3. Mose 22
22
Veordnungen äwa daut Äten de Opfa
1Un de Har räd too Moses un säd: 2Räd too Aaron un to siene Säns, daut see sikj enthoolen von de heilje Dinj de Kjinja Israel, dee see mie heilje, un mienen heiljen Nomen nich entheiljen. Ekj sie de HAR. 3Saj to an: Wäa von junem Somen, bie june Jeschlajchta, dee no dee heilje Dinj nodakjeemt, dee de Kjinja Israel däm Harn heilje, un siene Orreinichkjeit es aun am, dee Seel saul utjerot woaren - wajch von mienem Aunjesecht. Ekj sie de HAR. 4Jiedra Mensch vom Somen Aaron, dee utsauzich ooda utflussig es, saul nich von de heilje Dinj äten, bat hee rein es. Un wan wäa eenen aunschieet, dee derch eenen Doodjen veonreinicht es, ooda wäm, däm de Somen aufjeit; 5ooda wäa een krupendet Tia aunschieet, derch daut hee onrein woat, ooda eenen Mensch, derch däm hee onrein woat - no irjent eene Orreinichkjeit, dee hee haft: 6Eena, dee soowaut aunschieet, dee woat bat Oppenowent onrein sennen; un hee saul nich von de heilje Dinj äten, sonda saul sien Fleesch em Wota boden; 7un es de Sonn unjajegonen, soo es hee rein; un nodäm doaf hee von de heilje Dinj äten, dan daut es sien Broot. 8Os un Verätnet saul hee nich äten, daut hee sikj doaderch veonreinicht. Ekj sie de HAR. 9Un see sellen miene Väaschreften hoolen, doamet see nich doawäajen Sinden opp sikj loden un doaderch stoawen, wiels see daut entheiljen. Ekj sie de HAR, dee an heilicht.
10Un kjeen Framda saul Heiljet äten; de Biewona un de Doagesleena von eenem Priesta sellen nich vom Heiljen äten. 11Oba wan de Priesta eene Seel fa Jelt kjaft, soo doaf dise doavon äten; un siene em Hus jebuarne, see kjennen von sienem Broot äten. 12Un wan de Dochta von eenem Priesta de Fru von eenem framden Maun woat, soo saul see nich von däm Häwopfa de Heilje Dinj äten. 13Un wan de Dochta von eenem Priesta Wätfru ooda eene Vestade woat, un kjeene Kjinja haft un en äa Vodahus trigjkjeemt, aus en äare Jugent, soo doaf see von äarem Voda sienem Broot äten. Oba kjeen Framda saul doavon äten. 14Un wan wäa ut Veseenen Heiljet at, soo saul hee daut 5 Deel doavon doatodoonen un däm Priesta daut Heilje jäwen. 15Un maun saul de heilje Gowen de Kjinja Israel nich entheiljen, dee see däm Harn opfren, 16un an, soo de Misdot un eene Schult opplajen, wan see äare heilje Gowen äten; dan ekj sie de Har, dee an heilicht.
17Un de Har räd too Moses un säd: 18Räd too Aaron un siene Säns un to aule Kjinja Israel un saj to an: Jiedra Mensch vom Hus Israel un von de Framde en Israel, dee siene Opfagow brinjt, no aul äarem Vespräakjen un no aul äare friewelje Gowen, dee see däm Harn aus Brauntopfa brinjen, - 19toom Gooden jefaulen fa junt saul daut sennen, onen Fäla, menlich, vonne Rinda, vonne Schop ooda vonne Kose. 20Aules, waut Fälahauft es, sell jie nich brinjen, dan daut woat nich toom Gooden jefaulen fa junt sennen. 21Un wan wäa däm Harn een Dankopfa brinjen well, om eene Vespräakjunk too erfellen, ooda aus friewelje Gow vom Rind- ooda Kjlienvee; onen Fäla saul daut sennen, toom Gooden jefaulen; nuscht Fälahauftet saul aun am sennen. 22Een blinjet ooda kjrenkjlichet ooda vewundet ooda eent, daut Schwäaren ooda de Gnauts ooda de Schorf haft, dise sell jie däm Harn nich brinjen, un sellen däm Harn kjeene Fiaopfa doavon, opp däm Aultoa, brinjen. 23Un een Rind- ooda Kjlienvee, aun däm een Jlett too lank ooda too kort es, daut doafst du aus friewelje Gow opfren; oba to eenem Vespräakjen woat daut nich aunjenäm sennen. 24Un däm de Jemajchta [Maunschoftsneare] vekjwatscht ooda veschloagen ooda utjeräten ooda rut jeschnäden sent, sell jie däm Harn nich brinjen; un en junem Launt sell jie soowaut nich doonen. 25Un ut de Haunt von eenem Framden sell jie daut Broot junem Gott, von aul disem nich brinjen; dan äa Vedoawen es aun an, een Fäla es aun an; see woaren nich goot jefaulent fa junt sennen.
26Un de Har räd too Moses un säd: 27Wan een Rind ooda een Schop ooda eene Kos jebuaren woat, soo saul daut säwen Doag bie siene Mutta sennen; un vom achten Dach aun un wiedahan woat daut aunjenäm, to eene Opfagow, fa een Fiaopfa däm Harn sennen. - 28Un een Rind- ooda Kjlienvee, daut selfst un sien Junget, sell jie nich schlachten aun eenem Dach. 29Un wan jie däm Harn een Dankopfa opfren, soo sell jie daut toom Gooden jefaulen fa junt opfren: 30Aun däm seljen Dach saul daut jejäten woaren; jie sellen nuscht doavon bat Zemorjes äwaloten. Ekj sie de HAR. 31Un jie sellen miene Jebooten hoolen un dee doonen. Ekj sie de HAR. 32Un jie sellen mienem heiljen Nomen nich entheiljen, doamet ekj jeheilicht woa enne Medd de Kjinja Israel. 33Ekj sie de HAR, dee junt heilicht, dee junt ut däm Ägiptenlaunt rutjefieet haft, om jun Gott to sennen. Ekj sie de HAR.
Currently Selected:
3. Mose 22: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
