3. Mose 23
23
Gott siene Fasta
1Un de Har räd too Moses un säd: 2Räd to de Kjinja Israel un saj to an: De Faste Gottes, dee jie aus heilje Vesaumlunk utroopen sellen, dit sent miene Faste:
3Sas Doag saul maun oabeiden; oba aum säwenden Dach es Sabatru, eene heilje Vesaumlunk; doa sell jie kjeene Oabeit doonen; daut es een Sabat däm Harn en aul june Wonstäden.
4Daut sent de Faste Gottes, de heilje Vesaumlunk, dee jie utroopen sellen too äare bestemde Tiet: 5Aum 14-den Dach vom ieeschten Moonat, jäajen Owent, es daut Passa däm Harn.
6Un aum 15-den Dach däm seljen Moonat es daut Fast de Onjesuade Brood däm Harn; säwen Doag sell jie onjesuadet äten. 7Aum ieeschten Dach sell jie eene heilje Vesaumlunk haben, kjeene Deenstoabeit sell jie doonen. 8Un jie sellen däm Harn säwen Doag een Fiaopfa brinjen; aum säwenden Dach es eene heilje Vesaumlunk, kjeene Deenstoabeit sell jie doonen.
9Un de Har räd too Moses un säd: 10Räd to de Kjinja Israel un saj to an: Wan jie en daut Launt komen, daut ekj junt jäw, un jie siene Arnt ensaumlen, soo sell jie eene Goaw de Ieeschte von june Arnt nom Priesta brinjen; 11un hee saul de Goaw ver däm Harn schwinjen* (opphäwen) toom Gooden jefaulen fa junt; aum aundren Dach nom Sabat saul ar de Priesta schwinjen*. 12Un jie sellen aun däm Dach, doa jie de Goaw schwinjen*, een Laum opfren, onen Fäla, eenjoasch, toom Brauntopfa däm Harn; 13un sien Speisopfa; twee tieendel fienet Mäl, vemischt met Eelj, een Fiaopfa däm Harn, een leeftolja Jeroch; un sien Drinkjopfa; 1/4-det Deel Hin Wien. 14Un Broot un jereeschte un junge Kjeena sell jie bat disem Dach nich äten, bat jie de Opfagow junem Gott jebrocht ha; eene eewje Sazunk fa june Jeschlajchta en aul june wonstäde.
15Un jie sellen talen vom aundren Dach nom Sabat, von däm Dach, doa jie de Webgoaw jebrocht ha; daut sellen 7 vollen Wäakj sennen. 16Bat toom aundren Dach nom säwenden Sabat sell jie 50 Doag talen; un jie sellen däm Harn een nieet Speisopfa brinjen. 17Ut june Woninj sell jie Webbrood brinjen, twee von twee tieendel fienem Mäl sellen de sennen, jesuat sellen see jebackt woaren, aus Ieeschte däm Harn. 18Un jie sellen toom Broot säwen eenjoasche Lama onen Fäla brinjen, un eenen jungen Boll un twee Bakj; (see sellen een Brauntopfa däm Harn sennen); un äa Speisopfa un äa Drinkjopfa; een Fiaopfa leeftolja Jeroch däm Harn. 19Un jie sellen eenen Kosenbock toom Sindopfa opfren un twee eenjoasche Lama toom Dankopfa. 20Un de Priesta saul dee schwinjen* met däm Ieeschten Broot aus Wäwopfa ver däm Harn, met dee twee Lama; see sellen däm Harn heilich sennen un däm Priesta jehieren. 21Un jie sellen aun disem seljen Dach utroopen, eene heilje Vesaumlunk saul junt daut sennen; kjeene Deenstoabeit sell jie doonen; eene eewje Sazunk en aul june Wonstäden fa aul june Jeschlajchta.
22Un wan jie de Arnt von junem Launt ennbrinjen, saust du däm Raunt von dienem Flekj nich gaunz aufarnte, un saust kjeene noläsen no diene Arnt hoolen; fa däm Oamen un fa däm Framden saust du dee loten. Ekj sie de HAR, jun Gott.
23Un de Har räd too Moses un säd: 24Räd to de Kjinja Israel un saj: Aum säwenden Moonat, aum ieeschten em Moonat, sell jie Ruen, een Jedajchnis Dach vom Poosauneklang, eene heilje Vesaumlunk. 25Kjeene Deenstoabeit sell jie doonen, un jie sellen däm Harn een Fiaopfa brinjen.
26Un de Har räd too Moses un säd: 27Doch aum 10-den en disem säwenden Moonat es de Veseenungsdach; eene heilje Vesaumlunk sell jie haben, un jie sellen june Seelen deemutje, un sellen däm Harn een Fiaopfa brinjen. 28Un kjeene Oabeit sell jie aun disem Dach doonen; dan daut es de Veseenungsdach, om Veseenunk fa junt ver däm Harn to doonen, junem Gott. 29Dan jiedre Seel, dee sikj aun disem Dach nich deemooticht, dee saul ut äarem Volkj utjerot woaren; 30un jiedre Seel, dee aun disem Dach eene Oabeit deit, dee woa ekj ute Medd von äarem Volkj vetiljen. 31Kjeene Oabeit sell jie doonen. Eene eewje Sazunk fa june Jeschlajchta en aul june Wonstäden. 32Eene Sabatru saul hee fa junt sennen, un jie sellen june Seelen deemutje; aum näajenden em Moonat, Oppenowent, vom Owent bat aum Owent sell jie junem Sabat hoolen.
33Un de Har räd too Moses un säd: 34Räd to de Kjinja Israel un saj: Aum 15-den Dach en disem säwenden Moonat es daut Loofzeltfast säwen Doag däm Harn. 35Aum ieeschten Dach saul eene heilje Vesaumlunk sennen, kjeene Deenstoabeit sell jie doonen. 36Säwen Doag sell jie däm Harn een Fiaopfa brinjen; aum achten Dach sell jie eene heilje Vesaumlunk haben, un jie sellen däm Harn een Fiaopfa brinjen; daut es eene Fast-Vesaumlunk, kjeene Deenstoabeit sell jie doonen.
37Daut sent de Faste Gottes, dee jie aus heilje Vesaumlunk utroopen sellen, om däm Harn Fiaopfa to brinjen, Brauntopfa un Speisopfa, Schlachtopfa un Drinkjopfa, een jiedret aun sienem Dach; 38butre Sabaten Gottes un buta june Gowen un buta aul jun Vespräakjen un buta aul june friewelje Gowen, dee jie däm Harn jäwen. 39Doch aum 15-den Dach em säwenden Moonat, wan jie de Laundesarnte enjesaumelt ha, sell jie daut Fast Gottes hoolen, säwen Doag lank; aum ieeschten Dach saul Ru sennen, un aum 8 Dach saul Ru sennen. 40Un jie sellen aum ieeschten Dach Frichte von scheene Beem nämen, Palmasta un Asta von dicht blädaje Beem un von Bachwiede, un sellen junt säwen Doag lank freien ver däm Harn, junem Gott. 41Un jie sellen daut säwen Doag em Joa aus Fast däm Harn hoolen; eene eewje Sazunk fa aul june Jeschlajchta; aum säwenden Moonat sell jie daut fieren. 42En Loofzelte sell jie säwen Doag wonen; aule Einheimische en Israel sellen en Loofzelte wonen; 43om daut june Jeschlajchta weeten, daut ekj de Kjinja Israel en Loofzelte ha wonen loten, aus ekj an ut däm Ägiptenlaunt rutfieed. Ekj sie de HAR, jun Gott. - 44Un Moses vekjindijd de Kjinja Israel de Faste Gottes.
Currently Selected:
3. Mose 23: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
