3. Mose 17
17
De Uat toom Opfren – Veboot von Bloot un Os to Äten
1Un de Har räd too Moses un säd: 2Räd too Aaron un to siene Säns un to aule Kjinja Israel un saj to an: Dit es daut, waut de Har befoolen un jesajcht haft: 3Jiedra Mensch ut däm Hus Israel, dee een Rind ooda een Schop ooda eene Kos em Loaga schlacht, ooda butrem Loaga schlacht, 4un daut nich aun däm Engank vom Zelt de Bejäajnunk jebrocht haft, om daut däm Harn aus Opfagow to brinjen ver de Wonunk Gottes, dis Maun saul daut Bloot schuldich woaren; hee haft Bloot vegoten, un dis Maun saul ute Medd von sienem Volkj utjerot woaren; 5om daut de Kjinja Israel äare Schlachttieren brinjen, dee see oppem frieen Flekj schlachten, daut see dee däm Harn brinjen aun däm Engank vom Zelt de Bejäajnunk nodäm Priesta un dee aus Dankopfa däm Harn schlachten. 6Un de Priesta saul daut Bloot aun däm Aultoa Gottes spretzen ver däm Engank von Zelt de Bejäajnunk un daut Fat rieekjren toom leeftoljen Jeroch däm Harn. 7Un see sellen nich mea äare Schlachtopfa fa de Dämonen schlachten, dän see nohuare. Daut saul an eene eewje Sazunk bie äare Jeschlajchta sennen.
8Un du saust to an sajen: Jiedra Mensch ut däm Hus Israel un von de Framde, dee en äare Medd sent, dee een Brauntopfa ooda Schlachtopfa opfat, 9un daut nich aum Engank vom Zelt de Bejäajnunk brinjt, om daut däm Harn too opfren, dee Maun saul ut sienem Volkj utjerot woaren.
10Un jiedra Mensch ut däm Hus Israel un von de Framde, dee en äare Medd es, dee Bloot äten woat, – jäajen de Seel, dee daut Bloot at, woa ekj mien Aunjesecht rechten un an ute Medd von äarem Volkj utroden. 11Dan de Seel vom Fleesch es em Bloot, un ekj ha daut junt opp däm Aultoa jejäft, om Veseenunk fa june Seelen to doonen; dan daut Bloot es daut, daut Veseenunk fa de Seel deit. 12Doarom ha ekj to de Kjinja Israel jesajcht: Kjeena von junt saul Bloot äten; uk de Framda, dee en june Medd es, saul nich Bloot äten. 13Un jiedra Mensch von de Kjinja Israel un von de Framde, dee en june Medd es, dee een willet Tia ooda een Voagel jript, dee jejäten woaren, saul sien Bloot utranen loten un daut met Ieed bedakjen. 14Dan de Seel von aulem Fleesch; sien Bloot, daut es siene Seel; un ekj ha to de Kjinja Israel jesajcht: Jie sellen nich Fleesch met Bloot äten, dan de Seel von aulem Fleesch es sien Bloot; jiedra, dee daut at, saul utjerot woaren.
15Un jiedra, dee een Os ooda Verätnet at, hee es een Einheimischa ooda Framda, dee saul siene Kjleeda wauschen un sikj em Wota boden, un hee woat bat Oppenowent onrein sennen; dan woat hee rein sennen. 16Un wan hee siene Kjleeda nich wauscht un sien Fleesch nich boden woat, soo woat hee siene Ojjerajchtichkjeit droagen.
Currently Selected:
3. Mose 17: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
