4. Mose 17
17
1Un de Har räd too Moses un säd: 2Saj too Eleasar, Aaron sienem Sän, däm Priesta, daut hee de Rieekjapaunen ut däm Braunt rutnemt; un daut Fia vestreit, dan see sent heilich. 3De Rieekjapaunen von dise Mana, dee jäajen äare Seelen jesindicht ha, - maun moak doavon breet jeschloagnet Blajch, doamet de Aultoa äwatrocken woat; dan see ha dee ver däm Harn jebrocht, un soo sent dee heilich; un dee sellen de Kjinja Israel toom Tieekjen sennen. 4Un Eleasar, de Priesta, neem de koppane Rieekjapaunen, dee de Vebaunte jebrocht hauden, un maun schluach de breet, om däm Aultoa äwatotrakjen, 5aus een Jedajchnis fa de Kjinja Israel, om daut kjeen Framda, dee nich vom Somen Aaron es, doatookjemt, om Rieekjastoff (Weiruak, seeta Ruak) ver däm Harn too rieekjren, un am daut nich soo jeit aus Korah un siene Aunhenja, - soo aus de Har derch Moses to am [Eleasar] jerät haud.
De gaunze Jemeent grunzt (grumsaujt) jäajen Moses un Aaron
6Un de gaunze Jemeent de Kjinja Israel grunsten aum aundren Dach jäajen Moses un Aaron un säden: Jie ha daut Volkj Gottes omjebrocht! 7Un daut passieed, aus de Jemeent sikj jäajen Moses un Aaron vesaumeld, doa dreiden see sikj nom Zelt de Bejäajnunk, un kjikj, de Wolkj bedakjt daut, un de Harlichkjeit Gottes erschien. 8Doa jinjen Moses un Aaron ver däm Zelt de Bejäajnunk. 9Un de Har räd too Moses un säd: 10Trannt junt, got wajch ut de Medd dise Jemeent, un ekj well dee venichten en eenem Uagenblekj! Doa follen see opp äa Aunjesecht. 11Un Moses säd to Aaron: Nemm de Rieekjapaun un doo Fia vom Aultoa doanopp un laj Rieekjastoff (Weiruak, seeta Ruak) nopp, un brinj daut schwind no de Jemeent un doo Veseenunk fa ar; dan de Oaja es vom Harn utjegonen, de Ploag haft aunjefongen. 12Un Aaron neem de Rieekjapaun, soo aus Moses jesajcht haud, un rand medden unja de Vesaumlunk, un kjikj, de Ploag haud em Volkj aunjefongen; un hee läd daut Rieekjastoff (Weiruak, seeta Ruak) nopp un deed Veseenunk fa daut Volkj. 13Un hee stunt tweschen de Doodje un de Läwendje, un de Ploag wort oppjehoolen. 14Un daut wieren dee, dee aun de Ploag storwen, 14 700, buta dee, dee wäajen Korah jestorwen wieren. 15Un Aaron kaum wada no Moses aun däm Engank vom Zelt de Bejäajnunk, aus de Ploag oppjehoolen wia.
Aaron sien Stock lat ut
16Un de Har räd too Moses un säd: 17Räd to de Kjinja Israel un nemm von an eenen Stock fa een Vodahus, von aul äare Ferschten, no äare Vodahiesa, 12 Stakja; du saust däm Nomen von eenem jiedren opp sienen Stock schriewen. 18Un Aaron sienen Nomen saust du opp Levi sienen Stock schriewen; dan een Stock saul fa jiedret Haupt von äarem Vodahus sennen. 19Un du saust dee em Zelt de Bejäajnunk ver däm Zeichnis hanlajen, woa selfst ekj met junt toopkom. 20Un daut woat passieren: Dee Maun, däm ekj erwälen woa, däm sien Stock woat utloten; un soo woa ekj ver mie de Kjinja Israel äa Murren berujen, daut see jäajen junt murren.
21Un Moses räd to de Kjinja Israel, un aul äare Ferschten gauwen am eenen Stock fa eenen Ferscht, no äare Vodahiesa, 12 Stakja; un Aaron sien Stock wia unja äare Stakja. 22Un Moses läd de Stakja ver däm Harn em Zelt de Bejäajnunk han. 23Un daut passieed aum aundren Dach, aus Moses em Zelt de Bejäajnunk nenjinkj, kjikj, doa haud Aaron sien Stock, vom Hus Levi, utjeloten; hee haud Auflajasch un Bloomen jekjräajen un riepe Maundlen. 24Un Moses brocht aul de Stakja rut ver däm Harn no aule Kjinja Israel, un dee sagen dee un neemen een jiedra sienen Stock. 25Un Gott räd too Moses: Brinj Aaron sienen Stock trigj ver daut Zeichnis, om am aus een Tieekjen fa de Wadaspanstje opptobewoaren, soo daut du äa Murren ver mie een Enj moakst, un see nich stoawen. 26Un Moses deed daut; soo aus de Har am befoolen haud, soo deed hee.
27Un de Kjinja Israel räden too Moses un säden: Kjikj, wie vegonen, wie komen om, wie aula komen om! 28Jiedra, dee noda no de Wonunk Gottes kjemt, dee stoaft! Sell wie dan aula omkomen?
Currently Selected:
4. Mose 17: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
