3. Mose 16
16
De Veseenungsdach
1Un de Har räd too Moses nom Doot de beid Säns von Aaron, aus see ver däm Harn kaumen un storwen; 2un de Har säd to Moses: Räd too dienem Brooda Aaron, daut hee nich too aula Tiet en daut Heilichtum nennjeit – hinjrem Väahank, ver däm Dakjsel, daut oppe Lod es, doamet hee nich stoaft; dan ekj erschien enne Wolkj äwa däm Dakjsel. 3Dan doamet saul Aaron en daut Heilichtum nengonen; met eenem jungen Boll toom Schlachtopfa un eenem Bock toom Brauntopfa. 4Hee saul däm heiljen Liefrock von Boomwoll auntrakjen, un Beenkjleeda von Boomwoll sellen opp sienem Fleesch sennen, un met eenem Jirtel von Boomwoll saul hee omjebungen sennen, un eene Koppbinj von Boomwoll sikj ombinjen; daut sent heilje Kjleeda; un hee saul sien Fleesch em Wota boden un dee auntrakjen. 5Un von de Jemeent de Kjinja Israel saul hee 2 Kosenbakj nämen toom Sindopfa un eenen Bock toom Brauntopfa. 6Un Aaron saul däm Sindopfaboll, dee fa am es, doatoo brinjen un Veseenunk doonen fa sikj un fa sien Hus.
7Un hee saul de twee Bakj nämen un dee ver däm Harn stalen aum Engank vom Zelt de Bejäajnunk. 8Un Aaron saul Lessa schmieten äwa de twee Bakj, een Loss fa däm Harn un een Loss fa Asasel. 9Un Aaron saul däm Bock brinjen, opp däm daut Loss fa däm Harn jefollen es, un am aus Sindopfa opfren. 10Un de Bock, opp däm daut Loss fa Asasel jefollen es, saul läwendich ver däm Harn jestalt woaren, om opp am Veseenunk to doonen, om am aus Asasel enne Wieste wajchtoschekjen. 11Un Aaron brinj däm Sindopfaboll, dee fa am es, un doo Veseenunk fa sikj un fa sien Hus, un schlacht däm Sindopfaboll, dee fa am es. 12Un hee saul eene Paun voll Fiakolen vom Aultoa nämen, ver däm Harn, un siene beid Henj voll gootrikjendet, fien jestaumtet Rieekjastoff (Weiruak, seeta Ruak), un brinj daut hinjrem Väahank. 13Un hee saul daut Rieekjastoff (Weiruak, seeta Ruak) oppem Fia ver däm Harn lajen, doamet de Wolkj vom Rieekjastoff (Weiruak, seeta Ruak) daut Dakjsel bedakjt, daut oppem Zeichnis es, un hee nich stoaft. 14Un hee saul von däm Bollebloot nämen un sprets met sienem Finja oppe väaschte Dakjselsied jäajen Oosten; un ver däm Dakjsel saul hee von däm Bloot säwen Mol met sienem Finja spretzen.
15Un hee schlacht däm Sindopfabock, dee fa daut Volkj es, un brinj sien Bloot hinjrem Väahank, un doo met sienem Bloot, soo aus hee met däm Bollebloot jedonen haft, un sprets daut oppem Dakjsel un ver däm Dakjsel; 16Un hee saul Veseenunk doonen fa daut Heilichtum wäajen de Orreinichkjeit de Kjinja Israel un wäajen äare Äwaträdungen, no aul äare Sinden; un krakjt soo saul hee fa daut Zelt de Bejäajnunk doonen, daut bie an es, enne Medd von äare Onreinichkjeite. 17Un kjeen Mensch saul en däm Zelt de Bejäajnunk sennen, wan hee nennjeit, om Veseenunk em Heilichtum to doonen, bat hee rutjeit. Un soo doo hee Veseenunk fa sikj un fa sien Hus un fa de gaunze Vesaumlunk Israels. 18Un hee saul rutgonen nom Aultoa, dee ver däm Harn es, un fa am Veseenunk doonen; un hee saul von däm Bollebloot nämen un von däm Bockbloot un runtom aune Hieena vom Aultoa doonen, 19un sprets von däm Bloot met sienem Finja säwen Mol aun däm seljen un reinj am un heilj am von de Onreinichkjeite de Kjinja Israel.
20Un haft hee de Veseenunk vom Heilichtum un vom Zelt de Bejäajnunk un vom Aultoa jedonen, soo saul hee däm läwendjen Bock doahan brinjen. 21Un Aaron saul siene beid Henj opp däm Kopp vom läwendjen Bock lajen un opp am aule Onjerajchtichkjeiten de Kjinja Israel bekjanen un aul äare Äwaträdungen no aul äare Sinden; un hee laj dee opp däm Kopp vom Bock un schekj am, derch eenen reed stonendem Maun, wajch enne Wieste. 22Doamet de Bock aul äare Ojjerajchtichkjeit opp sikj drajcht en een willet Launt; un hee schekj däm Bock wajch enne Wieste.
23Un Aaron saul en daut Zelt de Bejäajnunk nengonen un de Kjleeda von Boomwoll uttrakjen, dee hee auntrock, aus hee en daut Heilichtum nenjinkj, un dee doa hanlajen; 24un hee saul sien Fleesch em Wota boden aum heiljen Uat un siene Kjleeda auntrakjen; un hee saul rutgonen un sien Brauntopfa un daut Brauntopfa vom Volkj opfren un Veseenunk fa sikj un fa daut Volkj doonen. 25Un daut Fat von Sindopfa saul hee oppem Aultoa rieekjren. 26Un wäa däm Bock aus Asasel wajchfieed, saul siene Kjleeda wauschen un sien Fleesch em Wota boden; un nodäm doaf hee en daut Loaga komen. 27Un däm Sindopfaboll un däm Sindopfabock, dee äa Bloot nenn jebrocht jeworden es, om em Heilichtum Veseenunk to doonen, saul maun rutschaufen butrem Loaga, un äare Hut un äa Fleesch un äa Mest met Fia vebrennen. 28Un dee an vebrent, saul siene Kjleeda wauschen un sien Fleesch em Wota boden; un nodäm doaf hee em Loaga komen.
29Un dit saul junt eene eewje Sazunk sennen: Em säwenden Moonat, aum 10-den Dach em Moonat, sell jie june Seelen deemutje un kjeene Oabeit doonen, de Einheimische un de Framda, dee en june Medd es; 30dan aun disem Dach woat maun Veseenunk fa junt doonen, om junt too reinjen; von aul june Sinden woa jie rein sennen ver däm Harn. 31Een Sabat de Ru saul hee junt sennen, un jie sellen june Seelen deemutje, eene eewje Sazunk. 32Un daut saul de Priesta Veseenunk doonen, däm maun saulwen un däm maun heilje woat, om däm Priestadeenst to doonen aun sienem Voda siene Städ; un hee saul de Kjleeda von Boomwoll auntrakjen, de heilje Kjleeda; 33un hee saul Veseenunk fa daut heilje Heilichtum un fa daut Zelt de Bejäajnunk doonen, un fa däm Aultoa saul hee Veseenunk doonen, un fa dee Priesta un fa daut gaunze Volkj de Jemeent saul hee Veseenunk doonen. 34Un daut saul junt eene eewje Sazunk sennen, om fa de Kjinja Israel Veseenunk to doonen wäajen aul äare Sinden eenmol em Joa. Un hee deed, soo aus de Har däm Moses befoolen haud.
Currently Selected:
3. Mose 16: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
