3. Mose 18
18
Veordnunk fa de Ehe un Reinheit
1Un de Har räd too Moses un säd: 2Räd to de Kjinja Israel un saj to an: Ekj sie de HAR, jun Gott. 3Jie sellen nich doonen, aus maun em Ägiptenlaunt deit, en däm jie jewont ha, sell jie nich doonen; un nom doonen em Launt Kanaan, wuahan ekj junt brinj, sell jie nich doonen; un en äare Sazungen sell jie nich waundlen. 4Miene Rajchte sell jie doonen un miene Sazungen sell jie hoolen, daut jie en dee waundlen. Ekj sie de HAR, jun Gott. 5Un miene Sazungen un miene Rajchte sell jie hoolen, derch dee de Mensch, wan hee dee deit, läwen woat. Ekj sie de HAR.
6Kjeen Mensch saul sikj irjent eenem sien Blootfrindschauft nodakomen, om äare Schomp optodakjen. Ekj sie de HAR. 7De Schomp von dienem Voda un de Schomp von diene Mutta saust du nich opdakjen; see es diene Mutta, du saust äare Schomp nich opdakjen; 8de Schomp von dienem Voda siene Fru saust du nich opdakjen; daut es de Schomp von dienem Voda. 9De Schomp von diene Sesta, de Dochta von dienem Voda, ooda de Dochta von diene Mutta, tus jebuaren ooda buten jebuaren, – äare Schomp saust du nich opdakjen. 10De Schomp de Dochta von dienem Sän ooda de Dochta von diene Dochta – äare Schomp saust du nich opdakjen, dan daut es diene Schomp. 11De Schomp de Dochta von dienem Voda siene Fru, von dienem Voda jebuaren, – see es diene Sesta, äare Schomp saust du nich opdakjen. 12De Schomp de Sesta von dienem Voda saust du nich opdakjen; dan see es Blootfrindschauft von dienem Voda. 13De Schomp de Sesta von diene Mutta saust du nich opdakjen, dan see es Blootfrindschauft von diene Mutta. 14De Schomp vom Voda sienem Brooda saust du nich opdakjen; du saust nich no siene Fru gonen, dan see es diene Taunte. 15De Schomp von diene Schwiadochta saust du nich opdakjen; see es de Fru von dienem Sän, äare Schomp saust du nich opdakjen. 16De Schomp vom Brooda siene Fru saust du nich opdakjen; daut es de Schomp von dienem Brooda. 17De Schomp von eene Fru un äare Dochta saust du nich opdakjen; de Dochta von äarem Sän un de Dochta von äare Dochta saust du nich nämen, om äare Schomp optodakjen; see sent Blootfrindschauft; daut es eene Schaunddot. 18Un du saust nich eene Fru too äare Sesta nämen, ar aufjenstich tomoaken, endäm du äa Schomp opdakjst, bie äarem Läwen.
19Du saust nich no de Fru gonen, wan see Moonatfluss haft, om äare Schomp optodakjen.
20Un bie de Fru von dienem Näakjsten saust du nich ligjen, uk nich dien Somen [om daut see nich schwanga woat], daut du derch ar onrein woascht.
21Un von diene Kjinja saust du kjeent hanjäwen, om däm Moloch derch daut Fia gonen to loten, un du saust däm Nomen Gottes, dienem Gott, nich entheiljen. Ekj sie de HAR.
22Un bie eenem Maun saust du nich ligjen, aus maun bie eene Fru licht; daut es een Aufschu. 18, 23Un bie eenem Vee saust du nich ligjen, soo daut du die aun am veonreinichst; un eene Fru saul sikj nich ver eenem Vee hanstalen, om met am to schaufen to haben; daut es eene schentelje Schaunddot.
24Veonreinicht junt nich derch aul dit; dan derch aul dit ha de Nazionen sikj veonreinicht, dee ekj ver junt vejoag. 25Un daut Launt wort veonreinicht, un ekj sieekj siene Ojjerajchtichkjeit too bestrofen, un daut Launt spieech siene Bewona ut. 26Oba jie, jie sellen miene Sazungen un miene Rajchte hoolen, un jie sellen aul disem Aufschu nich doonen, de Einheimischa un de Framda, dee en june Medd es, – 27dan aul dise Aufschu ha de Laundslied jedonen, dee ver junt wieren, un daut Launt es veonreinicht jeworden, – 28doamet daut Launt junt nich utspicht, wan jie daut veonreinjen, soo aus daut de Nazion utjespäajen haft, dee ver junt wia; 29dan jiedra, dee eent von aul dise Aufschu deit, dee Seel, dee daut deit, saul utte Medd von mienem Volkj utjerot woaren. 30Un jie sellen miene Väaschreften hoolen, daut jie kjeene von dise Aufschudoten doonen, dee ver junt jedonen worden sent, un junt nich doaderch veonreinjen. Ekj sie de HAR, jun Gott.
Currently Selected:
3. Mose 18: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
