3. Mose 7
7
Wiedre Bestemmungen äwa daut Schultopfa
1Un dit es daut Jesaz vom Schultopfa; daut es huachheilich. 2Aun däm Uat, woa maun daut Brauntopfa schlacht, saul maun daut Schultopfa schlachten; un sien Bloot saul hee runtom aun däm Aultoa spretzen. 3Un aulet Fat doavon saul hee brinjen [opfren], däm Fatschwauns un daut Fat, daut et Ennaliche bedakjt, 4un de beid Nieren un daut Fat, daut aun an es, daut aun de Lenden es, un daut Nat äwa de Läwa; met de Nieren, daut saul hee auftranen. 5Un de Priesta saul daut oppem Aultoa rieekjren aus een Fiaopfa däm Harn; daut es een Schultopfa. 6Aulet Menliche unja de Priesta saul daut äten; aum heiljen Uat saul daut jejäten woaren; huachheilich es daut. 7Aus daut Sindopfa, soo uk daut Schultopfa; een Jesaz saul fa an sennen. De Priesta, dee doamet Veseenunk deit, am saul daut jehieren.
8Un de Priesta, dee irjent eenem sien Brauntopfa brinjt; am, däm Priesta, saul de Hut vom Brauntopfa jehieren, daut hee jebrocht haft. 9Un aulet Speisopfa, daut em Owen jebackt, un aules, waut em Topp ooda enne Paun reedjemoakt woat; däm Priesta, dee daut jebrocht haft, am saul daut jehieren. 10Un aule Speisopfa, daut met Eelj jemischt ooda drieech es, saul aule Aaron siene Säns jehieren, däm eenen aus däm aundren.
Jesaz vom Dankopfa
11Un dit es daut Dankopfa Jesaz, daut maun däm Harn brinjt: 12Wan maun daut toom Dank brinjt, soo brinj toom Dankopfa onjesuade Kuaken, jemischt met Eelj, un onjesuade Flade, met Eelj jesaulft, un fienet Mäl, ennjereat met Eelj; Kuaken, jemischt met Eelj. 13Met de Kuaken saul maun jesuadet Broot aus Opfagow brinjen, bie sienem Loffdankopfa. 14Un maun saul eent doavon, von de gaunze Opfagow, däm Harn aus Häwopfa brinjen; däm Priesta, dee daut Bloot vom Dankopfa spretst, am saul daut jehieren. 15Un daut Fleesch von sienem Loffdankopfa saul aun däm Dach, wan daut jebrocht woat, jejäten woaren; hee saul doavon nuscht bat Zemorjes ligjen loten. 16Un wan daut Schlachtopfa siene Opfagow een Vespräakjen ooda eene friewelje Gow es, soo saul daut aun däm Dach, doa hee sien Schlachtopfa brinjt, jejäten woaren; un aum aundren Dach saul dan, waut doavon äwablift, jejäten woaren; 17un waut von Schlachtopfa Fleesch bat toom dredden Dach äwablift, saul met Fia vebrent woaren. 18Un wan dannoch von sienem Dankopfa Fleesch aun dredden Dach jejäten woat, soo woat daut nich wooljefaulent sennen; wäa daut jebrocht haft, däm woat daut nich toojeräakjent woaren; een Aufschu woat daut sennen; un dee Seel, dee doavon at, woat äare Ojjerajchtichkjeit droagen. 19Un daut Fleesch, daut irjent waut Orreinet bereat, saul nich jejäten woaren, met Fia saul daut vebrent woaren. Un waut daut Fleesch betraft, jiedra reina doaf daut Fleesch äten; 20oba dee Seel, dee daut Fleesch vom Dankopfa at, daut däm Harn jehieet, un äare Orreinichkjeit es aun ar, dee Seel saul utjerot woaren ut äarem Volkj. 21Un wan eene Seel irjent waut Orreinet aunschieet, de Orreinichkjeit von eenem Mensch ooda een Orreinet Vee ooda irjent een onreinet Wäsent, un see at von däm Dankopfa Fleesch, daut däm Harn jehieet; dee Seel saul utjerot woaren ut äarem Volkj.
Veboden toom Äten es Fat un Bloot
22Un de Har räd too Moses un säd: 23Räd to de Kjinja Israel un saj: Kjeen Fat vom Rindvee un von Schop un Kose sell jie äten. 24Un daut Fat von Os un daut Fat vom Verätnen kaun vebrukt woaren fa aulahaunt Woakj; oba jie sellen daut nich äten. 25Dan jiedra, dee von Vee Fat at, wuavon maun een Fiaopfa däm Harn brinjt - dee Seel, dee daut at, saul ut äarem Volkj utjerot woaren. 26Un kjeen Bloot sell jie en aul june Woninj äten, daut es von Väajel ooda vom Vee. 27Jiedre Seel, dee irjent een Bloot at, saul ut äarem Volkj utjerot woaren.
De Priesta äa Aundeel aum Opfa
28Un de Har räd too Moses un säd: 29Räd to de Kjinja Israel un saj: Wäa sien Dankopfa däm Harn brinjt, saul von sienem Dankopfa siene Opfagow Gott brinjen. 30Siene Henj sellen de Fiaopfa däm Harn brinjen; daut Fat, met de Brost, om dee aus Wäwopfa ver däm Harn too schwinjen (opphäwen). 31Un de Priesta saul daut Fat oppem Aultoa rieekjren, un de Brost saul Aaron un siene Säns jehieren. 32Un däm rajchten Schinkje sell jie aus Häwopfa von june Dankopfa däm Priesta jäwen. 33Wäa von Aaron siene Säns daut Dankopfa Bloot un daut Fat brinjt, däm saul de rajchta Schinkje toojedeelt woaren. 34Dan de Brost vom Wäwopfa un däm Häwopfa Schinkje ha ekj von de Kjinja Israel jenomen, von äare Dankopfa, un ha dee Aaron, däm Priesta, un siene Säns aus eewjet Rajcht vonne Kjinja Israel jejäft. - 35Daut es Aaron siene Saulwunk un daut Saulw-Aundeel siene Säns von de Fiaopfa Gottes, aun däm Dach, aus hee an doatoo komen leet, om däm Harn däm Priestadeenst to doonen, 36daut de Har befoolen haft, an to jäwen vonne Kjinja Israel, aun däm Dach, doa maun an saulwd; eene eewje Sazunk bie äare Jeschlajchta.
37Daut es daut Jesaz vom Brauntopfa, vom Speisopfa un daut Sindopfa un daut Schultopfa un daut Ennweiopfa un daut Dankopfa, 38daut de Har Moses befoolen haft oppem Boajch Sinai, aun däm Dach, doa hee de Kjinja Israel befool, äare Opfagow däm Harn to brinjen, enne Wieste Sinai.
Currently Selected:
3. Mose 7: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
