3. Mose 2
2
Speisopfa
1Un wan wäa de Opfagow een Speisopfa däm Harn brinjen well, soo saul siene Opfagow fienet Mäl sennen; un hee saul Eelj doanopp jeeten un Weiruak doanopp lajen. 2Un hee saul daut no Aaron siene Säns brinjen; un hee nemt doavon eene Haunt voll, von sienem fienem Mäl un von sienem Eelj met aul sienem Weiruak, un de Priesta rieekjat daut Jedenkjopfa doa opp däm Aultoa; daut es een Fiaopfa leeftolja Jeroch däm Harn. 3Un daut äwaje vom Speisopfa saul fa Aaron un fa siene Säns sennen; een Huachheiljet von de Fiaopfa Gottes.
4Un wan du aus Opfagow von eenem Speisopfa eent em Owen jebaktet brinjen west, soo saul daut fienet Mäl sennen, onjesuade Kuaken, met Eelj vemischt, un onjesuade Flade, jesaulft met Eelj. 5Un wan diene Opfagow een Speisopfa enne Paun es, soo saul daut fienet Mäl sennen, vemischt met Eelj, onjesuat; 6du saust daut en Stekja vebräakjen un Eelj doanopp jeeten; daut es een Speisopfa. 7Un wan diene Opfagow een jekoaktet Speisopfa es, soo saul daut fienet Mäl met Eelj vemischt woaren. 8Un du saust daut Speisopfa, daut von dise Dinj jemoakt woat, däm Harn brinjen; un maun saul daut däm Priesta jäwen, un hee saul daut nom Aultoa droagen. 9Un de Priesta saul von däm Speisopfa nämen, waut doavon toom Jedajchnis bestemt es un rieekjat daut oppem Aultoa; daut es een Fiaopfa leeftolja Jeroch däm Harn. 10Un daut Äwajebläwne vom Speisopfa saul fa Aaron un fa siene Säns sennen; een Huachheiljet von däm Fiaopfa Gottes.
11Aule Speisopfa, dee jie däm Harn brinjen, saul nich ut Jesuadem jemoakt woaren; dan aulem Suadieech un aulem Honnich, doavon sell jie kjeen Fiaopfa däm Harn rieekjren. 12Waut de Opfagow vom Ieeschten betraft, soo sell jie daut däm Harn opfren; oba oppem Aultoa sellen dee nich komen toom leeftoljen Jeroch. 13Un aule Opfagowen von dienem Speisopfa saust du met Solt solte un saust daut Bundessolt von dienem Gott opp diene Speisopfa nich fälen loten; bie aul diene Opfagowen saust du Solt brinjen.
14Un wan du een Speisopfa von de ieeschte Frucht däm Harn brinjen west, soo saust du Oaren, aum Fia jereescht, Schroot vom jungen Jeträajd, aus Speisopfa von diene ieeschte Frucht brinjen. 15Un du saust Eelj doa nopp doonen un Weiruak doanopp lajen; daut es een Speisopfa. 16Un de Priesta saul daut Deel toom Jedajchnis doa selfst rieekjren, von sienem Schroot un von sienem Eelj, met aul sienem Weiruak; daut es een Fiaopfa däm Harn.
Currently Selected:
3. Mose 2: PBJHF
Highlight
Copy
Compare
Share
Want to have your highlights saved across all your devices? Sign up or sign in
© SW-Radio e.V.
