2. Mose 40

Heilichtum: Daut Heilichtum woat oppjestalt un enjeweit

1Un de Har räd too Moses un säd: 2Aum ieeschten Dach em ieeschten Moonat, saust du de Wonunk, daut Zelt de Bejäajnunk oppstalen. 3Un du saust de Zeichnislod doa nennstalen un de Lod met däm Väahank vedakjen. 4Un brinj däm Desch nenn un moak reed, waut doa nopp jehieet; un brinj de Laump met Jestal nenn un stekj siene Laumpen aun. 5Un stal däm goldnen Aultoa nom Rieekjastoff (Weiruak, seeta Ruak) ver de Zeichnislod, un henj däm Väahank ver däm Engank too Wonunk opp. 6Un stal däm Brauntopfaaultoa ver däm Engank de Wonunk vom Zelt de Bejäajnunk. 7Un stal de Wauschkomm tweschen däm Zelt de Bejäajnunk un däm Aultoa, un doo Wota doa nenn. 8Un stal däm Väahoff runtom opp un henj däm Väahank vom Dooa nom Väahoff opp. 9Un nemm daut Saulweelj un saulw de Wonunk un aules, waut doabennen es, un heilj ar un aul äa Jereetschoft, un see saul heilich sennen. 10Un saulw däm Brauntopfaaultoa un aul sien Jereetschoft, un heilj däm Aultoa; un de Aultoa saul huach heilich sennen. 11Un saulw de Wauschkomm un sien Jestal, un heilj daut. 12Un lot Aaron un siene Säns nodakomen aun däm Engank vom Zelt de Bejäajnunk un wausch an met Wota. 13Un trakj Aaron de heilje Kjleeda aun un saulw am un heilj am, daut hee mie däm Priestadeenst deit. 14Un siene Säns saust du nodakomen loten un an de Liefrakj auntrakjen. 15Un du saust an saulwen, soo aus du äarem Voda jesaulft hast, daut see mie däm Priestadeenst doonen. Un äare Saulwunk saul jedonen, om an to eenem eewjen Priestatum to sennen bie äare Jeschlajchta. 16Un Moses deed daut; no aulem, waut de Har am befoolen haud, aulsoo deed hee.

17Un daut passieed aum ieeschten Moonat, em tweeden Joa, aum ieeschten vom Moonat, doa wort de Wonunk oppjestalt. 18Un Moses stald de Wonunk opp un sad äare Feet un stald äare Bräda un sad äare Rijel en un recht äare Stendasch opp; 19un hee breed daut Zelt äwa de Wonunk un läd de Dakj vom Zelt bowen nopp; soo aus de Har Moses befoolen haud. 20Un hee neem daut Zeichnis un läd daut enne Lod un deed de Stangen aune Lod un läd daut Dakjsel oppe Lod, bowen nopp; 21un hee brocht de Lod enne Wonunk un henjd däm Trannväahang opp un vedakjt de Zeichnislod; soo aus de Har Moses befoolen haud. 22Un hee sad däm Desch em Zelt de Bejäajnunk aune Nuadsied de Wonunk, butrem Väahank; 23un hee läd doa Broot nopp ver däm Aunjesecht Gottes; soo aus de Har Moses befoolen haud. 24Un hee stald de Laump met Jestal em Zelt de Bejäajnunk, däm Desch jäajenäwa, aune Meddachsied de Wonunk, 25un hee stekjt de Laumpen ver däm Harn aun; soo aus de Har Moses befoolen haud. 26Un hee stald däm goldnen Aultoa em Zelt de Bejäajnunk ver däm Väahank, 27un rieekjad doabowen gootrikjendet Rieekjastoff (Weiruak, seeta Ruak); soo aus de Har Moses befoolen haud. 28Un hee henjd däm Väahank em Engank too Wonunk opp. 29Un däm Brauntopfaaultoa stald hee aun däm Engank de Wonunk em Zelt de Bejäajnunk, un hee opfad doabowen daut Brauntopfa un daut Speisopfa; soo aus de Har Moses befoolen haud. 30Un hee stald de Wauschkomm tweschen däm Zelt de Bejäajnunk un däm Aultoa un deed Wota doanenn toom wauschen. 31Un Moses un Aaron un siene Säns woschen doa äare Henj un äare Feet; 32wan see en daut Zelt de Bejäajnunk nennjinjen un wan see nom Aultoa jinjen, woschen see sikj, soo aus de Har Moses befoolen haud. 33Un hee stald däm Väahoff opp, runtom de Wonunk un om däm Aultoa un henjd däm Väahank vom Dooa vom Väahoff opp. Un soo muak Moses daut Woakj too Enj. 34Un de Wolkj bedakjt daut Zelt de Bejäajnunk, un de Harlichkjeit Gottes feld de Wonunk. 35Un Moses kunn nich en daut Zelt de Bejäajnunk nengonen; dan de Wolkj rud doabowen, un de Harlichkjeit Gottes feld de Wonunk. 36Un wan de Wolkj sikj von de Wonunk opphoof, soo jinjen de Kjinja Israel loos, opp aul äare Wäaj. 37Un wan de Wolkj sikj nich opphoof, soo jinjen see nich loos, bat aun däm Dach, doa de Wolkj sikj opphoof. 38Dan de Wolkj Gottes wia Äwadach oppe Wonunk, un de Nacht wia Fia enne Wolkj vere Uagen von gaunzen Hus Israel, opp aul äare Wäaj.

Currently Selected:

2. Mose 40: PBJHF

Highlight

Copy

Compare