3. Mose 15
15
Jesaz äwa de Orreinheit bie Mana un Frues
1Un de Har räd too Moses un Aaron un säd: 2Räd to de Kjinja Israel un saj to an: Wan een Maun aun sienem Fleesch Utfluss haft, soo es hee onrein derch sien Utfluss. 3Un dit woat siene Orreinheit sennen bie sienem Utfluss: Lat sien Fleesch sien Utfluss ranen, ooda helt sien Fleesch sien Utfluss trigj, soo es daut siene Orreinheit. 4Jiedret Loaga, wuabowen de Utflussja licht, woat onrein sennen, un jiedra Jäajenstaund, wuabowen hee sett, woat onrein sennen. 5Un wäa sien Loaga aunschieet, saul siene Kjleeda wauschen un sikj em Wota boden, un hee woat bat Oppenowent onrein sennen. 6Un wäa sikj opp däm Jäajenstaund jesat haft saul siene Kjleeda wauschen un sikj em Wota boden, un hee woat bat Oppenowent onrein sennen. 7Un wäa daut Fleesch vom Utflussjen aunschieet, saul siene Kjleeda wauschen un sikj em Wota boden, un hee woat bat Oppenowent onrein sennen. 8Un wan een Utflussja opp eenen Reinen spicht, soo saul disa siene Kjleeda wauschen un sikj em Wota boden, un hee woat bat Oppenowent onrein sennen. 9Un jiedra Sodel un aules, opp däm de Utflussja ritt, woat onrein sennen. 10Un jiedra, dee irjent waut aunschieet, waut hee unja sikj haud, woat bat Oppenowent onrein sennen; un wäa daut drajcht, saul siene Kjleeda wauschen un sikj em Wota boden, un hee woat bat Oppenowent onrein sennen. 11Un jiedra, däm de Utflussja aunschieet, un hee haft siene Henj nich em Wota aufjespeelt, dee saul siene Kjleeda wauschen un sikj em Wota boden, un hee woat bat Oppenowent onrein sennen. 12Un daut ieedne Jefäss, daut de Utflussja aunschieet, saul vebroaken woaren, un jiedret heltanet Jefäss saul em Wota jespeelt woaren.
13Un wan de Utflussja rein woat von sienem Utfluss, soo saul hee säwen Doag talen to siene Reinjunk; un hee saul siene Kjleeda wauschen un sien Fleesch em läwendjen Wota boden, un hee woat rein sennen. 14Un aum achten Dach saul hee sikj twee Turtelduwen ooda twee junge Duwen nämen un ver däm Harn komen aun däm Engank vom Zelt de Bejäajnunk un dee däm Priesta jäwen; 15un de Priesta saul dee opfren, de eene aus Sindopfa un de aundre aus Brauntopfa. Un soo doo de Priesta Veseenunk fa am ver däm Harn wäajen sienem Utfluss.
16Un wan eenem Maun de Somen wajchrant, soo saul hee sien gaunzet Fleesch em Wota boden, un hee woat bat Oppenowent onrein sennen. 17Un jiedret Kjleet un jiedret Fal, wuanopp de Somen jerant es, saul em Wota jewoschen woaren, un daut woat bat Oppenowent onrein sennen. 18Un eene Fru, bie dee een Maun met ranendem Somen licht, – see saul sikj em Wota boden, un woat bat Oppenowent onrein sennen.
19Un wan eene Fru Utfluss haft, un äa Utfluss aun äarem Fleesch Bloot es, soo saul see säwen Doag en äare Orreinheit sennen; un jiedra, dee ar aunschieet, woat bat Oppenowent onrein sennen. 20Un aules, wuabowen see en äare Orreinheit licht, woat onrein sennen, un aules, wuabowen see sett, woat onrein sennen. 21Un jiedra, dee äa Loaga aunschieet, saul siene Kjleeda wauschen un sikj em Wota boden, un hee woat bat Oppenowent onrein sennen. 22Un jiedra, dee irjent een Jäajenstaund aunschieet, wuabowen see jesäten haft, saul siene Kjleeda wauschen un sikj em Wota boden, un hee woat bat Oppenowent onrein sennen. 23Un wan waut opp däm Loaga ooda opp däm Jäajenstaund es, wuabowen see jesäten haft, – wan hee daut aunschieet, woat hee bat Oppenowent onrein sennen. 24Un wan een Maun bie ar licht, un äare Orreinichkjeit kjemt aun am, soo woat hee säwen Doag onrein sennen; un jiedret Loaga, wuabowen hee licht, woat onrein sennen.
25Un wan eene Fru äaren Blootfluss väl Doag haft buta de Räajeltiet, soo saul see aul de Doag vom Blootfluss äare Orreinichkjeit sennen, aus enne Doag äare Räajel; see es onrein. 26Jiedret Loaga, wuabowen see aule Doag en äarem Blootfluss licht, saul ar sennen aus daut Loaga en äare Räajel, un jiedra Jäajenstaund, wuabowen see sett, woat onrein sennen no de Tiet äare Räajel. 27Un jiedra, dee daut aunschieet, woat onrein sennen; un hee saul siene Kjleeda wauschen un sikj em Wota boden, un hee woat bat Oppenowent onrein sennen.
28Un wan see rein jeworden es von äarem Blootfluss, soo saul see säwen Doag talen, un nodäm woat see rein sennen. 29Un aum achten Dach saul see twee Turtelduwen ooda twee junge Duwen nämen un dee nom Priesta brinjen aun däm Engank vom Zelt de Bejäajnunk; 30un de Priesta saul de eene aus Sindopfa un de aundre aus Brauntopfa opfren. Un soo doo de Priesta Veseenunk fa ar ver däm Harn wäajen däm Blootfluss äare Orreinheit.
31Un jie sellen de Kjinja Israel aufsondren von äare Orreinheit, daut see nich en äare onreinheit stoawen, endäm see miene Wonunk veonreinjen, dee en äare Medd es.
32Dit es daut Jesaz fa däm Utflussjen un fa dee, däm de Somen wajchrant, soo daut hee doaderch onrein woat; 33un fa dee, dee krank es en äare Orreinheit, un fa dän, dee eenen Utfluss haft, daut es Maun ooda Fru, un fa däm Maun, dee bie eene Orreine licht.
Currently Selected:
3. Mose 15: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
