3. Mose 6
6
Jesaz vom Brauntopfa un Speisopfa
1Un de Har räd too Moses un säd: 2Befäl Aaron un siene Säns un saj: Dit es daut Jesaz vom Brauntopfa. Dit, daut Brauntopfa, saul opp siene Fiastäd sennen, opp däm Aultoa, de gaunze Nacht bat Zemorjes; un daut Fia oppem Aultoa saul doabowen erhoolen woaren. 3Un de Priesta saul sien Lienkjleet auntrakjen, un saul siene Lienbeenkjleeda äwa daut Fleesch auntrakjen; un hee saul de Fatausch raufnämen, daut et Brauntopfafia opp däm Aultoa vebrent haft, un saul dee biem Aultoa schedden. 4Un hee saul siene Kjleeda uttrakjen un aundre Kjleeda auntrakjen un de Fatausch butrem Loaga aun eenem reinem Uat droagen. 5Un daut Fia oppem Aultoa saul opp däm seljen aum brennen erhoolen woaren, daut saul nich utgonen; un de Priesta saul Holt opp am aunstekjen, Morjen fa Morjen, un daut Brauntopfa opp am reed moaken, un de Fatstekja de Dankopfa opp am rieekjren. 6Een bestendjet Fia saul opp däm Aultoa aum brennen erhoolen woaren, daut saul nich utgonen.
7Un dit es daut Speisopfa Jesaz: Eena von Aaron siene Säns saul daut ver däm Harn brinjen, ver däm Aultoa. 8Un hee saul doavon eene Hauntvoll nämen, vom fienen Mäl, vom Speisopfa un von däm Eelj, un aulem Weiruak, dee opp däm Speisopfa es, un daut oppem Aultoa rieekjren; daut es een leeftolja Jeroch, sien Jedajchnis fa däm Harn. 9Un daut Äwaje doavon saul Aaron un siene Säns äten; onjesuat saul daut jejäten woaren aum heiljen Uat; em Väahoff vom Zelt de Bejäajnunk sellen see daut äten. 10Daut saul nich jesuat jebackt woaren; aus äa Aundeel ha ekj an daut jejäft von mienem Fiaopfa; huachheilich es daut, aus daut Sindopfa un aus daut Schultopfa. 11Aulet Menliche unja Aaron siene Kjinja sellen daut äten; een fa eewich Bestemmdet fa aul june Jeschlajchta, von de Fiaopfa Gottes. Aules, waut daut aun rieet, woat heilich sennen.
Enweiunk de Priesta
12Un de Har räd too Moses un säd: 13Dit es de Opfagow von Aaron un siene Säns, daut see däm Harn brinjen sellen aun däm Dach, doa hee jesaulft woat. 1/10 Efa fienet Mäl aus bestendjet Speisopfa, de Halft doavon Zemorjes un de Halft doavon Oppenowent. 14Daut saul enne Paun met Eelj reedjemoakt woaren, ennjereat met Eelj saust du daut brinjen; jebackte Speisopfa Stekja saust du brinjen aus eenen leeftoljen Jeroch däm Harn. 15Un de Priesta, dee unja siene Säns aun siene Städ jesaulft woat, saul daut opfren; eene eewje Sazunk; daut saul däm Harn gaunz jerieekjat woaren. 16Un jiedret Speisopfa von eenem Priesta saul gaunz vebrent woaren; daut saul nich jejäten woaren.
Jesaz vom Sindopfa
17Un de Har räd too Moses un säd: 18Räd too Aaron un siene Säns un saj: Dit es daut Jesaz vom Sindopfa. Aun däm Uat, woa daut Brauntopfa jeschlacht woat, saul daut Sindopfa ver däm Harn jeschlacht woaren; huachheilich es daut. 19De Priesta, dee daut aus Sindopfa opfat, saul daut äten; aum heiljen Uat saul daut jejäten woaren, em Väahoff vom Zelt de Bejäajnunk. 20Aules, waut sien Fleesch aunschieet, woat heilich sennen; un wan von sienem Bloot opp een Kjleet spretst - daut, woa nopp daut spretst, saust du aum heiljen Uat wauschen. 21Un daut ieedne Jefäss, en däm daut jekoakt woat, saul vebroaken woaren, un wan daut en eenem koppanem Jefäss jekoakt woat, soo saul dit jeschieat un met Wota jespeelt woaren. 22Aulet Menliche unja de Priesta sellen daut äten; huachheilich es daut. 23Oba aule Sindopfa, von däm sien Bloot en daut Zelt de Bejäajnunk jebrocht woat, om em Heilichtum Veseenunk to doonen, saul nich jejäten woaren; daut saul met Fia vebrent woaren.
Currently Selected:
3. Mose 6: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
