlajchta. Oba see sellen enne Medd de Kjinja Israel kjeen Oawgoot kjrieen. 24Dan dän Tieenden de Kjinja Israel, däm see däm Harn aus Häwopfa häwen; ha ekj de Leviten toom Oawgoot jejäft; doarom ha ekj to an jesajcht, daut see enne Medd de Kjinja Israel kjeen Oawgoot kjrieen sellen.
25Un de Har räd too Moses un säd: 26Un to de Leviten saust du räden un to an sajen: Wan jie von de Kjinja Israel daut 10-de nämen, däm ekj junt von an aus jun Oawgoot jejäft ha, soo sell jie doavon een Häwopfa fa däm Harn häwen, daut 10-de vom 10-den. 27Un jun Häwopfa woat junt aunjeräakjent woaren aus daut Jeträajd vonne Draschdäl un aus de junga Wien von de Wienprass. 28Aulsoo sell uk jie een Häwopfa fa däm Harn häwen von aul junem 10-den, daut jie von de Kjinja Israel nämen, un doavon daut Häwopfa fa däm Harn, Aaron, däm Priesta jäwen. 29Von aulem, waut junt jejäft woat, sell jie däm Harn een Häwopfa jäwen, von aulem Basten daut jeheilichte Deel doavon. 30Un du saust to an sajen: Wan jie daut Baste doavon häwen, soo saul daut de Leviten aunjeräakjent woaren aus eene Arnt de Draschdäl un aus de Arnt de Wienprass. 31Un jie derwen daut äten aun jiedrem Uat, jie un jun Hus; dan daut es jun Loon fa junem Deenst aum Zelt de Bejäajnunk. 32Un jie woaren doawäajen kjeene Sind opp junt loden, wan jie daut Baste doavon häwen, un daut Jeheilichte de Kjinja Israel nich entheiljen un nich stoawen.
Currently Selected:
4. Mose 18: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
