3. Mose 1
1
Brauntopfa
1Un de Har roopt Moses, un hee räd to am ut däm Zelt de Bejäajnunk un säd: 2Räd to de Kjinja Israel un saj to an: Wan een Mensch von junt däm Harn eene Opfagow brinjen well, soo sell jie vom Vee, vom Rind- un Kjlienvee, june Opfagow brinjen. 3Wan siene Opfagow een Brauntopfa vom Rindvee es, soo saul hee dee brinjen, een Menlichet onen Fäla; aun däm Engank vom Zelt de Bejäajnunk saul hee daut brinjen, toom Wooljefaulen fa am ver däm Harn. 4Un hee saul siene Haunt opp däm Kopp vom Brauntopfa lajen, un daut woat wooljefaulent fa am sennen, om Veseenunk fa am to doonen. 5Un hee saul daut junge Rind ver däm Harn schlachten; un Aaron siene Säns, de Priesta, sellen daut Bloot runtom däm Aultoa spretzen, dee aum Engank vom Zelt de Bejäajnunk es. 6Un hee saul däm Brauntopfa de Hut auftrakjen un daut en Stekja veschnieden. 7Un Aaron siene Säns, däm Priesta, sellen Fia oppem Aultoa lajen un Holt oppem Fia lajen; 8un Aaron siene Säns, de Priesta, sellen de Stekja, däm Kopp un daut Fat oppem Holt - äwa däm Fia lajen, daut opp däm Aultoa es. 9Un sien Ennaliche un siene Schinkjes saul hee met Wota wauschen; un de Priesta sellen daut Gaunze oppem Aultoa rieekjren; daut es een Brauntopfa, een Fiaopfa een leeftolja Jeroch däm Harn.
10Un wan siene Opfagow vom Kjlienvee es, von Schop ooda von Kose, toom Brauntopfa, soo saul hee dee brinjen, een Menlichet onen Fäla. 11Un hee saul daut schlachten aune Sied vom Aultoa jäajen Nuaden, ver däm Harn; un Aaron siene Säns, de Priesta, sellen sien Bloot runtom aun däm Aultoa spretzen. 12Un hee saul daut en siene Stekja veschnieden met sienem Kopp un sienem Fat; un de Priesta saul daut oppem Holt - äwa daut Fia lajen, daut opp däm Aultoa es. 13Un daut Ennaliche un de Schinkjes saul hee met Wota wauschen; un de Priesta saul daut gaunze brinjen un opp däm Aultoa rieekjren; daut es een Brauntopfa, een Fiaopfa een leeftolja Jeroch däm Harn.
14Un wan een Brauntopfa von Väajel siene Opfagow däm Harn es, soo saul hee von de Turtelduwen ooda von de junge Duwen siene Opfagow brinjen. 15Un de Priesta brinj dee nom Aultoa un kjniep ar däm Kopp en un rieekja ar oppem Aultoa, un äa Bloot saul utjedrekjt woaren aune Waunt vom Aultoa. 16Un hee trann äarem Kopp met sienem Onrot auf un schmiet am aun däm Aultoa jäajen Oosten, aun däm Uat de Fatausch. 17Un hee saul dee aune Flichten ennrieten, hee saul dee nich auftranen; un de Priesta saul ar oppem Aultoa rieekjren, oppem Holt, daut äwa däm Fia es; daut es een Brauntopfa, een Fiaopfa leeftolja Jeroch däm Harn.
Currently Selected:
3. Mose 1: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
