4. Mose 16
16
Opprua un Doot von Korah un siene Aunhenja
1Un Korah, Jizhar sien Sän, vom Sän Kehat, vom Sän Levi, naum Datan un Abiram, de Säns Eliab, un On, Pelet sien Sän, de Säns Ruben, 2un see stunden jäajen Moses opp, met 250 Maun von de Kjinja Israel, Ferschten de Jemeent, Väanämen de Vesaumlunk, Mana von Nomes. 3Un see vesaumelden sikj jäajen Moses un Aaron un säden to an: Jenuach met junt! Dan de gaunze Jemeent, see aula sent heilich, un de Har es en äare Medd! Un wuarom erhäw jie junt äwa de Vesaumlunk Gottes?
4Aus Moses daut hieed, foll hee opp sien Aunjesecht. 5Un hee räd too Korah un to siene gaunze Aunhenja un säd: Morjen, doa woat Gott (Jahwe) to weeten doonen, wäa siena es un wäa heilich es, daut hee am no sikj nodakomen lat; un wäm hee erwält, däm woat hee no sikj komen loten. 6Dit doot: Nämt junt Rieekjapaunen, Korah un siene gaunze Aunhenja, 7un morjen doot Fia doa nenn un lajcht Rieekjastoff (Weiruak, seeta Ruak) doanenn ver däm Harn; un daut saul passieren, dee Maun, däm de Har erwälen woat, dee es de Heilja. Lot daut jenuach sennen, jie Säns Levi! 8Un Moses säd to Korah: Hieet doch, jie Säns Levi! 9Daut es junt too weinich, daut de Gott Israels junt ut de Jemeent Israels utjesondat haft, om junt no sikj nodakomen to loten, doamet jie däm Deenst aun de Wonunk Gottes doonen, un ver de Jemeent stonen, om ar too bedeenen, 10daut hee die un aul diene Breeda, de Säns Levi, met die haft nodakomen loten? Un jie wellen uk daut Priestatum! 11Doarom doo jie junt toop, du un diene gaunze Aunhenja, jäajen däm Harn; dan Aaron, waut es hee, daut jie jäajen am murren?
12Un Moses schekjt han, om Dathan un Abiram, de Säns Eliab, to roopen. Oba see säden: Wie komen nich nopp! 13Es daut to weinich, daut du ons ut eenem Launt, daut von Malkj un Honnich rand, noppjefieet hast, om ons enne Wieste stoawen to loten, daut du die uk soogoa aus Harscha äwa ons stalst? 14Du hast ons en kjeenem Faul en een Launt jebrocht, daut von Malkj un Honnich rand, noch ons Aka un Wienboaj aus Oawgoot jejäft! West du dise Lied de Uagen utrieten? Wie komen nich nopp! 15Doa wort Moses sea oajalich un säd to däm Harn: Drei die nich no äare Opfagow! Nich eenen Äsel ha ekj von an jenomen, un kjeenem eensjen von an een Orrajcht jedonen. 16Un Moses räd too Korah: Du un diene gaunze Aunhenja, jie sellen morjen ver däm Harn komen, du un see un Aaron. 17Un nemt een jiedra siene Rieekjapaun un lajcht Rieekjastoff (Weiruak, seeta Ruak) doanopp, un brinjt een jiedra siene Rieekjapaun doa ver däm Harn, 250 Rieekjapaunen; un du un Aaron, een jiedra siene Rieekjapaun. 18Un see neemen een jiedra siene Rieekjapaun, un läden Rieekjastoff (Weiruak, seeta Ruak) doanopp un deeden Fia doanopp; un see jinjen nom Engank vom Zelt de Bejäajnunk, uk Moses un Aaron. 19Un Korah vesaumeld jäajen an de gaunze Jemeent ver däm Engank vom Zelt de Bejäajnunk. Doa kaum de Harlichkjeit Gottes ver de gaunze Jemeent.
20Un de Har räd too Moses un to Aaron un säd: 21Sondat junt auf - ut de Medd von dise Jemeent, un ekj well an venichten, en eenem Uagenblekj! 22Un see follen opp äa Aunjesecht un säden: Gott, du Gott de Jeista von aulem Fleesch! Een Maun sindicht, un du west die äwa de gaunze Jemeent oajren? 23Un de Har räd too Moses un säd: 24Räd to de Jemeent un saj: Jie, got wajch, runtom, von de Wonunk Korah, Dathan un Abiram.
25Doa stunt Moses opp un jinkj no Dathan un Abiram, un de Eltestasch Israels jinjen hinja am. 26Un hee räd to de Jemeent un säd: Got doch von de Zelten de jesazloose Mana un rieet nuscht aun, waut an jehieet, daut jie nich wajchjeräten woaren en aul äare Sinden! 27Un see jinjen runtom aula wajch von de Woninj Korah, Dathan un Abiram. Un Dathan un Abiram jinjen rut un stunden aum Engank von äare Zelten met äare Frues un äare Säns un äare Kjinja. 28Un Moses säd: Doa aun sell jie erkjanen, daut de Har mie jeschekjt haft, aul dise Woakjen to doonen, daut ekj nich ut mienem Hoaten jehaundelt ha: 29Wan dise stoawen, aus aule Menschen stoawen, un jestroft woaren aus aule Menschen, soo haft de Har mie nich jeschekjt; 30oba wan de Har waut Nieet schauft, un de Ieedboddem sien Mul opmoakt un an veschlinjt met aulem, waut an aunjehieet, un see läwendich en däm Scheol rauffoaren, soo woa jie erkjanen, daut dise Mana däm Harn veacht ha.
31Un daut passieed, aus hee aul dise Wieed utjeräd haud, doa spoold sikj de Ieedboddem, dee unja an wia, 32un de Ieed deed äa Mul op un veschlunk an un äare Famieljes un aule Menschen, dee Korah aunjehieeden, un daut gaunze Hab un Goot. 33Un see fuaren, see un aules, waut an jehieed, läwendich en däm Scheol rauf; un de Ieed bedakjt an, un see worden medden ut de Vesaumlunk vetilcht. 34Un gaunz Israel, daut runtom an wia, rand bie äarem Jeschrecht; dan see säden: Daut de Ieed ons nich veschlinjt! 35Un Fia jinkj vom Harn ut un freet de 250 Mana, dee daut Rieekjastoff (Weiruak, seeta Ruak) jebrocht hauden.
Currently Selected:
4. Mose 16: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
