3. Mose 24
24
Veordnungen äwa de Laumpen un däm Broot
1Un de Har räd too Moses un säd: 2Befäl de Kjinja Israel, daut see die reinet, jestaumtet Eeljboom Eelj brinjen fa de Laump, om emma de Laump auntostekjen. 3Butrem Väahank vom Zeichnis, em Zelt de Bejäajnunk, saul Aaron dee reedmoaken, von Oppenowent bat Zemorjes, emma ver däm Harn; eene eewje Sazunk fa june Jeschlajchta. 4Oppem reinen Laumpenhoola saul hee emma de Laumpen ver däm Harn reedmoaken.
5Un du saust fienet Mäl nämen un doarut 12 Kuaken baken; von twee tieendel saul eene Kuak sennen. 6Un du saust dee en twee Schichte lajen, 6 en eene Schicht, oppem reinen Desch ver däm Harn. 7Un du saust opp jiedre Schicht reinet Weiruak lajen, un hee saul däm Broot toom Jedajchnis sennen, een Fiaopfa däm Harn. 8Sabatdach fa Sabatdach - emma saul daut ver däm Harn jemoakt woaren; een eewja Bunt von de Kjinja Israel. 9Un daut saul Aaron un siene Säns jehieren, un see sellen daut äten aum heiljen Uat; dan aus een Huachheiljet von de Fiaopfa Gottes saul daut am jehieren; eene eewje Sazunk.
Jesaz äwa Gotteslastrunk, Dootschlonen un wäm velazen
10Un de Sän von eene Israelische Fru - oba hee wia de Sän von eenem ägiptischen Maun - jinkj ut unja de Kjinja Israel; un de Sän von de Israelische Fru un een Israelischa Maun streeden sikj em Loaga. 11Un de Sän von de Israelische Fru lastad däm Nomen Gottes un flucht am; un see brochten am no Moses. Oba de Nomen von siene Mutta wia Schelomit, de Dochta Dibris, vom Staum Dan. 12Un see läden am em Jefenkjnis, doamet an nom Mul Gottes jesajcht wort. 13Un de Har räd too Moses un säd: 14Fieet däm Flucha butrem Loaga; un aula, dee daut jehieet ha, sellen äare Henj opp sienem Kopp lajen, un de gaunze Jemeent saul am steenjen. 15Un to de Kjinja Israel saust du räden un sajen: Wan wäa sienen Gott flucht, soo saul hee siene Sinden droagen. 16Un wäa däm Nomen Gottes lastat, saul jewess stoawen, steenjen saul am de gaunze Jemeent; aus de Framda, soo de Einheimischa; wan hee däm Nomen lastat, soo saul hee stoawen.
17Un wan wäa eenen Mensch ombrinjt, soo saul hee jewess stoawen. 18Un wäa een Vee dootschleit, saul daut betolen; Läwen fa Läwen. 19Un wan wäa sienem Näakjsten velazt; soo aus hee jedonen haft, soo saul am jedonen woaren: 20Bruch om Bruch, Uag om Uag, Tän om Tän; aus hee eenen Mensch velazt, soo saul am jedonen woaren. 21Un wäa een Vee dootschleit, saul daut betolen; oba wäa eenen Mensch dootschleit, saul stoawen. 22Een jlikjet Rajcht sell jie ha; aus de Framda, soo saul de Einheimischa sennen; dan ekj sie de Har, jun Gott.
23Un Moses räd to de Kjinja Israel, un see fieeden däm Flucha rut ver däm Loaga un steenijden am; un de Kjinja Israel deeden, aus de Har däm Moses befoolen haud.
Currently Selected:
3. Mose 24: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
