3. Mose 19
19
De Omgank met Gott un däm Näakjsten
1Un de Har räd too Moses un säd: 2Räd to de gaunze Jemeent de Kjinja Israel un saj to an: Jie sellen heilich sennen; dan ekj, de Har, jun Gott, sie heilich.
3Jie sellen een jiedra siene Mutta un sienen Voda ferchten; un miene Sabaten sell jie hoolen. Ekj sie de HAR, jun Gott.
4Jie sellen junt nich no de Jetta dreien, un jegotne Jetta sell jie junt nich moaken. Ekj sie de HAR, jun Gott.
5Un wan jie een Dankopfa däm Harn opfren, soo sell jie daut toom Wooljefaulen fa junt opfren. 6Aun däm Dach, doa jie daut opfren, un aum aundren Dach saul daut jejäten woaren; un waut bat aum dredden Dach äwablift, saul met Fia vebrent woaren. 7Un wan daut aum dredden Dach jejäten woat, soo es daut een Aufschu, daut woat nich wooljefaulent sennen; 8un wäa daut at, woat siene Ojjerajchtichkjeit droagen, dan daut Heilje Gottes haft hee entheilicht; un dee Seel saul ut äarem Volkj utjerot woaren.
9Un wan jie de Arnt von junem Launt arnten, soo saust du däm Raunt von dienem Flekj nich gaunz aufarnte un saust kjeene noläsen von diene Arnt hoolen. 10Un en dienem Wienboajch saust du nich noläsen, un de aufjefollne Bäaren saust du nich oppläsen; fa däm Oamen un fa däm Framden saust du dee loten. Ekj sie de HAR, jun Gott.
11Jie sellen nich stälen; un jie sellen nich lieejen un nich faulsch haundlen eena jäajen däm aundren. 12Un jie sellen nich faulsch bie mienem Nomen schwieren, daut du däm Nomen von dienem Gott entheilichst. Ekj sie de HAR.
13Du saust dienem Näakjsten nich Orrajcht doonen noch bestälen; de Loon vom Doagesleena saul nich bie die äwa Nacht bliewen, bat Zemorjes. 14Du saust eenem Doofen [dee schlajcht hieet] nich fluchen un ver eenem Blinjen kjeen Hindanis lajen, un du saust die ferchten ver dienem Gott. Ekj sie de HAR.
15Jie sellen em Jerecht nich Orrajcht doonen; du saust nich de Jerinje Persoon aunseenen un nich de Groote Persoon ieren; en Jerajchtichkjeit saust du dienen Näakjsten rechten. 16Du saust nich aus een Lastera unja dienem Volkj omhäa gonen. Du saust nich jäajen dienem Näakjsten sien Bloot aungonen. Ekj sie de HAR.
17Du saust dienem Brooda en dienem Hoaten nich haussen. Du saust dienem Näakjsten iernsthauft trajchtwiesen, doamet du nich sienthaulwen Schult drajchst. 18Du saust nich Rach eewen un de Kjinja von dienem Volkj nich nodroagen, un du saust dienen Näakjsten leewen aus die selfst. Ekj sie de HAR.
19Miene Sazungen sell jie hoolen. Dien Vee von tweeatlei Oat saust du nich bieloten; dien Flekj saust du nich met tweeatlei Jeträajd beseien, un een Kjleet, ut tweeatlei Zeich jewäft, saul du nich auntrakjen.
20Un wan een Maun bie eene Fru licht, un met ar schlapt, un see es eene Deenstmejal, eenem Maun vesproaken, un see es nich loosjekoft, ar es uk nich de Frieheit jeschenkjt, dee saul bestroft woaren; see sellen nich stoawen, dan see es nich frie jewast. 21Un hee saul sien Schultopfa däm Harn brinjen aun däm Engank vom Zelt de Bejäajnunk, eenen Bock aus Schultopfa; 22un de Priesta saul ver däm Harn Veseenunk fa am, met däm Schultopfa Bock fa siene Sinden, doonen, dee hee begonen haft; un siene Sind, dee hee begonen haft, woat am vezeit woaren.
23Un wan jie en daut Launt komen un aulahaunt Fruchtbeem plaunten, soo sell jie äare ieeschte Frucht aus äare Väahut [onrein] achten; dree Joa sellen see junt aus onbeschnäden jelle, daut saul nuscht von an jejäten woaren; 24un aum vieeden Joa saul aule äare Frucht heilich sennen, too veharlichunk Gottes; 25un aum feften Joa sell jie äare Frucht äten, un junt – äare Arnt too vemieren. Ekj sie de HAR, jun Gott.
26Jie sellen nuscht met Bloot äten. Jie sellen nich Woasajerie noch Zaubarie driewen. 27Jie sellen nich däm Raunt von junem Kopphoa runtom schäaren, un däm Raunt von dienem Boat saust du nich vedoawen. 28Un jie sellen aun junem Fleesch wäajen eenem Dooden kjeene schnied-Wunde moaken; un Tätowierunge sell jie aun junt nich moaken. Ekj sie de HAR.
29Du saust diene Dochta nich entheiljen, ar de Huararie hanjäwen, doamet daut Launt nich Huararie drift un daut Launt voll Schaunddoten woat. 30Miene Sabaten sell jie hoolen, un mien Heilichtum sell jie ferchten. Ekj sie de HAR.
31Jie sellen nich no de Doodesbeschwiera un no de Woasaja gonen; jie sellen dee nich oppsäkjen, junt aun an too veonreinjen. Ekj sie de HAR, jun Gott.
32Ver däm grauen Hoa saust du oppstonen un de Jreisen ieren, un du saust die ferchten ver dienem Gott. Ekj sie de HAR.
33Un wan een Framda bie die es en junem Launt, soo sell jie am nich bedrekjen. 34Aus een Einheimischa unja junt saul junt de Framda sennen, dee bie junt es, un du saust am leewen aus die selfst; dan jie sent Framde jewast em Ägiptenlaunt. Ekj sie de HAR, jun Gott.
35Jie sellen nich Orrajcht doonen em Jerecht, enne Elle [Lenjenmot], em Jewicht un em Hollmot; 36jerajchte Wichtschol, jerajchte Jewichtsteena, jerajchtet Efa un jerajchtet Hin sell jie haben. Ekj sie de HAR, jun Gott, dee ekj junt ut däm Ägiptenlaunt rutjefieet haft.
37Un soo sell jie aul miene Sazungen un aul miene Rajchte hoolen un dee doonen. Ekj sie de HAR.
Currently Selected:
3. Mose 19: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
